އެނބޫދޫ ލެގޫންގެ ފިހާރަތައް ކުއްޔަށް ދޫކުރަން ފަށަނީ

އެކި ފަންތީގެ ހޮޓާތަކާއި ރެސްޓޯރެންޓްތައް ހުންނަ، އެނބޫދޫ ލެގޫނުގައި ހަދާ ރީޓެއިލް ފިހާރަތައް ކުއްޔަށް ދޫކުރުމަށް މިމަހު ހާއްސަ އިވެންޓެއް ބާއްވަން ނިންމައިފި އެވެ.

ތައިލެންޑުގެ ތިންވަނައަށް އެންމެ ބޮޑު ކުންފުނި ކަމަށްވާ ސިންގްހާ އެސްޓޭޓުން ބުނި ގޮތުގައި އެނބޫދޫ ލެގޫންގައި ތަރައްގީ ކުރާ ރީޓެއިލް އަދި ކޮމާޝަލް ފިހާރަތައް ކުއްޔަށް ދޫކުރުމަށް މިމަހުގެ 17 ވަނަ ދުވަހު ނޭޝަނަލް އާޓްގެލަރީގައި ހާއްސަ އިވެންޓެއް އޮންނާނެ އެވެ. އަދި އެކަމަށް ޝައުގުވެރިވާ ފަރާތްތަކުން އެޕޮއިންޓްމަންޓް ހެއްދުމުގެ ފުރުސަތު ވަނީ ހުޅުވާލާފަ އެވެ.

ފިޔަވަހި ތަކަށް ބަހާލައިގެން ތަރައްގީ ކުރާ އެނބޫދޫ ލެގޫންގެ މަޝްރޫއުގެ ދަށުގެ ދަށުން ހަދާ، އިންޓަލޭޝަނަލް ފްރެންޗައިޒް ރެސްޓޯރެންޓް "ހާޑްރޮކް" ގެ ރެސްޓޯރެންޓް މި އަހަރު ހުޅުވާނެ އެވެ.

ސިންގްހާ އެސްޓޭޓުގެ ޗީފް މާކެޓިން އޮފިސަރު ކިޓްސަނަން ކިޓަރަމަޔަޓްރެޕަމަޑެޖް ވިދާޅުވެފައިވާ ގޮތުގައި މަޝްރޫއުގެ ފުރަތަމަ ފިޔަވަހި މިއަހަރު ނިމޭނެ އެެވެ. އެގޮތުން މިއަހަރު ނިމޭނީ ސަހަރު ކަމަށާއި ދެވަނަ ފިޔަވަހީގެ މަސައްކަތް ކުރިއަށް އޮޮތް ފަަސް އަހަރު ދުވަހުގެ ތެރޭގައި ނިމޭނެ ކަމަށެވެ.

އެ ކުންފުނިން ބުނެފައިވާ ގޮތުގައި ބިލިއަނެއްހާ ޑޮލަރުގެ ބިޔަ މަޝްރޫއުގެ ދަށުން، 7،000 ވަޒީފާގެ ފުރުސަތު ހުޅުވޭނެ އެވެ. އަދި މިތަން ވެގެންދާނީ ދިވެހިންނަށް ރަނުގެ ފުރުސަތުތަކެއް ހުޅުވިގެންދާނެ ތަނަކަށެވެ.

ރާއްޖޭގެ ޓޫރިޒަމް 44 އަހަރުވީ ތާރީހުގައި ހިންގާ އެންމެ ބިޔަ މަޝްރޫއުގެ ދަށުން، ވަކިވަކި ލައިފްސްޓައިލް ކޮންސެޕްޓްތަކަށް ނުވަ ރަށެއް ތަރައްގީކުރާނެ އެވެ. މި މަޝްރޫއުގެ ދަށުން ފުރަތަމަ ފިޔަވަހީގައި ތިން ރަށެއް ތަރައްގީކުރާއިރު މި ތަންތަނަށް 311.5 މިލިއަން އެމެރިކާ ޑޮލަރު (ގާތްގަނޑަކަށް 4.8 ބިލިއަން ރުފިޔާ) އިންވެސްޓް ކުރާނެ އެވެ. މި މަޝްރޫއުގެ ދަށުން ހިންގާ ރިސޯޓުތަކުގައި ޖުމުލަ 1،300 ކޮޓަރި ހުންނާނެ އެވެ. އަދި މި މަޝްރޫއާއެކު 7،000 ވަޒީފާގެ ފުރުސަތު އުފެދޭނެ ކަމަށް އެ ކުންފުނިން ބުނެފައިވެ އެވެ.

ވެލާނާ އިންޓަނޭޝަނަލް އެއާޕޯޓުން ފުރައިގެން ސްޕީޑް ލޯންޗުގައި 10 މިނެޓުން ދެވޭ ރާސްތާގައި ތަރައްގީ ކޮށްފައިވާ އެނބޫދޫ ލެގޫން މަޝްރޫއު ތަރައްގީކުރަނީ 3،000 ކޮޓަރި ހުންނާނެ ގޮތަށެވެ.