ސުޕްރީމްކޯޓުން ނެރުނު އަމުރު ތަންފީޒު ކުރުމުގެ ކުރިން ބަލަން ޖެހޭ ކަންތައްތަކެއް ހުރި ކަމަށް ބަންޑާރަ ނައިބު މުހައްމަދު އަނިލް ވިދާޅުވުމަކީ ކޯޓު އަމުރަށް ނުކުރިމަންތެރި ވެވަޑައިގެންނެވުން ކަަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކ އެކި ހުކުމްތައް ކޮށް ޖަލަށް ލާފައިވާ ސިޔާސީ ބައެއް ލީޑަރުން މިނިވަން ކުރުމަށް އަންގައި ސުޕްރީމް ކޯޓުން ނެރުނު އަމުރާ ގުޅޭ ގޮތުން ސަރުކާރުން ދާދި ދެންމެ ބޭއްވި ނޫސްވެރިންގެ ބައްދަލުވުމެއްގައި އަނިލް ވިދާޅުވީ އެ އަމުރަކީ ސުޕްރީމްކޯޓުގެ އަމުރެއްތޯ ބަލަމުން އަންނަ ކަމަށެވެ.
ރާއްޖެ ޓީވީއަށް ދެއްވި އިންޓަވިއުއެއްގައި ނަޝީދު ވިދާޅުވީ އެގޮތަށް ވާހަކަ ދެއްކެވުމުން އަނިލްއަށް އެ ވެއްޓިވަޑައިގެންނެވެނީ ޝަރުއީ މަރުހަލާއަކަށް ކަަމަށެވެ.
" ހަގީގަތުގައި ދެން އެބޭފުޅާ އަމިއްލަފުޅަށް އެ ވެއްޓިވަޑައިގަންނަވަނީ ޝަރީއަތުގެ މަރުހަލާއަކަށް. ދެން އަޅުގަނޑު އެބޭފުޅާއަށް ދަންނަވަން މިވަގުތު އެބާވަތުގެ ކަންތައްތައް ނުކުރެއްވުމަށް. އެއީ ކޯޓުގެ އަމުރަށް ނުކިޔަމަންތެރިވެވަޑައިގެންނެވުމުގައި ނޫޅުއްވުމަށް،" ނަޝީދު ވިދާޅުވިއެވެ.
ނަޝީދު ވިދާޅުވީ އެއީ އެއްވެސް ބަޔަކަށް ރަނގަޅުވާނެ ކަމެއް ނޫން ކަމަށެވެ.
މިރޭ ސުޕްރީމްކޯޓުން ނެރުނު އަމުރާ ބެހޭ ގޮތުން ނަޝީދު ވިދާޅުވީ މިރޭގެ އަމުރުން އެނގުނީ އެމަނިކުފާނު އަބަދުވެސް ވިދާޅުވަމުން ވަޑައިގެންނެވި ގޮތަށް، އެމަނިކުފާނުގެ މައްޗަށް ހިންގި ޝަރީއަތާއި ކުރި ހުކުމާއި ހުކުމް ތަންފީޒުކުރަމުން ދިޔަ ގޮތް ވެސް ރަނގަޅުނޫން ކަަމަށެވެ.
މިރޭގެ އަމުރާ ގުޅިގެން ކޮމިޝަނަރް އޮފް ޕޮލިސް މަގާމުން ވަކިކުރިކަމަށް ސަރުކާރުން އިއުލާނު ކުރި ކުރުމަށް ވެސް ނަޝީދު ފާޑުވިދާޅުވިއެވެ. ކަމިޝަނަރު މަގާމުން ވަކިކުރެއްވީ ރައީސުލް ޖުމްހޫރިއްޔާ އޭނާއަށް ގުޅުއްވަން ކުރެއްވި މަސައްކަތް ކާމިޔާބު ނުވުމުން ކަމަށް ބަންޑާރަނައިބު ވިދާޅުވިއެވެ. ނަޝީދު ވިދާޅުވީ ރައީސް ގުޅުއްވަން ޖެހިވަޑައިގަންނަވާނީ ހޯމް މިނިސްޓަރަށް ކަމަށެވެ.
މިރެއިން މިރެއަށް ނަޝީދު ރާއްޖެއަށް ވަޑައިގަންނަވާ ކަމަށް ފެތުރިފައިވާ ވާހަކަ އެމަނިކުފާނު ދޮގު ކުރެއްވިއެވެ. ނަމަވެސް ވަޑައިގަންނަވާނެ ވަކި ދުވަހެއްް ވެސް ވިދާޅެއް ނުވެއެވެ.
ރައީސް ނަޝީދު 13 އަހަރަށް ޖަލަށްލާން ހުކުމް ކުރީ ޓެރަރިޒަމްގެ ކުށް ސާބިތުވާ ކަމަށް ކަނޑައެެޅުމަށް ފަހުގައެވެ. އެ ހުކުމް ކުރީއްސުރެ މިއަދާ ހަމައަށް އެމަނިކުފާނުގެ ހައްގުގައި އަޑު އުފުލި އެންމެނަށް މިރޭ ޝުކުރު އަދާކުރެއްވިއެވެ. އަދި ވިދާޅުވީ ސިޔާސީ ލީޑަރުންގެ އިތުރުންވެސް ސިޔާސީ ކަންކަމުގައި ގިނަ ބަޔަކު ޖަލުގައި އެބަތި ކަމަށެވެ.
" އަދި އަޅުގަނޑުމެން ހަނދާން ނެތިގެން ނުވާނެ ހަމަ އެއްގޮތަކަށް ވެސް، މޭ އެއް ވަނަ ދުވަހު ހައްޔަރު ކުރެވުނު ބައިވަރު އެހެން މީހުން އެބަތިބި. އެބޭފުޅުން ވެސް ޖަލުން ނުކުންނަން ޖެހޭނެ، " ނަޝީދު ވިދާޅުވިއެވެ.