ރިތިކް ރޯޝަންގެ ކެރިއަރުގައި ކުޅޭ ފުރަތަމަ ބައޮޕިކް، "ސުޕަ 30" ގައި އޭނާ ފެނިގެންދާނީ މެތަމެޓީޝިއަން އާނަންދް ކުމާރުގެ ރޯލުންނެވެ. އާންމުކޮށް ރިތިކް ކުޅޭ ފިލްމުތަކާ ބަލާއިރު މި ފިލްމުގައި އޭނާ ކުޅޭ ރޯލަކީ ވަރަށް ތަފާތު ރޯލެކެވެ. އެކްޝަން ނުވަތަ ތްރިލާ އަދި ޑްރާމާ ފިލްމުތައް އާންމުކޮށް ކުޅޭ ރިތިކްގެ މޮޅު ނެށުންތައް އެ ފިލްމުތަކުގައި ފެނިގެންދާއިރު އެ ފިލްމުތަކާ ހިލާފަށް "ސުޕަ30" އަކީ ވަރަށް މަޑުމައިތިރި ފިލްމެކެވެ.
އައިޓީ ދާއިރާއިން ކުރިއަށްދާން ޝައުގުވެރިވާ ކުދިންގެ ތެރެއިން މާލީ ހާލަތު ތަން ނުދޭތީ ނުކިޔެ ތިބި ކުދިންނަށް އާނަންދް އުފެއްދި "ސުޕަ 30" ކިޔާ ޕްރޮގްރާމެއްގެ ވާހަކަ ފެނިގެންދާ މި ފިލްމުގައި ރިތިކްގެ ދަރިވަރުންގެ ރޯލު ކުޅޭނެ އުމުރުން 15 އަހަރާއި 17 އަހަރާ ދެމެދު ކުދިން ހޯދުމަށް 15،000 ކުދިން ވަނީ މި ފިލްމުން އޮޑިޝަން ކޮށްފަ އެވެ.
ފިލްމުގެ ކާސްޓިން ޑައިރެކްޓަރު މުކޭޝް ޗަބްރާ އާއި ޑައިރެކްޓަރު ވިކާސް ބަލް ވަނީ 15،000 ކުދިންގެ ތެރެއިން ފިލްމުގައި ރިތިކްގެ ދަރިވަރުންގެ ރޯލު ކުޅޭނެ 78 ކުއްޖަކު އޮޑިޝަނުން މިހާރު ހޮވާފަ އެވެ.
މި ކުދިން ހޮވުމަށް ބޭއްވި ބުރަ އޮޑިޝަންގެ ތަޖުރިބާ ހިއްސާކުރަމުން މުކޭޝް ވަނީ އެ 78 ކުދިން ހޮވާފައިވަނީ އެތަކެއް މަސްތަކެއް ވަންދެން އިިންޑިއާގެ ފަސް ސަހަރައްދެއްގައި އޮޑިޝަންތައް ކުރިއަށް ގެންގޮސްގެން ކަމަށެެވެ. އަދި އޮޑިޝަންގެ އެކި ބައިތަކުގައި އަތްފުނާ އަޅައިގެން އެންމެ ގާބިލް 78 ކުދިން ހޮވައި އެ ކުދިންނަށް ތަމްރީނުތައް ދިނުމުގެ މަސައްކަތް ފަށާފައިވާ ކަމަށް ވެސް މުކޭޝް ވަނީ ބުނެފަ އެވެ.
"އެ 78 ކުދިންނަށް ވޯކްޝޮޕްތައް ދީ އޭގެތެރެއިން އެންމެ ރަނގަޅު 30 ކުދިން ހޮވާނީ ފިލްމުގައި އައިޓީ ކިޔަވާ ކުދިންގެ ރޯލަށް،" މުކޭޝް ބުނެފައިވެ އެވެ.
މިހާރު އެ ކުދިންނަށް ވޯކްޝޮޕްތައް ދެމުން އަންނައިރު ރިތިކް ވެސް ވަނީ އާނަންދްގެ ރޯލަށް ތައްޔާރުވުމުގެ މަސައްކަތް ފަށާފަ އެވެ.
ކުޑަކުދިން މުހިންމު ރޯލުތަކުން ފެނިގެން ގޮސްފައިވާ "ޗިލާ ޕާޓީ" ގައި ފެނިގެންދިޔަ ނުވަ ކުދިންނާއި "ބަޖްރަންގީ ބައިޖާން" ގައި މުންނީގެ ރޯލު ކުޅުނު ހަރްޝާލީ މަލްހޯތުރާ އަދި "ޑަންގާލް" ގައި ގީތާ ޕޮގަތާއި ބަބީތާ ޕޮގަތްގެ ކުޑައިރުގެ ރޯލު ކުޅުނު ޒާއިރާ ވަސީމް އާއި ސުހާނީ ބަޓްނާގަރް އެ ފިލްމުތަކަށް އޮޑިޝަންކޮށް ހޮވާފައިވަނީ މުކޭޝް އެވެ.
މުކޭޝް ވަނީ ފަގީރު އަދި މެދު ފަންތީގެ ކުދިން މި ފިލްމަށް ހޮވުމަށް އެމީހުން ވަނީ އިންޑިއާގެ އެކި ސްލަމްތަކުގައި ދިރިއުުޅެމުން އަންނަ ކުދިން ވެސް އޮޑިޝަންކޮށް ހޮވާފައި ކަމަށެވެ.
މި ފިލްމަށް ތައްޔާރުވުމުގެ ގޮތުން ކުރިއަށް ގެންދާ ވޯކްޝޮޕްތައް ނިމުނުހާ އަވަހަކަށް ޝޫޓިން ފެށުމަށް ވަނީ ހަމަޖެހިފަ އެވެ. ރިލައެންސް އެންޓަޓެއިންމަންޓާއި ފެންޓަމް ފިލްމްސްއިން އުފައްދާ "ސުޕަ 30" ރިލީޒްކުރުމަށް ހަމަޖެހިފައިވަނީ އަންނަ އަހަރުގެ ނޮވެމްބަރު 23 ވަނަ ދުވަހު އެވެ.