ސިޔާސީ ބޭފުޅުން ނިންމަވާ ނިންމެވުންތަކާ ގުޅިގެން އޭގެ އަސަރު ރައްޔިތުންނަށް ކޮށްފައިވާނަމަ، ފަހުން އެކަމާމެދު ރައްޔިތުންގެ ކިބައިން މާފަށް ނޭދެވޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވީ، ކުރީގެ ދެ ރައީސުން ކަމަށްވާ މުހައްމަދު ނަޝީދާއި މައުމޫން އަބްދުލް ގައްޔޫމަށް އިޝާރަތް ކުރައްވާ ކަމަށް ބެލެވެ އެވެ. އެ ދެ ބޭފުޅުން ވަނީ އެއް ބޭފުޅަކު އަނެއް ބޭފުޅަކަށް މާފަށް އެދިވަޑައިގެނއ އެކުގައި މަސައްކަތްޕުޅު ކުރެއްވުމަށް އަތު ގުޅާލައްވާފަ އެވެ.
އޭގެ އިތުރުން ރައީސް ނަޝީދުގެ ސަރުކާރު ގެނައުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެހެން ބޭފުޅުން ވެސް މަސައްކަތް ކުރެއްވުމަށްފަހު ފަހުން ވަނީ އެކަމަށް މާފަށް އެދިވަޑައިގެންފަ އެވެ. ފަހުން ރައީސް ޔާމީންގެ ސަރުކާރު ގެންނަން ތާއީދު ކުރެވުނީތީ ވެސް ގާސިމް އިބްރާހިމާއި ރައީސް މައުމޫން މާފަށް އެދިވަޑައިގެންފައިވެ އެވެ. ރައީސް ޔާމީން ވިދާޅުވި ގޮތުގައި، އެފަދަ ކަންކަމަކީ ރައްޔިތުންގެ ކިބައިން މާފަށް އެދެވޭނެ ކަންކަމެއް ނޫނެވެ.
"އޭރު އެއް ދާން ކުރި ސިޔާސީ ލީޑަރުންނަށް މިހާރު ވިދާޅެއް ނުވެވޭނެ ދިވެހި ރައްޔިތުންގެ ކުރިމަތީގަ ތިމަންނަމެންނަށް މާފު ކުރާށޭ، ތިމަންނަމެންނަށް ހެދުނީ ގޯހެކޭ، ސިޔާސީ މީހުން ނިންމާ ނިންމުމާމެދު ރައްޔިތުންނަށް އަސަރު ކުރާ ނަމަ އޭގެ ޒިންމާ ފުރިހަމައަށް އުފުލަން ޖެހޭނެ، އެއަކީ މާފު ކުރާނެ ކަމެއް ނޫން، އެއަކީ މާފަށް އެދެވޭނެ ކަމެއް ވެސް ނޫން، އެހެންވީމަ އެކަން އެނގި ތިބެ އޭރު ވެރިކަމަށް ގެނައީ،" ރައީސް ޔާމީން ވިދާޅުވި އެވެ.
ރައީސް ޔާމީން، ރައީސް ނަޝީދުގެ ސަރުކާރު ގެންނަން އެތައް މަސައްކަތެއް ކޮށް އެ ސަރުކާރުން ވެރިކަމަށް ގެނައުމުން ހިންގީ މުޅިން ވެސް ޖަރީމާ ކަމަށެވެ. އެފަދަ ބައެއްގެ ފަރާތުން ހިތްވާރާއި ބުންވަރު ނަގައިގެން މިހާރު އަނެއްކާ ވެސް މަސައްކަތް ކުރުމުން ގައުމު މިސްރާބު ދާނެ އަމާޒު އެނގިވަޑައިގަންނަވާ ކަމަށެވެ. އެއަށް ޖާގަ ރައްޔިތުން ދީގެން ނުވާނެ ކަމަށް ވެސް ވިދާޅުވި އެވެ.
ރޭގެ ޖަލްސާގައި ވާހަކަފުޅު ދައްކަވަމުން ރައީސް ވަނީ އިދިކޮޅު ލީޑަރުންނަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން ކުރީގެ ރައީސް މައުމޫނަށް ނިސްބަތް ކުރައްވާ، "އެއްވެސް މީހަކަށް ގާނޫނުން މަތީގައި ނުހުރެވޭނެ" ކަމަށް ވިދާޅުވި އެވެ.
ކުރީގެ ރައީސް މުހައްމަދު ނަޝީދުގެ ވެރިކަން ރައީސް ޔާމީން ސިފަ ކުރެއްވީ، "ޖަރީމާތައް ހިންގި، މުއައްސަސާތައް ހިސޯރު ކޮށްގެން އުޅުނު ވެރިކަމެއް" ގެ ގޮތުގަ އެވެ. އިދިކޮޅު އަނެއް ލީޑަރު ގާސިމް އިބްރާހިމް، ދައުލަތަށް އެތައް ފައިސާއެއް ނުދައްކާ ހުރިކަން ފާހަގަ ކުރައްވާ އެ ފައިސާތައް ހޯދުމަށް ކުރެވެން ހުރި ހުރިހާ ކަމެއް ކުރައްވާނެ ކަމުގެ ޔަގީންކަން ރައީސް ދެއްވި އެވެ.
މި ސަރުކާރު އައިއިރު ރާއްޖެ އޮތީ ނަމާންކަމާއި ބިރުވެރި ކަމެއްގަކަން ފާހަގަ ކުރައްވައި ރައީސް ޔާމީން ވިދާޅުވީ، މިއަދުގެ ސަރުކާރު މައްސަލައަކަށް ވަނީ ގާނޫނު ތަންފީޒު ކުރާތީ ކަމަށެވެ. "ކެކުރިއަކީ ބޮޑު ކެކުރިއެއްތޯ ނުވަތަ ބޮޑު ކެކުރި އިތުރަށް ބޮޑު ކުރުމަށް" އެމަނިކުފާނު ފުރުސަތު ނުދެއްވާނެ ކަމަށް ވެސް ރޭ ވިދާޅުވި އެވެ.