މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ފެލިވަރުގައި ތަރައްގީ ކޮށްފައިވާ ފެލިވަރު ޕައުޗް ފެކްޓްރީ ނިމި، ޕައުޗް ބަންދު ކުރަން ފަށަން ތައްޔާރު ވެއްޖެ އެވެ. -- މިއީ ކުދި މަސް ޕެކްޓް ބަންދު ކުރުމެވެ.
މިފްކޯގެ މެނޭޖިން ޑިރެކްޓަރު އަދްލީ އިސްމާއިލް "އަވަސް" އަށް އިއްޔެ ދެއްވި އިންޓަވިއުއެއްގައި ވިދާޅުވީ ޕައުޗް ޕްލާންޓް ނިމިފައިވާ ކަމަށާ، ކުންފުނިން މިހާރު ތައްޔާރު ވަމުން އަންނަނީ ޕްރޮޑަކްޓް ބަންދު ކުރަން ފެށުމަށެވެ.
"މިހާރު ސާމްޕަލް ވެސް ބަންދު ކޮށްފި. ޕެކިން މެޓީރިއަލްސް ދެން ޖެހެނީ ގެންނަން. އޯޑަރު ނަގާއިރު ބޭނުންވާ ސްޕެސިފިކޭޝަންއެއްގައި ކުރަން ޖެހޭނީ. އެހެންވެ، އެ މެޓީރިއަލް ގެނައުމުގެ މަސައްކަތް މި ކުރަނީ،" އަދްލީ ވިދާޅުވި އެވެ.
އޭނާ ވިދާޅުވީ މިފްކޯއަކީ ދިވެހިންގެ 100 ޕަސެންޓް ކުންފުންޏަކަށްވާއިރު އެ ގޮތަށް ކުންފުނި އޮވެ، އިތުރު އިންވެސްޓްމަންޓްތައް ވެސް ކުރަމުންދާނެ ކަމަށެވެ.
މިފްކޯ އިން އިތުރު އިންވެސްޓްމަންޓްތައް ކުރަން ފަށާފައިވާއިރު، ސަރުކާރުން ވަނީ މިފްކޯ، ސްޓޭޓް ޓްރޭންޑިން އޮގަނައިޒޭޝަން (އެސްޓީއޯ) ގެ ދަށަށް ގެންގޮސްފަ އެވެ. މި ބަދަލު ގެނައިއިރު އެ ކުންފުނި ވަނީ ގިނަ ބަޔަކަށް ދަރާފަ އެވެ. ނަމަވެސް މިހާރު ފައިދާވާން ފަށާފައިވާ ކަމަށް އެސްޓީއޯއިން ވަނީ ބުނެފަ އެވެ.
މިފްކޯ އިން ވަނީ ފެލިވަރު ތަރައްގީ ކުރަން ބޮޑު އިންވެސްޓްމަންޓެއް ވެސް ކޮށްފަ އެވެ. މި ބަދަލާއެކު، ފެލިވަރު ކާރުހާނާގެ ފެންވަރު މަތިކޮށް އަލުން ހުޅުއިރު، މި ތަނުގައި މިހާރު 50 ޓަނު މަސް ބަންދުކުރެވެ އެވެ. އަދި މީގެ ތެރެއިން 15 ޓަނު ޕައުޗުގައި ބަންދު ކުރަން ވަނީ ނިންމާފަ އެވެ.