ފާފަޔަކަށް އަރައިގަތުމަށް ގޮވާނުލާހާ ހިނދަކު، ވެރިންނާ ދެކޮޅަށް ނުކުތުން އިސްލާމްދީނުގައި ހުއްދަ ނުވާނެ ކަމަށް ތިން ޝޭހަކު ވިދާޅުވެއްޖެ އެވެ.
ސައުދި އަރަބިއްޔާގެ، މަދީނާ ޔުނިވަސިޓީ އިން ކިޔަވާވިދާޅުވެފައިވާ، ޝޭހް ރަފާއު އާއި އެހެން ވެސް ދެ ޝޭހަކު ވެގެން ދަރުބާރު ގޭގައި ބޭއްވި ނިއުސް ކޮންފަރެންސްގައި ވިދާޅުވީ ވެރިއެއްގެ ފަރާތުން ޖާނަށް ގެއްލުންދީ ތިބާގެ ބުރަކަށީގައި ތަޅައި އަނިޔާ ކުރި ނަމަވެސް އެ ވެރިޔަކާ ދެކޮޅަށް ނިކުމެ، ހަނގުރާމަ އިއުލާން ކުރުމަކީ އިސްލާމީ އުސޫލުތަކުގެ ތެރޭގައި ވާކަމެއް ނޫން ކަމަށެވެ. ކީރިތި ގުރުއާނާއި ހަދީސްތަކުން ދަލީލު ދައްކަވަމުން ވިދާޅުވީ ވެރިޔަކާ ދެކޮޅަށް ނިކުމެވޭނެ ހަމައެކަނި ގޮތަކީ، ކުފުރަކަށް ނޫނީ ދީނުން ބޭރުވުން ނޫނީ އެހެން ވެސް ފާފަޔަކަށް އަރައިގަތުމަށް ވެރިއަކު ކަޑައެޅިގެން އަމަލު ކުރާ ނަމަ ކަމަށެވެ.
"ކޮބައިތޯ އެބޭފުޅުން މި އުގެނުނު ސަލަފުއް ސޯލިހުންގެ ރިވެތި ގޮތް. އެބޭފުޅުން އުގެނުނު ހަދީސާއި ގުރުއާނުގެ އާޔަތްތަކާ ހިލާފަށް އެބޭފުޅުން އެ ވާހަކަ ދައްކަވަމުން ގެންދަވަނީ. އަނިޔާވެރިކަމޭ ބުނެ، އެއީ އަދި ވެރިއަކާ ދެކޮޅަށް ނުކުމެވޭނެ ގޮތެއް ނޫން. ބޮޑެތި ދީނީ އިލްމްވެރިން މި ކަންކަމަށް ވަނީ ފޮތްލިޔެފައި،" ރަފާއު ވިދާޅުވި އެވެ.
އޭނާ އަދި ވިދާޅުވީ، ހިލާފުތަކާއި ފިތުނަ އުފެދިފައިވާ ޒަމާނެއްގައި އިލްމް ހޯދައި ކަންކަމުގައި އިސްލާމްދީން އޮންނަ ގޮތް އޮޅުން ފިލުވަން ޖެހޭނީ ރަނގަޅު މައުލޫމާތު ގެނެސްދޭ އިލްމްވެރިންގެ ކިބައިން ކަމަށެވެ. އަދި ހަދީސާއި ގުރުއާނުގެ އާޔަތްތައް ދޫކޮށް ދީނުގެ ނަމުގައި ވާހަކަތައް ދައްކާ މީހުންގެ ވާހަކަތައް އަޑު ނޭހުމަށް އެބޭފުޅުން ގޮވާލެއްވި އެވެ.
"އަޅުގަނޑުމެންގެ ނަސޭހަތަކީ ހަދީސްތަކާއި ރަސޫލާގެ ސުންނަތާއި ގުރުއާނުގެ މަގަށް ވަޑައިގަންނަވާށޭ. އެޔޭ އަޅުގަނޑުމެންނަށް އޮތް ގޮތަކީ. އެ ނޫން ގޮތެއް ނެތޭ،" ރަފާއު ވިދާޅުވި އެވެ.
އެބޭފުޅުންގެ ނަޒަރުގައި ވެރިއަކު ކުރާ ކަމަކާ ގުޅިގެން އޭނާ އަށް ނަސޭހަތް ދެވިދާނެ އެވެ. އެކަމަކު އެ ވާހަކަ ހިފައިގެން ނިކުމެ އާންމުކޮށް ދައްކައި ވެރިމީހާއަށް ނުކިޔަމަންތެރި ވުމަކީ ދީނުގައި އޮންނަ ގޮތެއް ނޫނެވެ. އަދި ވެރިކަމާ ދެކޮޅަށް ނުކުންނަ ބަޔަކާ ދެކޮޅަށް ވެރިއަކަށް ހަތިޔާރު ބޭނުންކޮށް އެ ބަޔަކު މައިތިރި ކުރުުމުގެ ބާރު ވަލިއްޔުލް އަމުރަށް އިސްލާމް ދީނުގައި ލިބޭ ކަމަށް ވެސް އެބޭފުޅުން ދެކިވަޑައިގެންނެވި އެވެ.
ދީނީ އިލްވެރިންތަކެއް އެބޭފުޅުންގެ ރައުޔު މިނެރުއްވީ، އިދިކޮޅު ފަރާތްތަކުން މާދަމާ ސަރުކާރު ބަދަލު ކުރުމަށް ބޮޑު މުޒާހަރާއެއް ބޭއްވުމަށް ތައްޔާރުވަމުން ދަނިކޮށެވެ. އަދި އެ މުޒާހަރާ އިސްކޮށް ކުރަނީ އަދާލަތު ޕާޓީ އިންނެވެ. އެ ޕާޓީ އިން ވަނީ މާދަމާގެ މުޒާހަރާއަށް ވީހާ ވެސް ގިނަ ބަޔަކު ނުުކުމެ، އަނިޔާވެރިކަން ނިންމާލުމަށް ގޮވާލައިފަ އެވެ.
