އެމެރިކާގައި ރަސޫލާ އަށް ކާޓޫނު ކުރެހުމުގެ މުބާރާތެއް ކުރިއަަށް ގެންދާ ތަނެއްގެ ބޭރުގައި ދެ މީހަކު ބަޑިން ހަމަލާ ދިނުމާ އެކު އެ މީހުންނަށް ހަމަލާދީ މަރާލައިފި އެވެ.
ފުލުހުން ބުނީ މުބާރާތް ކުރިއަށް ގެންދިޔަ ތަނުގެ ބޭރުގައި ހުރި ގާޑަކަށް ބަޑީގެ ހަމަލާތަކުގައި ޒަހަމްތަކެއް ލިބިފައިވާ ކަމަށާއި މުބާރާތް ބޭއްވި ތަނުގައި ތިބި މީހުން މިހާރު އެތަނުން ނެރެފައިވާ ކަމަށެވެ.
ރަސޫލާ އަށް ކާޓޫނު ކުރެހުމުގެ މި މުބާރާތް އިންތިޒާމް ކުރަނީ އިސްލާމް ދީނާ ދެކޮޅު ކެމްޕޭނުތައް ވަރަށް ފާޅުގައި ހިންގަމުންދާ އެމެރިކަން ފްރީޑަމް ޑިފެންސް އިނިޝިއޭޓިވް އިންނެވެ. މި އިވެންޓުގައި، އިސްލާމް ދީނާ ދެކޮޅަށް ފިލްމު ހެދި ހޮލެންޑުގެ ސިޔާސީ މީހެއް ކަމަށްވާ ގީޓް ވައިލްޑާސް ވެސް ބައިވެރިވެ އެވެ.
ރަސޫލާ އަށް ނިސްބަތްކޮށް "އެންމެ މޮޅު" ކާޓޫނު ކުރަހާ މީހަކަށް 10000 ޑޮލަރު ދޭ މި މުބާރާތް ކުރިއަށް ދަނިކޮށް ބަޑި ޖެހީ ކާރެއްގައި ދުއްވާފައި ދިޔަ ދެ މީހަކު ކަމަށް ފުލުހުން ބުންޏެވެ. އެ މީހުންގެ ހަަމަލާގެ ސަަބަބުން ޒަހަމްވި ގާޑަށް ސީރިއަސް ޒަހަމެއް ނުލިބެ އެވެ. ހަމަލާތަށް ދިން އިރު، އިމާރާތުގެ ތެރޭގައި 75 މީހަކު ތިބި ކަމަށްވެ އެވެ. ފުލުހުން މިހާރު ވަނީ މުޅި ސަރަހައްދު ބަންދުކޮށްފަ އެވެ.