މިހާރުވެސް ރާއްޖެއަކީ ސުވަރުގެއެއް: މަރުހަބާ!

ރާއްޖޭގެ މަތިން ފެންނަ މަންޒަރަކީ ރާއްޖޭގެ ރީތި ކަމެވެ. ކަނޑުގެ ތެރެ އަށް އުކާލާފައިވާ މުތީތަކެއްގެ ގޮތުގައި ސިފަވާ މި މަންޒަރު ދެކެލަން ކޮންމެ އަހަރަކު އެތަށް ލައްކަ ބަޔަކު އާދެ އެވެ. އެއީ ރާއްޖޭގެ ޓޫރިޒަމްގެ "ބިއުޓީ" އެވެ. އެންމެ ހާއްސަ އެއް ސިފައެވެ. ދިވެހި ޓޫރިޒަމްގެ "ވަން އައިލެންޑް ވަން ރިސޯޓް" ކޮންސެޕްޓުގެ ސަބަބުން ރާއްޖޭގެ އިކޮނޮމީ އަށް ލިބޭ ގެއްލުން ކުޑަ ކޮށްދެ އެވެ. ރާއްޖޭގައި ހަމަނުޖެހުމެއް ހިނގި ނަމަވެސް މި ސިފައިގެ ސަބަބުން ރާއްޖެ އަންނަ މެހުމާނުންނަށް އަމާންކަމުގެ އިހުސާސް ކުރުވަ އެވެ. މިހާރު ވެސް ފެންނަނީ ހަމަ އެ މަންޒަރެވެ. މިވަގުތު ސިޔާސީ ހަލަބޮލި ކަމެއްގައި ރާއްޖެ އޮތް ނަމަވެސް ޓޫރިސްޓުންނަށް އަދި ވެސް ރާއްޖެއަކީ ސުވަރުގެ އެކެވެ.

"ރާއްޖެއަށް އަންނަންވީ. ސިޔާސީ ހަލަބޮލިކަމުން ރާއްޖެ އަންނަ މީހާއަށް އެއްވެސް ހުރަހެއް ނެތް. ރާއްޖެ އަށް މަރުހަބާ،" ރާއްޖޭގައި މަސައްކަތް ކުރާ ބޭރުގެ ޓްރެވަލް އެޖެންޓެއް އޭނާގެ ފޭސްބުކް ޕޭޖުގައި އެ ގައުމުގެ ބަހުން ލިޔެފައި އެވެ.

މި މަހުގެ އެއް ވަނަ ދުވަހު ސުޕްރީމް ކޯޓުން ނެރުނު އަމުރާއެކު ރާއްޖެ ހޫނުވެގެން ދިޔަ އެވެ. އަދި އެކަން އެގޮތުގައި އޮއްވައި ރާއްޖޭގައި ކުއްލި ނުރައްކަލުގެ ހާލަތު އިއުލާނު ކުރުންވީ މި ހޫނު ކަމުގައި "ހުޅު" ރޯވުން ފަދަ ކަމަކަށެވެ. މިއާއެކު އެކި ގައުމުތަކުން ވަނީ ރާއްޖެ އަށް ޒިޔާރަތް ކުރުމުގައި ސަމާލުވެ، އުޅުމަށް އިލްތިމާސްކޮށް، އެ ގައުމުގެ ރައްޔިތުންނަށް އަންގާފަ އެވެ. ނަމަވެސް މި ހާލަތުގައި އޮތް ނަމަވެސް އާންމު ދިރިއުޅުން އޮތީ އާދައިގެ ހާލަތުގަ އެވެ.

މާލެތެރެ އާއްމު ހާލަތުގައި!

ރާއްޖޭގައި ކުއްލަ ނުރައްކަލުގެ ހާލަތު އިއުލާނު ކުރި ނަމަވެސް މާލެތެރެ އިއްޔެ ވެސް އޮތީ އާއްމު ހާލަތުގަ އެވެ. މާލެ އަށް އަންނަ ޓޫރިސްޓުން އަރައި ފޭބުމުގައި އެއް ވެސް މައްސަލައެއް ދިމަލެއް ނުވެ އެވެ. މިކަން ޖުމްހޫރީ މައިދާން ސަރަަހައްދުން ވެސް ފެނުނެވެ. ގިނަ އަދަދެއްގެ ޓޫރިސްޓުން މާލެތެރޭގައި އުޅެމުން ދިޔަތަން ފެނުނެވެ. ހާއްސަކޮށް ގްރީންޒޯންްގައި ހިމެނޭ "ޓޫރިސްޓް އެޓްރެކްޝަން" ތަކަށް ގިނަ އަދަދެއްގެ ޓޫރިސްޓުން ގޮސްތިބި ތަން ފެނުނެވެ.

ޗެކް ރިޕަބްލިކްގެ ޓްރެވަލް އެޖެންޓެއް ބުނެފައިވާ ގޮތުގައި ރާއްޖޭގެ އާއްމު ދިރިއުޅުން ހަމަ އޮތީ އާއްމު ހާލަތުގަ އެވެ.

"މާލޭގެ ސްކޫލްތައް ހުރީ ހުޅުވާފަ. ވިޔަފާރިތަކާއި އޮފީސް ތަކަށް ބަރާ ބަރަށް ފަންކްޝަން ކުރޭ. އެ މީހުންގެ [ދިވެހިންގެ] ދިރިއުޅުން ހަމަ ނޯމަލް،" ރާއްޖޭގައި މަސައްކަތް ކުރާތާ ގިނަ ދުވަސްވީ އެޖެންޓް ފޭސްބުކުގައި ލިޔެފައިވެ އެވެ.

މާލޭގެ ސްކޫލްތައް ހުރީ ހުޅުވާފަ. ވިޔަފާރިތަކާއި އޮފީސްތައް ބަރާ ބަރަށް ފަންގްޝަން ކުރޭ. ދިރިއުޅުން ހަމަ ނޯމަލް

ބޭރުގެ ޓްރެވަލް އެޖެންޓެއް

ރާއްޖޭ ހާލަތާ ބެހޭ ގޮތުން، އެސޯސިއޭޝަން އޮފް ޓްރެވަލް އެޖެންޓްސް (އަޓާ) އިން ބުނެފައިވާ ގޮތުގައި ރާއްޖޭގައި ކުއްލި ނުރައްކަލުގެ ހާލަތު އިއުލާނު ކޮށްފައިވީ ނަމަވެސް، ރާއްޖެއަށް ޓޫރިސްޓުން އައުމުގައި އެއްވެސް ނުރައްކަލެއް ނެތެވެ. ސިޔާސީ ގޮތުން ރާއްޖެ ހަލަބޮލި ނަމަވެސް، ރާއްޖެއަށް ޒިޔާރަތް ކުރާ މީހުންނަށް ދިވެހިން މަރުހަބާ ކިޔާނެ އެވެ. މިއަދު ވެސް ރާއްޖޭގެ ވިޔަފާރިތަކާއި ސްކޫލްތައް އާއްމު އުސޫލުން ހިނގަމުން އެބަދެއެވެ.

ސިޔާސީ ގޮތުން ހަލަބޮލިވެ، އެއްވުންތައް ކުރިއަށް ދަނީ މާލޭގަ އެވެ. ރާއްޖެ އުފެދިފައިވާ ގޮތުގެ ސަބަބުން ޓޫރިސްޓުންނަށް މީގެ އަސަރެއް ނުކުރެ އެވެ. ރާއްޖެ އަށް އަންނަ ޓޫރިސްޓުންނަށް ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން މާލެ ނައިސް ސީދާ ރިސޯޓަށް ދެވެ އެވެ. މި ވާހަކަތައް އެ ޖަމިއްޔާ އިން ގެންދަނީ ޕްރޮމޯޓް ކުރަމުންނެވެ.

ސަރުކާރުގެ މާކެޓިން ކުންފުނި، މޯލްޑިވްސް މާކެޓިން އެންޑް ޕަބްލިކް ރިލޭޝަން (އެމްއެމްޕީއާރުސީ) އިން ނެރެފައިވާ ނޫސްބަޔާނެއްގައި ބުނެފައިވާ ގޮތުގައި ކުއްލި ހާލަތު އިއުލާން ކުރި ނަމަވެސް ވައިގެ ދަތުރުފަތުރާއި ކަނޑު ދަތުރުތައް އަދި ރިސޯޓްތަކުގެ އޮޕަރޭޝަން އާދައިގެ މަތިން ރާއްޖޭގައި ކުރި އަށް ދެއެވެ.

ސާފު ކުރަން ޖެހޭ: ބޭޑް އިމޭޖު

ޓްރެވަލް އެޑްވައިޒަރީތަކާއެކު ފެތުރުނު އަޑުތަކުގެ ނަތީޖާއަކީ ޓޫރިޒަމަށް ގެއްލުންވުމެވެ. މިހާރު ޓްވަލް އެޑްވައިޒަރީތައް ނެރެފައި ވަނީ ވެސް ވަރަށް މުހިންމު ޓޫރިޒަމް މާކެޓުތަކުންނެވެ. އަދި މިއާއެކު ސޯޝަލް މީޑިޔާގައި ރާއްޖެއާ ބެހޭ ގޮތުން ފެތުރިގެން ދިޔަ ނުރަނގަޅު ވާހަކަތަކުގެ ގެއްލުން ވަރަށް ބޮޑުވާނެ އެވެ.

ޓްރެވަލް އެޑްވައިޒަރީ ނެރެފައިވާ ގައުމުތަކުގެ ތެރޭގައި ރަޝިޔާ އާއި އިންޑިޔާ އިނގިރޭސިވިލާތް އަދި ޗައިނާ އާއި އެމެރިކާ ހިމެނެ އެވެ. މި ގައުމުތަކުގެ ތެރެއިން ރަޝިޔާ އިން މިދިޔަ އަހަރު 61,931 މީހުން އައިސްފައިވާއިރު އެ ގައުމުން ޓޫރިޒަމަށް ކުރި ހިއްސާ އުޅެނީ 4.5 ޕަސެންޓުގަ އެވެ. އަދި އިނގިރޭސިވިލާތުން 103,977 މީހުން އައިސްފައިވެ އެވެ. މިއީ ހަތް ޕަސެންޓް ހިއްސާވާ ގައުމެކެވެ. މީގެ އިތުރުން ޗައިނާ އިން 306,530 މީހުން އައިސްފައިވެ އެވެ. ރާއްޖެ އަށް އެންމެ ގިނަ މީހުން އަންނަ ޗައިނާ އިން ރާއްޖޭގެ ޓޫރިޒަމްގެ ހިއްސާ އުޅެނީ 22 ޕަސެންޓުގަ އެވެ. ދެން އޮތީ ރާއްޖެ އަށް އެންމެ އުންމީދީ ދެ މާކެޓު ކަމަށްވާ އެމެރިކާ އާއި އިންޑިޔާ އެވެ. މި ސަބަބުތަކަށްޓަކައި ސަރުކާރުން މިހާރު ކުރަން ޖެހޭ ކަމަކީ ހާއްސަކޮށް މި ގައުމުތަކަަށް ފޯކަސްކޮށް ގިނަ މަސައްކަތް ތަކެއް ކުރުމެވެ.

ކުރަން ޖެހޭ މަސައްކަތް ގިނައިރު، މި ހާލަތުގެ ގެއްލުން މިހާރު ވެސް ވާން ފަށައިފި އެވެ. ބައެއް ޓޫރިޒަމް ޕްރޮޕަޓީތަކުގެ ބުކިންތައް ވަނީ ކެންސަލްކޮށްފަ އެވެ. އެހެންވެ ސަރުކާރުން މިހާރު ކުރަން ޖެހޭ މަސައްކަތަކީ ހާލަތު ބަދަލުކޮށް ކިޔައި ދިނުމެވެ. ރާއްޖެއަކީ ހަމަ ހަގީގަތުގައިވެސް ސުލްހަވެރިތަނެއްގެ ގޮތުގައި ދެއްކުމެވެ. ރާއްޖެއަށް މީހުން އައުމުގައި ތިންވަނައަށް ބަލަނީ ރާއްޖޭގެ ސުލްހަވެރިކަމެވެ.

އަސްލު މައްސަލައަށް އެޑްރެސްކޮށް އާއްމު ހާލަތަށް ގައުމު ރުޖޫއަކުރުމުގެ މަސައްކަތް ކުރަން ޖެހެ އެވެ. ދެން ކުރަން ޖެހޭ ކަމަކީ ޓޫރިޒަމް އާންމު ހާލަތަށް ގެންނަން އަވަސް ފިޔަވަޅުތަކެއް ނެގުމެވެ. އެކަން ކުރަން ޖެހޭނީ ބޭރުގެ ގައުމުތަކާ ވެސް ގުޅިގެންނެވެ. އެކި ގައުމުތަކުގައި ހުރި އެމްބަސީތަކާއި އެޖެންޓުންގެ އެހީތެރިކަމާއެކު މުޅި ޓޫރިޒަމް ދާއިރާ ގުޅިގެންނެވެ.

ޓޫރިޒަމް ދާއިރާގައި މަސައްކަތް ކުރާ ފަރާތްތަކުން ބުނާ ގޮތުގައި ޓްރެވަލް އެޑްވައިޒަރީ ތަކަކީ ޔޫރަޕު މީހުންނަށް އާ ކަމެއް ނޫނެވެ. އެކަމަކު އެހެން ގައުމުތަކުގެ މީހުނަށ އެއީ ސީރިއަސްވާނެ ކަމެކެވެ.

"ހުޅަނގުގެ ގައުމުތަކުގެ މީހުންގެ ވިސްނުން ތަފާތު ވާނެ. އެ މީހުންނާ ރަހުމަތްތެރި ކަމެއް އެއްވުން ތަކަކީ. ހިޔާލުފާޅު ކުރުން ތަކަކީ. އެހެންވެ، މިއީ އެ މީހުންނަށް މައްސަލަ އަކަށް ނުވާނެ. އެކަމަކު ސަރުކާރުން ވަރަށް ރަނގަޅަށް ޖެހޭނެ މިކަން އަންގައި ދޭން. އެ ގޮތަށް މިކަން ކުރާނަމަ ގެއްލުން ކުޑަކުރެވޭނެ،" ނަން ނުޖެހުމަށް އެދި ބޭފުޅަކު ވިދާޅުވި އެވެ.

ރާއްޖޭގެ އެންމެ ބޮޑު ރިސޯޓު ކަމަށްވާ ސަން އައިލެންޑުގެ ކުރީގެ ޖެނެރަލް މެނޭޖަރު އަބްދުﷲ މައުސޫމް ވިދާޅުވި ގޮތުގައި ޗައިނާ މީހުން ރާއްޖެ ނާންނަން އެނގުމަކީ ބޮޑު ގެއްލުމަކަށްވާނެ އެވެ.

"ޗައިނާ މީހުން މި ވަގުތު ނަމަވެސް ނާންނަން އެނގުމަކީ ވަރަށް ބޮޑު ކަންބޮޑުވުމެއް. އެހެންވެ ޗައިނާ ސަރުކާރާ ވެސް ގުޅިގެން ދިވެހި ސަރުކާރުގެ ކަމާބެހޭ އިދާރާތަކުން ވަރަށް މަސައްކަތް ކުރަން ޖެހޭ. މިހާރު މަސައްކަތް ކުރަން ފަށައިގެން މީގެ ނަތީޖާ ފެންނަން އަދި ދެ އަހަރު ވަރު ނަގާނެ،" ރާއްޖެޓީވީގައި މައުސޫމް ވިދާޅުވި އެވެ.

ކޮންމެ ގޮތެއްގައި ނަމަވެސް ވީކަމެއްވީ އެވެ. މިހާރު ވިސްނަންވީ މުސްތަގުބަލަށެވެ. އެކަމަށް ފިޔަވަޅު އަޅަން ޖެހެ އެވެ. މިހާލަތުގައިވެސް ރާއްޖެއަކީ އަދިވެސް ސުވަރުގެއެކެވެ. ރާއްޖެއަށް މަރުހަބާ އެވެ.