ޕީޕީއެމުން ރޭގަނޑު 10:30 ގެ ފަހުން އެއްވެސް ހަރަކާތެއް ނުބާއްވަން އެ ޕާޓީން ނިންމައިފި އެވެ.
ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ނައިބު ރައީސް އަބްދުލް ރަހީމް އަބްދުﷲ (އަދުރޭ) ވިދާޅުވީ، ޕީޕީއެމުން މިހާރު ކުރިއަށްގެންދާ ހުރިހާ ހަރަކާތްތަކެއް ރޭގަނޑު 10:30 ގެ ކުރިން ހުއްޓާލުމަށް ނިންމާފައިވާ ކަމަށާއި އެގޮތަށް ނިންމެވީ ރާއްޖޭގެ އަމާން ކަމަށް އިސްކަން ދިނުމަށް ކަމަށެވެ.
"މިރޭ އިން ފެށިގެން ޕީޕީއެމްގެ ހަރަކާތްތައް ރޭގަނޑު 10:30 ގެ ފަހުން ނުބާއްވާނަން، ބާއްވާނީ އެ ގަޑިއަށް ނިމޭ ގޮތަށް، ޕީޕީއެމްގެ އޮފީހަކުން ވެސް ނުހިންގާނެ އަދި ރައީސް އަބްދުﷲ ޔާމީންގެ ކެމްޕޭނު އޮފީހަކުން ވެސް ނުހިންގާނެ،" އަދުރޭ ވިދާޅުވި އެވެ.
އަދުރޭ ވިދާޅުވީ، ރޭގަނޑު 10:30 ގެ ފަހުން ހަރަކާތްތައް ބޭއްވުމުން ރައްޔިތުންނަށް އުނދަގޫވާ ކަމުގެ ޝަކުވާތައް ލިބޭ ކަމަށެވެ. އަދުރޭ ވަނީ ރައްޔިތުންނަށް އުނދަގޫވާ ގޮތަށް ހަރަކާތްތައް ބާއްވަމުން ގެންދަވާ ފަރާތްތަކާމެދު ފިޔަވަޅު އެޅުމަށް ފުލުހުންނަށް ގޮވާލާފައި ވެއެވެ.
ޕީޕީއެމުން ދަނީ މިއަހަރުގެ ރިޔާސީ އިންތިހާބަށް ތައްޔާރު ވުމަށް ވަރަށް ގިނަ ހަރަކާތްތަކެއް ކުރިއަށް ގެންދަމުންނެވެ. އެގޮތުން މިދިޔަ ހުކުރު ދުވަހު ވަނީ ރައީސް ޔާމީންގެ އަނބިކަނބަލުން ފާތިމަތު އިބްރާހިމް އިސްކޮށް ހުންނަވައި އައްޑޫ ސިޓީގައި ހަރަކާތްތަކެއް ކުރިއަށް ގެންގޮސްފަ އެވެ. އަދި ރޭވެސް ވަނީ ޕީޕީއެމްގެ ފަރާތުން ހުޅުމާލޭގައި ހަރަކާތްތަކެއް ކުރިއަށް ގެންގޮސްފަ އެވެ.
މީގެ އިތުރުން މިރޭ ވެސް ޕީޕީއެމްގެ ހާއްސަ ޖަލްސާއެއް ބޭއްވުމަށް ވަނީ ރާވާފަ އެވެ. އަދި މާދަމާ ރޭވެސް ވިލިމާލޭގައި ހަރަކާތްތަކެއް ބޭއްވުމަށް އެޕާޓީން ވަނީ ނިންމާފަ އެވެ.