ޓެރަރިޒަމާއި ދީނީ ގޮތުން ހައްދު ފަހަނައަޅާ ދިއުމުގެ ވިސްނުމާއި ފިކުރާއި ދެކޮޅަށް މަސައްކަތް ކުރާނެ ގައުމީ ފެންވަރުގެ ސްޓްރެޓެޖީއެއް އެމްއެންޑީއެފް އިން ނެރެފި އެވެ.
މިއަދު ކޯސްޓުގާޑު ބިލްޑިންގުގައި ބޭއްވި ރަސްމިއްޔާތެއްގައި އެ ސްޓްރެޓެޖީ ނެރެދެއްވީ ޑިފެންސް މިނިސްޓަރު އާދަމް ޝަރީފް އުމަރެވެ. އެ ސްޓްރެޓެޖީ އާ ބެހޭގޮތުން މައުލޫމާތު ދެމުން މިނިސްޓަރު ވިދާޅުވީ ދީނީ ގޮތުން ހައްދުފަހަނައަޅާ ދިއުން ހުއްޓުވާ އަދި އެކަމާ ދެކޮޅަށް މަސައްކަތް ކުރަންޖެހޭ ގޮތްތައް އެ ސްޓްރެޓެޖީގައި ބަޔާންކޮށްފައިވާނެ ކަމަށެވެ.
އެ ސްޓްރެޓެޖީ ތައްޔާރުކޮށްފައިވަނީ ސިފައިންނާއި، ފުލުހުންނާއި، އިމިގްރޭޝަން، ކަސްޓަމްސް އަދި ނެޝަނަލް ކައުންޓާ ޓެރަރިޒަމް ސެންޓަރު ގުޅިގެން ކަމަށެވެ. އެ ސްޓްރެޓެޖީ ތައްޔާރުކޮށްފައިވަނީ މައިގަނޑު ފަސް ދާއިރާއަކަށް ބިނާކޮށް ކަމަށް މިނިސްޓަރު ވިދާޅުވި އެވެ. އެއީ އިޖްތިމާއީ ދާއިރާ، އިގްތިސޯދީ ދާއިރާ، ތައުލީމީ ދާއިރާ، ދީނީ ގޮތުން އަދި ގާނޫނޫ ނެގެހެއްޓުމުގެ ދާއިރާ ކަމަށެވެ. އެ ދާއިރާތަކުން އިތުރަށް މަސައްކަތް ކުރަން ޖެެހޭ ކަމަށެވެ.
"ސްޓްރެޓެޖީގައި އެ ދާއިރާތަކަށް ވަރަށް ބޮޑަށް އަލި އަޅުވާލާފައިވާނެ، ދީނީ ގޮތުން ހައްދު ފަހަނައެޅުން ހުއްޓުވުމުގައި އެ ދާއިރާތަކުގެ މުހިންމުކަން ބޮޑު، މި ސްޓެރެޓެޖީއަކީ މިވަގުތަށް އަޅުގަނޑުމެންނަށް ވަރަށް މުހިންމުކަން ބޮޑު ސްޓްރެޓެޖީއަކަށް ވެގެންދާނެ، އަދި މީގެ ސަބަބުން ދައުލަތުގެ އެހެން މުއައްސަސާތަކުން އަޅުގަނޑުމެންނާ ގުޅިގެން މަސައްކަތް ކުރަން އިތުރަށް ފަސޭހަވެގެން ދާނެ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ޓެރަރިޒަމަށް ދިވެހިން ހުށަހެޅެމުންދާ މިންވަރުގެ ތަފާސް ހިސާބެއްވެސް ވަރަށް އަވަހަށް އާންމުކުރާނެ ކަމަށެވެ.
ދީނީ ގޮތުން ހައްދުފަހަނާ އަޅާ ދިއުން ހުއްޓުވުމަށް ރާއްޖޭގައި ތަފާތު ގިންތިތަކަށް މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވި އެވެ. އަދި ޓެރަރިޒަމާއި ދީނީ ގޮތުން ހައްދު ފަހަނަ އެޅުން ހުއްޓުވުމަށް ބޭރުގެ ފަރާތްތަކާއި ގުޅިގެން ރާއްޖެއިން ކުރަމުންދާ މަސައްކަތް އިތުރަށް ފުޅާކުުރުމުގެ ގޮތުން ބޭރުގެ 19 ގައުމަކާއެކު މަޝްވަރާ ބައްދަލުވުމެއް ބާއްވަން ތައްޔާރުވަމުން އަންނަ ކަމަށެވެ.
"ރާއްޖޭގައި މިވަގުތު ތިބި ދީނީ އެކިއެކި މުއައްސަސާތަކާއި، ދީނީ އިލްމުވެރިންނާއި، ޖަމިއްޔާ ޖަމާއަތްތަކާއި ގުޅިގެން ކުރާ މަސައްކަތް އިތުރު ކުރަމުން ގެންދާނަން،" މިނިސްޓަރު ވިދާޅުވި އެވެ.
ޓެރަރިޒަމްގެ ހަމަލާއެއް ރާއްޖެއަށް ދިނުމުގެ ފުރުސަތު ކުޑަކުރަން ވެލާނާ އިންޓަނޭޝަނަލް އެއާޕޯޓުގެ ސެކިއުރިޓީ ސިފައިން ބަލަހައްޓަން ފަށާފައިވާއިރު ސިފައިންނަށް އައިއީޑީ ފަދަ ނުރައްކާތެރި ހަމަލާތައް ދޭ ތަކެތި ނައްތާލުމުގެ ގާބިލްކަން ހުންނާނެ ކަމަށް މިނިސްޓަރު ވިދާޅުވި އެވެ.
ވެލާނާ އެއާޕޯޓުގެ ސެކިއުރިޓީ ވަރުގަދަ ކުރުމަށް ބެގޭޖިން ސްކްރީނިން ވަރުގަދަކޮށް، ސެކިއުރިޓީ މެޝިންތަކާއި މެނުއަލް ކޮށް ސްކްރީން ކުރުން އިތުރުކޮށްފައިވާ ކަމަށްވެސް މިނިސްޓަރު ވިދާޅުވި އެވެ.