މިނިވަންވިތާ ދެ ދުވަސްވިތަނާ އަނެއްކާވެސް ޖަލަށް ދާން ޖެހުމުން ދިއްގަރު ދާއިރާގެ މެންބަރު އަހުމަދު ފާރިސް މައުމޫން، އޭނާގެ ސަޕޯޓަރުންނަށް މެސެޖެއް ދެއްވައިފި އެވެ. އޭނާ ހައްޔަރުކޮށްގެން ގެންދިޔަ ވަގުތު އެންމެންނަށް އިޝާރަތް ކުރައްވާ އެދިވަޑައިގަތީ ހިތްވަރު ކުރުމަށެވެ.
ފާރިސް ދިރިއުޅުއްވާ ގެއަށް ފުލުހުން ވަދެ ތިއްބާ، ނޫސްވެރިންނާ ބައްދަލު ކުރައްވާ ވެސް ފާރިސް ވަނީ މެސެޖެއް ދެއްވާފަ އެވެ. ފާރިސް ވިދާޅުވީ، ގައުމު އިސްލާހުކުރުމަށާއި އޭނާއަށް ދިމާވާ ކަންކަމުގައި އޭނާއަށާއި އާއިލާއަށް ހިތްވަރު ދޭ އެންމެންނަށް ޝުކުރު އަދާކުރާ ކަމަށެވެ. އަދި އެގޮތުގައި އަބަދުވެސް ދެމި ތިބުމަށް އެދިވަޑައިގަންނަވާ ކަމަށެވެ.
"އަޅުގަނޑު މާތްﷲގެ އިރާދަފުޅުން ވަރުގަދަކޮށް މިކަމުގައި ހުންނާނެ ވާހަކަ ދަންނަވަން،" ފާރިސް ވިދާޅުވި އެވެ.
ފާރިސް ވިދާޅުވީ، ގައުމު އިސްލާހުކުރުމަށް އެންމެން ވެސް މަސައްކަތް ފަށަންޖެހޭ ކަމަށެވެ. ރާއްޖޭގައި ކަންކަން ހިނގަމުން ދަނީ ހަމަ މަގުން ނޫންކަން މިހާރު ކުދި ބޮޑު އެންމެންނަށް ވެސް ސާފުކޮށް އެނގޭނެ ކަމަށެވެ. ކަންކަން އެހެން ދާއިރު ތިމަންނައަށް ވަރިހަމައޭ ބުނާ މީހުންގެ އަދަދު ވެސް މަދުވެފައިވާ ކަމަށެވެ.
ކޮންމެ މީހަކު ވެސް އެމީހަކަށް ކުރެވުނު ވަރަކުން އިސްލާހަށް މަސައްކަތް ކުރަންޖެހޭ ކަމަށާއި، އެއީ ހަމައެކަނި އެކަމަށް އެދި ދުއާކުރުން ކަމަށް ވެސް ވެދާނެ ކަމަށް ފާރިސް ވިދާޅުވި އެވެ. ކަންކަން ނިންމާ އިސް މަގާމުގައި ތިއްބަވާ ބޭފުޅުން ވެސް އޭރުން އިސްލާހީ މަސައްކަތް ފަށަން މަޖުބޫރުވާނެ ކަމަށެވެ.
"ދިވެހި ރައްޔިތުން ކުރާ އުއްމީދުތައް އަބަދުވެސް ނަގަންވާނީ ތިރިން މައްޗަށް، މަތީގަ ތިބި މީހުންނަށް ނުފެންނާނެ،" ފާރިސް ވިދާޅުވި އެވެ.
ފާރިސް ވިދާޅުވީ މިހާރު ފެނިގެން ދަނީ މައްޗަށް ތިބޭ މީހުން އަމުރުކުރާ ގޮތަށް "ރޮބަޓުން"ގެ ގޮތުގައި މަސައްކަތް ކުރަމުންދާ މަންޒަރު ކަމަށެވެ. އެހެންނަމަވެސް އޭނާ މިނިވަންވެގެންވީ ދެ ދުވަހު ވެސް ކަންކަން ބަދަލުވާނެ ކަމަށް އެތައް ބަޔަކަށް އުއްމީދު ލިބިގެން ދިޔަ ކަމަށެވެ. އެ އުއްމީދު ގެއްލުވާނުލުމަށް އުއްމީދު ކުރައްވާ ކަމަށެވެ.