ކުރިއަށް އޮތް އެއް މަސްދުވަހުގެ ތެރޭގައި އިދިކޮޅުން ހަ މެންބަރުން ޕީޕީއެމަށް "ދަމައިގަންނާނެ" ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު، އަދި ޕީޕީއެމްގެ ޕީޖީ ގްރޫޕްގެ ޑެޕިއުޓީ ލީޑަރު އިބުރާހީމް ފަލާހު ވިދާޅުވެއްޖެ އެވެ.
އައްޑޫ ހިތަދޫގައި މިއަދު "މަގެ ދީނާ މަގެ ގައުމާ ނުކުޅެއްޗޭ" ނަމުގައި ކުރިއަށްގެންދިޔަ އެއްވުމުގައި ފަލާހުވަނީ އިދިކޮޅު ބައެއް ފަރާތްތަކަށް ވަރަށް ބޮޑަށް ފާޑު ވިދާޅުވެފަ އެވެ. މަޖިލީހަށް އިޝާރާތްކޮށް އޭނާ ވިދާޅުވީ ވަރަށް ބަދަލެއް ގެންނާނެ ކަމަށެވެ.
ފަލާހް ވިދާޅުވީ، މަޖިލިސް ޗުއްޓީގައި އޮންނަ ދުވަސްތަކުގައި ޕީޕީއެމްގައި މެންބަރުން އަބަދުވެސް މަދުވާ ކަމަށެވެ. ނަމަވެސް ދައުރު ފެށި މަޖިލިސް ހިނގައިގަންނަ އިރު ޕީޕީއެމަކީ އަބަދުވެސް މެޖޯރިޓީ ޕާޓީކަމަށާއި މިފަހަރުވެސް އެކަން އޮންނާނީ އެގޮތަށް ކަމަށެވެ.
ކުރިއަށް އޮތް މަހެއްހާ ދުވަހުގެ ތެރޭގައި މަޖިލީހުގެ މެޖޯރިޓީ ޕީޕީއެމަށް ހޯދައި އިދިކޮޅުގައި މިހާރު ތިއްބެވި މެންބަރުންގެ ތެރެއިން ހަ މެންބަރުން ޕީޕީއެމަށް "ދަމައިގަންނާނެ" ކަމަށް ފަލާހު މިއަދު ވިދާޅުވި އެވެ.