މުޒާހަރާ ކުރުމާއި އެއްވެ އުޅުން މަނާ ކޮށްފައި އޮއްވާ އިދިކޮޅު ދެ ޕާޓީގެ މެންބަރުންނާއި ސަޕޯޓަރުންގެ ތެރެއިން ބަޔަކު އިއްޔެ ކުރި މުޒާހަރާގައި ހައްޔަރުކުރި 24 މީހަކު ދޫކޮށްލއިފި އެވެ.
ފުލުހުންގެ މީޑިޔާ އޮފިޝަލަކު މިއަދު ވިދާޅުވީ ހައްޔަރުކުރި މީހުން ދޫކޮށްލީ މިއަދު މެންދުރު ކަމަށެވެ. މީގެ އިތުރުން ވިދާޅުވީ ހައްޔަރުގައި ތިބި މީހުން ދޫކޮށްލީ އެޗްޕީއޭގެ ގައިޑުލައިނާއި ހިލާފުވެފަ ވާތީ ޖޫރިމަނާ ކުރުމަށް ފަހުގައި ކަމަށެވެ.
އިއްޔެގެ މުޒާހަރާއިން ހައްޔަރުކުރި މީހުންގެ ތެރޭގައި ޕީޕީއެމް / ކޮންގްރެސް ޕާޓީ (ޕީއެންސީ) ހިމެނޭ ގޮތަށް އޮންނަ ކޯލިޝަންގެ އެކްޓިން ލީޑަރު އަބްދުއްރަހީމް އަބްދުﷲ އާއި އެ ދެ ޕާޓީގެ ކަައުންސިލް މެންބަރުން ވެސް ހިމެނެ އެވެ.
ކޮވިޑް-19 ގެ ހާލަތު ވަރަށް ގޯސް ދުވަސްވަރަކަށްވާތީ ރައްކާތެރި ކަމުގެ ގޮތުން އެއްވުންތަކާއި ޖަލްސާތައް ބޭއްވުން ވަނީ މަނާކޮށްފަ އެވެ. މި ހާލަތުގައި އެފަދަ އެއްވެސް ހަރަކާތަކަށް ފުުރުސަތު ނުދޭނެ ކަމަށް ފުލުހުން ވަނީ ބުނެފައެވެ. ނަމަވެސް އިދިކޮޅުން އަންނަނީ ސިލްސިލާކޮށް ކޮންމެ ހުކުރު ދުވަހަކު މުޒާހަރާ ބާއްވަމުންނެވެ.
