ދިއްގަރު ދާއިރާގެ މެންބަރު ފާރިސް މައުމޫންގެ ބަންދުގެ އަމުރު ނެރުނު ފަނޑިޔާރު، ބަންދުގެ ސައްހަ ކަމާމެދު ގޮތް ނިންމުމަކީ ގާނޫނީ ގޮތުން ބަލާއިރު، މަސްލަހަތަށް ފުށުއަރާ ކަމެއް ކަމަށް ފާރިސްގެ ގާނޫނީ ވަކީލުން ވިދާޅުވެއްޖެ އެވެ.
ފާރިސްގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އެނާގެ ބަންދަށް ކޯޓުން ވަނީ 15 ދުވަސް ޖަހާފަ އެވެ. ފާރިސް 15 ދުވަހަށް ބަންދުކުރަން އަމުރު ނެރުނީ އޭނާ ހައްޔަރުކުރުމަށް ވެސް ފަތިހު ގަޑީގައި އަމުރު ނެރުއްވި ގާޒީ ހުސައިން ޝަހީދެވެ.
ނޫސްވެރިންނާއި ބައްދަލު ކުރައްވައި ފާރިސްގެ ގާނޫނީ ވަކީލް މައުމޫން ހަމީދު ވިދާޅުވީ، ކޯޓަށް އެންމެ ފުރަތަމަ ހުށަހެޅީ އަމުރު ނެރުނީ ގާނޫނާ ހިލާފަށް ކަމަށާއި ގާނޫނީ އިޖުރާތާ ހިލާފަށް ކަމަށެވެ. ނަމަވެސް އެކަން ނިންމަވަން އިންނެވި ފަރާތަކީ އަމުރު ނެރުއްވި ފަނޑިޔާރު ކަމަށް މައުމޫން ވިދާޅުވި އެވެ.
މައުމޫން ވިދާޅުވީ، އަމުރު ނެރޭ ފަރާތުން އޭގެ ސައްހަ ކަމާމެދު ގޮތެއް ނިންމަން އިންނެވުމަކީ ގާނޫނީ ގޮތުން ބަލާނަމަ މަސްލަހަތައް ފުށޫ އަރާ ކަމެއް ކަމަށެވެ. އަދި ވިދާޅުވީ، ނަމަވެސް އެކަމުގައި ފަނޑިޔާރު ނިންމެވީ މަސްލަހަތަށް ފުށުއަރާ ކަމެއް އަމުރުގައި ނެތް ކަމަށާއި ގާނޫނާ ހިލާފު އެއްވެސް ކަމެއް ނެތް ކަމަށެވެ.
"ބަންދުގެ އަމުރު ނެރުނު ފަނޑިޔާރު މި އިންނެވީ ބަންދުގެ ސައްހަކަމާމެދު ގޮތް ނިންމަވަން، މީގައި މަސްލަހަތު ފުށުއެރުމުގެ މައްސަލައެއް އެބަ އުޅުއްވާ ކަމަށް ގާނޫނު ގައިވެސްބުނޭ، އެންމެ ފުރަތަމަ ކަނޑަ އަޅުއްވަން ޖެހޭނީ ފާރިސް ހައްޔަރުކޮށްފައިވަނީ ގާނޫނާ އެއްގޮތްވާ ގޮތުގެ މަތިންތޯ ނުވަތަ ނޫންތޯ، އަޅުގަނޑުމެން ހުށަހެޅި އަމުރު ނެރުނީ ގާނޫނާ ހިލާފަށޭ، ގާނޫނީ އިޖުރާތާ ހިލާފޭ، ނަމަވެސް އެކަން ނިންމަވަން މި އިންނެވީ އަމުރު ނެރުއްވި ބޭފުޅާ،" މައުމޫން ވިދާޅުވި އެވެ.
މައުމޫން ވިދާޅުވީ، ދައުލަތުން އަސާސީ ބައެއް ކަންތައްތައް ގާނޫނީ ހަމަތައް، އެނޫން ގޮތަކަށް ކޯޓަށް ދައްކަން މަސައްކަތް ކުރި ކަމަށާއި އެގޮތުން ޕްރޮސެކިއުޓާ ޖެނެރަލް (ޕީޖީ) އިން ބުނެފައިވަނީ އެހެން މައްސަލައެއް ހިނގާތީވެ ފާރިސް އަކީ ކުށުގެ ރިކޯޑެއް އޮތް މީހެއް ކަމަށެވެ، އެއީ ގާނޫނީ ހަމައެއް ނޫން ކަމަށާއި އެކަން ޕީޖީ އަށްވެސް އިނގޭނެ ކަމަށެވެ. ނަމަވެސް ޕީޖީން ބޭނުންވީ ފާރިސްގެ ބަންދު އިތުރުކުރަން ކަމަށް މައުމޫން ވިދާޅުވި އެވެ.
"ޕީޖީން ބުނެފައިވަނީ އެހެން މައްސަލައެއް ހިނގާތީވެ ބެލެވެން ޖެހޭނޭ މީ ކުށުގެ ރިކޯޑެއް އޮތް މީހެއް ކަން، އެކަމާ ކަންބޮޑުވަން އަދި ކުށްވެރިވެސް ކުރަން، އެއީ ގާނޫނީ ހަމައެއް ނޫން އެކަން ޕީޖީ އަށްވެސް އިނގޭނެ އެކަމަކު ބޭނުންވަނީ ކޮންމެ އެއްޗެއް ވިދާޅުވެގެން ވެސް ފާރިސްގެ ބަންދު އިތުރުކުރަން، ފެށިފައިނުވާ ޝަރީއަތެއް ނިމިފައިނުވާ ތަހުގީގެއްގެ މައްޗަށް ބިނާކޮށް ބަންދުގެ މުއްދަތު އިތުރުކުރުމަށް،" މައުމޫން ވިދާޅުވި އެވެ.
ފާރިސްގެ އަނެއް ގާނޫނީ ވަކީލް ހުސެން ޝަމީމް ވިދާޅުވީ، ގާނޫނާ ހިލާފަށް ވެރިކަން ވައްޓައިލަން ރޭވި ކަމުގެ ތުހުމަތުކޮށް ފާރިސް ހައްޔަރުކޮށްފައިވަނީ ކޮން އަމަލެއްގެ ސަބަބުން ކަމެއް ޕީޖީން ކޯޓުގައި ފާހަގަކޮށްފައިނުވާ ކަމަށެވެ. އަދި އެކަމާ ގުޅޭގޮތުން ޕީޖީއާ ސުވާލު ކުރުމުން ވިދާޅުވީ މިކަމަކީ މުޅިން އާ މައްސަލައެއް ކަމަށާއި އެކަމެއް ހިނގާފައިވަނީ މިދިޔަ މޭމަހުގެ ތެރޭގައި ކަމަށެވެ. ނަމަވެސް އެދުވަހެއް ހާމަ ކޮށްފައިނުވާ ކަމަށް ޝަމީމް ވިދާޅުވި އެވެ.
"މިއީ މުޅިން އާކަމެއް ކަމަށް ޕީޖީން ބުނަނީ، އެކަމެއް ހިނގާފައިވަނީ މިދިޔަ މޭމަހުގެ ކޮންމެސް ދުވަހެއްގައި، ވާހަކައިން އެނގިފައިވަނީ އެބޭފުޅުންނަށް ލިބިފައިވަނީ މައްސަލަ ހުށަހެޅި ފަރާތުގެ ބަޔާނެއް އެކަނިކަން،" ޝަމީމް ވިދާޅުވި އެވެ.
ޝަމީމް ވިދާޅުވީ، ފުލުހުންނަށް ކޯޓުން ސުވާލު ކުރެއްވުމުން ވިދާޅުވެފައިވަނީ ފާރިސްގެ ބަލާ ފާސްކުރި އިރު އިތުރު އެއްވެސް އެއްޗެއް ފެނިފައިނުވާ ކަމަށެވެ. އަދި މައްސަލައާ ގުޅޭ އެއްވެސް އިތުރުހެއްކެއް ވެސް އަތުގައި ނެތް ކަމަށެވެ، އެކަމުންވެސް އިނގެނީ ފުލުހުންގެ އަތުގައި އޮތީ މައްސަލަަ ހުށަހެޅި ފަރާތުގެ ބަޔާނެއް އެކަނި ކަމަށް ޝަމީމް ވިދާޅުވި އެވެ.
"މައްސަލަ ހުށަހެޅީ ސިއްރު ހެއްކެއްގެ ބަޔާނުން ކަމަށް، ނަމަވެސް ޝަރީއަތުގެ މައްސަލަ ފެށުމުގެ ކުރިން އެއީ ސިއްރު ހެއްކެއްގެ ގޮތުގައި ގާނޫނީ ގޮތުން ބަލައެއް ނުގަނެވޭނޭ، އެހެން ބުނުމުން ޕީޖީން ވިދާޅުވީ އެއީ މައްސަލަ ހުށަހެޅި ފަރާތޭ، މިހާރު އިނގޭ އެއީ އެކެއް ކަން،" ޝަމީމް ވިދާޅުވި އެވެ.
އޭނާ އިތުރަށް ވިދާޅުވީ، ފާރިސްގެ ޝަރީއަތް ސިއްރުން ކުރިއަށް ގެންދަތީ ކަންބޮޑުވާ ކަމަށާއި ސިއްރުން ޝަރީއަތް ކުރިއަށް ގެންދަނީ ކޮން މަސްލަހަތެއް ރައްކާ ކުރުމަށް ކަމެއް ސާފު ނުވާ ކަމަށެވެ. އަދި ގާނޫނު އަސާސީން ކަށަަރި ކޮށްދީފަވާ އަސާސީ އެއް ހައްގަކީ ހާމަ ކަމާއެކު ޝަރީއަތް ކުރެވުން ކަމަށާއި ހާމަކަން ބޮޑު ގޮތެއްގައި ޝަރީއަތް ކުރިއަށް ގެންދާނަމަ އިންސާފު ގާއިމް ކުރުމުގެ ފުރުސަތު ބޮޑު ކަމަށް ޝަމީމް ވިދާޅުވި އެވެ.