ސިފައިންގެ ބަޔަކާއި ފުލުހުންގެ ބަޔަކަށް މޯލްޑިވްސް ނެޝަަނަލް ޑިފެންސް ފޯސް (އެމްއެންޑީއެފް) ގެ ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމު އަޒުމުން އާކޮށްދެއްވައިފިއެވެ.
ސިފައިންގެ ހެޑްކުއާޓަރުގައި ކުޑަ އިރުކޮޅެއް ކުރިން ބޭއްވި އެހަރަކާތް ޕީއެސްއެމް ނިއުސް އިން ވަގުތުން ދުރަށް ދެއްކިއެވެ. ނަމަވެސް އެހެން މީޑިއާތަކަށް އެ ހަރަކާތް ކަވަ ކުރުމުގެ ފުރުސަތު ނުލިބޭތީއާއި އެކަމާ ބެހޭ މައުލޫމާތު ސަރުކާރުން ހާމަ ނުކުރާތީ އެއީ ކޮން ކަމަކާ އެޅި ފިޔަވަޅެއް ކަމެއް ނޭނގެއެވެ.
ފުލުހުންނަކީ މަދަނީ އަދި އަސްކަރިއްޔާއާ އެއްވެސް ގުޅުމެއް ނެތް ބަޔަކަށް ވިޔަސް ދެބައި މީހުން އެއް ސަފުތަކެއްގައި ތިބެގެން އަޒުމް އާކުރީ ޖެނެރަލް ޝިޔާމުގެ އަޑުދަށުންނެވެ. ސަލާމަތީ ބާރުތަކުން ކީ އަޒުމް ނިންމާލީ " ބަޣާވާތްތެރިންގެ އަމަލުތައް ނާކާމިޔާބުކޮށްލާނެ" ކަމަށް ބުނަމުންނެވެ.
ޖެނެރަލް ޝިޔާމް އިސްކޮށް ހުންނަވައިގެން ސިފައިންނާއި ފުލުހުން އަޒުުމް އާކުރެއްވި އިރު އޭނާ މިއަދު ވިދާޅުވެފައި ވަނީ ރައީސް އަބްދުﷲ ޔާމީން އަޒުލު ކުރަން ސުޕްރީމް ކޯޓުން އަމުރެއް ނެރުނަސް އެއަށް ތަބާނުވާނެ ކަމަށާއި އަމަލު ކުރާނީ ބަންޑާރަނައިބު މުހައްމަދު އަނިލްގެ ގާނޫނީ ލަފާގެ ދަށުން ކަމަށެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސިފައިންގެ މޭޖާ ޖެނަރަލް އަހުމަދު ޝިޔާމް ވިދާޅުވީ ގައުމު ނުތަނަވަސް ކަމެއްގެ ތެރެއަށް ދާތަން ބަލާކަށް އަސްކަރިއްޔާއިން ނުތިބޭނެ ކަމަށާއި އެގޮތުން އެއްވެސް ޣައިރު ގާނޫނީ އަމުރަކަށް ތަބާނުވާނެ ކަމަށެވެ. އަދި ސިފައިން މަސައްކަތް ކުރާނީ އަނިލްގެ ގާނޫނީ ލަފާގެ ދަށުން ކަމަށް ޝިޔާމް ވިދަޅުވި އެވެ.
ރައީސް އަޒުލު ކުރަން އުޅޭ ކަމަށް ބުނާ މައްސަލައާ ގުޅިގެން ފުލުހާ މިހާރު ހަވާލުވެ ހުންނެވި އޭސީޕީ އަބްދުﷲ ނަވާޒް ވިދާޅުވީ އެފަދަ ޣައިރު ގާނޫނީ އަމުރަކަށް ފުލުހުން ތަބާނުވާނެ ކަމަށެވެ. އަދި ފުލުހުން ވެސް މަސައްކަތް ކުރާނީ އަނިލްގެ ލަފާގެ ދަށުން ކަމަށެވެ.
"ސުޕްރީމް ކޯޓުން ނެރޭނެ އަމުރާ ގުޅޭ ގޮތުން ފުލުހުން މަސައްކަތް ކުރާނީ ބަންޑާރަނައިބުގެ ލަފާގެ ދަށުން، އެ ހަލަތެއްގައި ފުލުހުން ގެންދާނީ ގާނޫން އަސާސީއާ ހިލާފު ނުވާނެ ގޮތަށް އެފަދަ ކަންކަން ތަންފީޒު ކުރަން އެހެންވީމަ ފުލުހުންގެ ފަރާތުން ދަންނަވާލަން އޮތީ އެފަދަ ހިލާފު އަމުރަކަށް ފުލުހުން އަމަލު ނުކުރާނެކަން،" ނަވާޒް ވިދާޅުވި އެވެ.
ފުލުހުންނާއި ސިފައިން މިހެން ބުނެފައިވާ އިރު އޭޖީ އަނިލް ވެސް ވިދާޅުވެފައި ވަނީ ރައީސް އަޒުލު ކުރަން ސުޕްރީމް ކޯޓުން އަމުރު ކުރިޔަސް އެއަށް އަމަލެއް ނުކުރާނެ ކަމަށެވެ. އެއީ ގާނޫން އަސާސީގެ 100 މާއްދާގައި ވާ ގޮތުން ރައީސް މަގާމުން ވަކި ކުރެވޭނީ މަޖިލީހުން ފާސް ކުރާ ގަރާރަކުން ކަމަށާއި ސުޕްރީމް ކޯޓަށް ލިބޭ ބާރަކީ އެ ގަރާރުގެ ސައްހަކަން ކަށަވަރު ކުރުން ކަމަށް ވެސް އަނިލް ވިދާޅުވި އެވެ.