ކުރީގެ ނައިބު ރައީސް އަހުމަދު އަދީބަށް ބޭސްފަރުވާ އަށް ފުރުސަތު ފަހިކޮށް ދިނުމަކީ ދައުލަތުގެ މައްޗަށް ލާޒިމް ކަމެއް ކަމަށް ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ކަނޑައަޅާފައިވާ މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާން ވިދާޅުވެއްޖެ އެވެ.
ސނާން ކުރެއްވި ޓްވީޓެއްގައި ވިދާޅުވީ، އަދީބުގެ ބޭސްފަރުވާ އަށް ފުރުސަތު ފަހިކޮށް ދިނުމަކީ ދައުލަތުގެ މައްޗަށް އޮތް އިހުތިޔާރެއް ނޫން ކަމަށާއި އެކަމަކީ މިހިނދުން މިހިނދަށް ދައުލަތުގެ މައްޗަށް ލާޒިމް ކަމެއް ކަމަށެވެ. އަދި ވިދާޅުވީ، އަނެކާގެ މައްޗަށް އިހުސާންތެރިވުމަކީ ނިކަމެތިކަމުގެ ސިފައެއް ކަމަށް ދެކިގެން ނުވާނެ ކަމަށެވެ.
ސިނާންގެ އިތުރަށް ކުރީގެ ރައީސް މައުމޫން އަބުދުލްގައްޔޫމާއި ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި މަޖިލީހުގެ އެހެން ވެސް މެންބަރުން ވަނީ އަދީބުގެ ދިފާއުގައި ޓްވީޓެއް ކުރައްވާފަ އެވެ. ރައީސް ނަޝީދު ވިދާޅުވީ، އެކަށީގެންވާ ބޭސްފަރުވާ އަދީބަށް ފޯރުކޮށްދޭން ޖެހޭނެ ކަމަށެވެ. އެކަން ލަސްކުރުމަކީ ލާއިންސާނީ އަމަލެއް ކަމަށް ނަޝީދު ވަނީ ސިފަކުރައްވައިފަ އެވެ.
ބޭސްފަރުވާ ނުލިބިގެން އަދީބު ސިވިލް ކޯޓަށް ހުށަހެޅި މައްސަލަ ޑިސްޕިއުޓް މަރުހަލާގައި ހައްލުނުވުމުން ޝަރީއަތަށް ފޮނުވާފައިވާއިރު މައްސަލާގެ ލިޔެކިޔުންތައް ބަދަލުކުރުމަށް މިދިޔަ ބުރާސްފަތި ދުވަހު އަޑުއެހުމެއް ބޭއްވި އެވެ. އެ އަޑުއެހުމުގައި ދައުލަތުން ވަނީ އިޖުރާއީ ނުކުތާއެއް ނަގާފަ އެވެ. އަދީބުގެ ދައުވާއަށް ޖަވާބުދާރީނުވެ، ދައުލަތުން އެދުނީ އެ މައްސަލައަކީ ކުރިއަށް ނުގެންދެވޭނެ މައްސަލައެއްގެ ގޮތުގައި ކަނޑައަޅައިދިނުމަށެވެ.
އެކަމާ ގުޅިގެން ޖަވާބުދާރީވުމަށް އަދީބަށް ފުރުސަތު ދިނުމުގެ ގޮތުން އެ އަޑުއެހުން ނިންމާލައި އެހެން އަޑުއެހުމެއް ވަނީ ތާވަލުކޮށްފަ އެވެ.
އެ ދުވަހު އަދީބު މާލެ ގެންނެވިއިރު އެމަނިކުފާނުގެ ބޯ ހުރީ ވަރަށް ތުނިކޮށް ކޮށާފަ އެވެ. މީގެކުރިން ދިގު އިސްތަށިގަނޑެއް އޮތް އަދީބު ބޯ ބާލާފައިވަނީ ސިއްހީ ހާލު ގޯސްވެ، އުނދަގޫތަކެއް ވާތީ ކަމަށް އޭނާގެ ވަކީލް މޫސާ ސިރާޖު ވިދާޅުވެފައިވެ އެވެ.
ތިރީސް ތިން އަހަރުގެ ޖަލު ހުކުމެއް އައިސްފައިވާ އަދީބަށް ލޮލުގެ ބައްޔެއް ކަމަށްވާ ގުލައުކޯމާ ޖެހިފައިވާ ކަމަށް ޑޮކްޓަރުން ވަނީ ބުނެފަ އެވެ. އޭގެ އިތުރުން ސިއްހީ މައްސަލައެއް ކަމަށްވާ "ކެޓެރެކްޓް" އަދީބުގެ ލޮލަށް ޖެހިފައިވާ ކަމަށް ވެސް ވަނީ ބުނެފަ އެވެ. މީގެއިތުރުން އަދީބުގެ އެތެރެ ހަށީގައި ސިސްޓެއް އުފެދިފައިވުމާއި ކިޑްނީގައި ހިލަ އުފެދިފަ އެވެ.
އަދީބުގެ ވަކީލް ކުރިން ވިދާޅުވެފައިވާ ގޮތުގައި، ކޯޓަށް ހުށަހެޅި މައްސަލާގައި އަދީބަށް ރާއްޖެއިން ކުރެވެން ނެތް ފަރުވާތަކަށް ބޭރަށް ފޮނުވައިދިނުމުގެ އަމުރަކަށް ވަނީ އެދިފަ އެވެ.
އަދީބު ބޭސްފަރުވާއަށް ބޭރަށް ދިޔުމުގެ ހުއްދަ ދިނުމަށް ސަރުކާރުން ވަނީ ދެކޮޅު ހަދާފަ އެވެ. ސަރުކާރުން ބުނަނީ އަދީބަށް ބޭރަށް ވަޑައިގެންނެވީ ދައުލަތަށް ދައްކަންޖެހޭ ފައިސާތައް ދެއްކުމަށްފަހު ކަމަށެވެ. ނަމަވެސް މިހާތަނަށް އަދީބުގެ މައްޗަށް ފައިސާތަކެއް ދެއްކުމަށް އެއްވެސް ހުކުމެއް ކޮށްފައެއް ނުވެ އެވެ. އެމްއެމްޕީއާރްސީ ހިޔާނާތުގެ މައްސަލާގައި އަދީބުގެ މައްޗަށް ޖިނާއީ ދައުވާތަކެއް ސާބިތުވެ މިހާރު ވެސް އިތުރު ދައުވާތަކެއް ހިންގަ އެވެ. ނަމަވެސް އެއިން އެއްވެސް މައްސަލައެއްގައި މަދަނީ ދައުވާއެއް ނުކުރެ އެވެ. މިހާރު ގާނޫނު އޮތް ގޮތުން ހިޔާނާތުގެ ފައިސާ ހޯދާނީ ވަކިން މަދަނީ ދައުވާކޮށްގެންނެވެ.