ދެހާސް ބާރަ ވަނަ އަހަރުގެ ފެބްރުއަރީ މަހު ވެސް ރާއްޖެ އޮތީ މިގޮތަށެވެ. އެ ފަހަރުގެ ސިޔާސީ ހަލަބޮލިކަމުގައި ރާއްޖޭގެ އިގްތިސޯދުގެ މައިބަދަ ޓޫރިޒަމަށް ބޮޑު ގެއްލުމެއްވި އެވެ. މުހިންމު މާކެޓު ތަކެއް "އަތުން ދޫވި" އެވެ. އޭގެ ހަ އަހަރު ފަހެވެ. އަދި ވެސް ފެންނަނީ ހަމަ މިހާލަތެވެ. ސުޕްރީމް ކޯޓުގެ އަމުރެއްގައި ޖެހި މުޅި ގައުމު ހަލަބޮލި ވެއްޖެ އެވެ. މިއާއެކު ކުއްލި ނުރައްކަލުގެ ހާލަތު އިއުލާނު ކުރުން ވެގެން ދިޔައީ ގިނަ ގައުމުތަކުން ޓްރެވަލް އެޑްވައިޒަރީތައް ނެރެން ފެށުމެވެ. މިއާއެކު ޓޫރިޒަމަށް ދަނީ އަސަރު ކުރަމުންނެވެ. މިގޮތުން އެންމެ ބޮޑު ބިރުވެރި ކަމެއް އޮތީ ގެސްޓްހައުސް ވިޔަފާރި އަށެވެ. އެހެންވެ މި ވިޔަފާރި މިއަދު އޮތީ ބިރުންނެވެ.
"ސިޔާސީ ހަލަބޮލިކަމުން ޓޫރިޒަމަށް ގެއްލުންވޭ، މިހާރު ޓޫރިޒަމް އޮތް ގޮތުން އެންމެ ބޮޑަށް ގެއްލުންވާނީ ގެސްޓްހައުސްތަކަށް. މިއީ ކަންބޮޑުވުމެއް،" ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް) ގެ ރައީސް މުހައްމަދު ކަރަމް ވިދާޅުވި އެވެ.
ރާއްޖޭގައި 500 އެއްހާ ގެސްޓްހައުސްގައި ޖުމްލަ 6,778 އެނދު އެބަހުއްޓެވެ. އަދި މި ދާއިރާ މިހާރު ވެގެން ގޮސްފައިވަނީ ރާއްޖޭގެ ޓޫރިޒަމްގެ އޮކިއުޕެންސީ ހިފެހެއްޓުމުގައި ވެސް މުހިންމު ރޯލެއް ކުޅޭ ދާއިރާ އަކަށެވެ. މި ދާއިރާގެ ސަބަބުން ރިސޯޓުތަކަށް ވެސް ބޮޑު އާމްދަނީއެއް ލިބެ އެވެ. ގެސްޓްހައުސްތަކަށް އަންނަ ޓޫރިސްޓުންގެ ބޮޑު ބައެއް ރިސޯޓުތަކަށް ވެސް ދެ އެވެ. އެހެންވެ ގެސްޓްހައުސްތަކުން ރިސޯޓުތަކަށް ބޮޑު ފައިދާއެއް މިހާރު ކުރެ އެވެ. ނަމަވެސް، ޓްރެވަލް އެޑްވައިޒަރީތަކުގެ ސަބަބުން ބުކިންތައް ކެންސަލް ކުރަން ފެށުމާއެކު މި ވިޔަފާރިއަށް ވަނީ ބިރު ހީވެފަ އެވެ.
ގެސްޓްހައުސްތަކުގެ އޮކިއުޕެންސީން އެންމެ ޓޫރިސްޓެއް ގެއްލިގެން ދިޔަ ނަމަވެސް މިއީ މުޅި އިގްތިސާދަށް ލިބޭނެ ބޮޑު ގެއްލުމަކަށްވާނެ އެވެ. ސަބަބަކީ ކޮބައި ހެއްޔެވެ؟ ރާއްޖޭގެ މަދު ރަށެއްގައި ވަރުގަދަ އިންވެސްޓްމަންޓްތައްކޮށް ބޮޑެތި ވިޔަފާރިވެރިން މި ވިޔަފާރި ކުރަމުން ދިޔަނަމަވެސް ގިނަ ގެސްޓްހައުސްތައް ގުޅިފައިވަނީ އާއިލާ ތަކަށެވެ.
ރާއްޖޭގައި އެންމެ ފުޅާކޮށް ދަނޑުވެރިކަން ކުރާ އއ. ތޮއްޑޫ އަށް އެކަނި ބަލާނަމަ އެ ރަށުގައި 150 އަށް ވުރެ ގިނަ ކޮޓަރި އެބަހުއްޓެވެ. އަދި މި ފަދަ ރަށްރަށުގެ އެހެން މަސައްކަތްތައް ވެސް ގެސްޓްހައުސް ވިޔަފާރިއާ ގުޅިފައިވެ އެވެ. ނަމަވެސް ގެސްޓްހައުސްތަކުގެ ބުކިން ކެންސަލްވަމުން ދިއުމުން ވަނީ މި ވިޔަފާރިއަށް ގެއްލުމާ ކުރިމަތިވެފަ އެވެ.
"އަވަސް" އަށް ވާހަކަ ދެއްކި ބައެއް ގެސްޓްހައުސްތަކުން ބުނި ގޮތުގައި ޓްރެވަލް އެޑްވައިޒަރީތަކުގެ ސަބަބުން ބުކިންތައް ކެންސަލް ކުރުމުން ކަންބޮޑުވާ ކަމަށެވެ.
"ޗައިނާ އިން އަންނަން ތިބި މީހުންގެ ބުކިންތައް ވަނީ ކެންސަލްކޮށްފަ. މީގައި ހައިރާންވާ ކަމަކީ ޗައިނާގެ ޓްރެވަލް އެޑްވައިޒަރީ. އެ ގައުމުގެ ޓްރެވަލް އެޑަވައިޒަރީގައި އޮންނަނީ މި ދުވަސްވަރު މީހުން ނާނަން. މިއީ ކަންބޮޑުވާ ކަމެއް،" ނަން ނުޖެހުމަށް އެދި ވިދާޅުވި އެވެ.
ސަން އައިލެންޑް ރިސޯޓުގެ ޖެނެރަލް މެނޭޖަރުކަން ކުރެއްވި ޑރ. އަބްދުﷲ މައުސޫމް ވިދާޅުވި ގޮތުގައި ޗައިނާ މީހުން ނާންނަން އެ ގައުމުން އެންގުމަކީ ޓޫރިޒަމް ދާއިރާއަށް ލިބޭނެ ބޮޑު ގެއްލުމަކަށްވާނެ ކަމަށެވެ.
"ޗައިނާ މާކެޓަކީ ފާޑެއްގެ މާކެޓެއް. އެ ގައުމުގެ މާކެޓު ހޯދަން ގިނަ މަސައްކަތްތަކެއް ކުރަން ޖެހޭ. އެހެންވެ މިހާރުގެ ހާލަތުން އަރައި ގަންނަން ކަމާބެހޭ އިދާރާ ތަކުން ގިނަ މަސައްކަތް ތަކެއް ކުރަން ޖެހޭނެ،" މައުސޫމް ވިދާޅުވި އެވެ.
ހަމަނުޖެހުންތަކުން ރާއްޖޭގެ ޓޫރިޒަމަށް ދަނީ ގެއްލުންވަމުންނެވެ. ހާއްސަކޮށް ގެސްޓްހައުސްތަކަށް މީގެ ގެއްލުން ބޮޑެވެ.