މުޒާހަރާ ކަވަރު ކުރަމުން ދަނިކޮށް ރޭ ހައްޔަރު ކުރި ރާއްޖެ ޓީވީގެ ނޫސްވެރިޔާ ހުސެއިން ހަސަންއަށް އަނިޔާތައް ލިބިފައި ވަނީ ކިހިނެތް ކަމެއް ފުލުހުން ސާފެއް ނުކޮށްދިން ކަމަށާއި އޭނާ ހައްޔަރު ކުރި ކަމަކަށް ވެސް ފުލުހުން ހަވާލެއް ނުވި ކަމަށް ހުސެއިންގެ ގާނޫނީ ވަކީލު މުހައްމަދު ނިޝާން ވިދާޅުވެއްޖެ އެވެ.
ހުސެއިންއަށް އަނިޔާ ލިބިފައި ވަނީ ކިހިނެތް ކަމެއް ފުލުހުން ނުބުނާއިރު އޭނާ އަށް ރޭ ދަންވަރުން ފެށިގެން އަންނަނީ އޭޑީކޭ ހޮސްޕިޓަލުން ފަރުވާ ދެމުންނެވެ. އެގޮތުން ހުސެއިންގެ ހަށިގަނޑުގެ އެކި ހިސާބުތަކުން ވަނީ ހަންމަށައިގެން ގޮސްފަ އެވެ.
"އަވަސް"އާ ވާހަކަދައްކަވަމުން ނިޝާން ވިދާޅުވީ ފުލުހުން ހައްޔަރު ކުރުމަށް ފަހު ގެންގޮސްފައި ވަނީ ގަލޮޅު ޕޮލިސް ސްޓޭޝަނަށް ކަމަށާއި އެތަނުން، ހުސެއިން އާދަމް ބިލްޑިންއަށް ގެންދިޔުމަށް ފަހު ބަލިހާލަތު ތަން ނުދޭތީ އޭޑީކޭއަށް ގެންދިޔަ ކަމަށެވެ. ނަމަވެސް އެތަނުގައި ބާއްވާފައި އޮތް އިރުވެސް ހުސެއިން ވަނީ ހައްޔަރުކޮށްފައި ކަމަށާއި ހޮސްޕިޓަލުން ދުކޮށްލާހާ އަވަހަށް އަލުން ހައްޔަރު ކުރާނެ ކަމަށް ފުލުހުން ބުނަމުން ގެންދިޔަ ކަމަށް ނިޝާން ވިދާޅުވި އެވެ. ނަމަވެސް ހުސެއިންގެ ހާލު ގޯސްވެފައިވާ ކަމުގެ މައުލޫމާތު ޑޮކްޓަރުންގެ ފަރާތުން ފުލުހުންނަށް ލިބުމާއެކު އޭނާ ދޫކޮށްލައި އާއިލާއާ ހަވާލުކޮށްފައިވާ ކަމަށް ފުލުހުން އެންގި ކަމަށެވެ.
އެހެންކަމުން ހުސެއިން ހައްޔަރު ކުރި ކަމުގެ ލިޔެކިޔުންތައް ހޯދުމަށާއި އޭނާއަށް އަނިޔާވެފައި ވަނީ ކިހިނެތް ކަން ސާފުކޮށްދިނުމަށް ފުލުހުންގެ ފަރާތުން އެދިފައިވާ ކަމަށާއި ނަމަވެސް ހުސެއިން ހައްޔަރު ނުކުރާ ކަމަށް ފަހުން ފުލުހުން އެނގި ކަމަށް ނިޝާން ވިދާޅުވި އެވެ. އަދި ހައްޔަރު ނުކުރާނަމަ ހުސެއިން ގެންދެވުނީ ކޮންތާކުން ކަމާއި އަނިޔާ ކުރީ ކޮން ފަރާތަކުން ކަމާއި ފޮޓޮ އާއި ވީޑިއޯތަކުން ފެންނަނީ ފުލުހުން ކަން ކަށަވަރުކޮށްދިނުމަށް އެދިވަޑައިގަތް ކަމަށާއި ނަމަވެސް އެއަށް ފުލުހުން އަދިވެސް ޖަވާބެއް ނުދޭ ކަމަށް ނިޝާން ވިދާޅުވި އެވެ.
"އެ ބޭފުޅުން ދެއްކި ވާހަކަތަކުން އަޅުގަނޑަށް ސާފުވީ މުޒާހަރާ ތެރެއިން ހުސެއިން އުފުރާލީ ވެސް އެ ބޭފުޅުން ނޫން ކަމަށް ދޭހަވާ އިބާރާތުން، ހުސެއިން ހައްޔަރަށް ގެނެވުނީ އެ ބޭފުޅުންގެ ތެރެއިން މީހުން ނޫން ކަމަށް ވިދާޅުވާ ކަހަލަ ގޮތަކަށް ވާހަކަތައް ދިޔައީ،" ނިޝާން ވިދާޅުވި އެވެ. "ހުސެއިން ހައްޔަރު ކުރީ ކޮން އައެއް ކަމެއް އެ ބޭފުޅުންނަށް ސާފެއް ނުކޮށްދެވުން، ދެން އަޅުގަނޑު ދެންނެވިން ހެކިންގެ ބަހުންނާއި ފޮޓޮ އާއި ވީޑިއޯތަކުން އެބަ އިނގޭ ފުލުހުންކަން އޭނާ ހައްޔަރުކޮށް އަނިޔާ ކުރީ އެހެންވެ އެއަށް ޖަވާބު ދާރިވާން، ދެން އެ ބޭފުޅުން ވިދާޅުވަނީ ސިޓީއެއް ލާން،"
ވަކީލު ވިދާޅުވީ މުޒާހަރާގެ ތެރެއިން ހުސެއިން ނެގީ ކޮން ބައެއް ކަމާ އަނިިޔާތައް ވެފައި ވަނީ ކިހިނެތް ކަން ތަކުރާރުކޮށް ސުވާލު ކުރުމުން ވެސް ޖަވާބު ދާރީއެއް ނުވެވުނު ކަމަށެވެ. ނަމަވެސް ހުސެއިންގެ ކަރުގައި ފުލުހުން ހިފާފައި ހުރި ކަމަށާއި އޭނާގެ އަރިކަށި ދަށުގައި އެންކަލް ބޫޓެއް އަރުވާލާފައި ހުރި ކަމަށެވެ. ނަމަވެސް ހައްޔަރު ކުރުމުގެ ތެރޭގައި އެވަރު ކުރާނެ ކަމަކަށް ގަބޫލެއް ނުކުރެވޭ ކަމަށް ނޝާން ވިދާޅުވި އެވެ. އެހެންކަމުން އެ މައްސަލަ އެޗްއާރްސީއެމް އަށާއި އިންޓަގްރިޓީ ކޮމިޝަަނަށާއި އަދި ފުލުހަށް ވެސް އެ މައްސަލަ ހުށަހަޅަން ނިންމާފައިވާ ކަމަށް އޭނާ ވިދާޅުވި އެވެ.
ހުސެއިންގެ މިހާރުގެ ހާލަތާ ގުޅޭ ގޮތުން ރާއްޖެ ޓީވީގެ ސީއީއޯ ހުސެއިން ފިޔާޒް ވިދާޅުވީ އޭނާގެ ރަނގަޅުވަމުން އަންނަ ކަމަށާއި ނަމަވެސް އެތެރެހައްޓަށް ގެއްލުން ލިބިފައިވާތީ އޮބްޒަވޭޝަނަށް ބާއްވާފައި އޮތް ކަމަށެވެ. އަދި ހަށިގަނޑުގެ އެކި ތަންނައި ވަރަށް ބޮޑަށް އަނިޔާކޮށް އެއްޗަކުން ޖަހާފައި ހުރި ކަމުގެ ނިޝާންތައް ވެސް ހުސެއިންގެ ގައިގައި ހުރި ކަމަށް ފިޔާޒް ވިދާޅުވި އެވެ.