އޮޑިޓަ ޖެނެރަލްގެ އޮފީހުގެ މިދިޔަ އަހަރުގެ އަހަރީ އޮޑިޓް ކުރަން އޮޑިޓް ފާމެއް ހޯދުމަށް އަނެއްކާވެސް ރައްޔިތުންގެ މަޖިލީހުން އިއުލާން ކޮށްފި އެވެ.
ރައްޔިތުން މަޖިލީހުގެ އިދާރާއިން ކޮށްފައިވާ އިއުލާންގައި ބުނެފައިވަނީ، އޮޑިޓާ ޖެނެރަލް އޮފީހުގެ މިދިޔަ އަހަރުގެ އަހަރީ އޮޑިޓް ކުރުމަށް އޮޑިޓް ފާމެއް ހަމަޖެއްސުމަށް ކުރިން ކުރެވުނު އިއުލާނަށް މަދުވެގެން ތިން ފަރާތަކުން ޕްރޮޕޯސަލް ހުށަހަޅަން ޖެހޭނެ ކަމަށާއި ނަމަވެސް އެއަދަދަށް ޕްރޮޕޯސަލް ހުށަހަޅާފައި ނުވާތީވެ، ކުރިން ކުރި އިއުލާން ބާތިލްކޮށް އަލުން ހުށަހެޅުމުގެ ފުރުސަތު ހުޅުވާލާ ކަމަށެވެ.
އިއުލާންގައި ވަނީ، ރާއްޖޭގައި ގާނޫނީ އޮޑިޓްކުރުމާއި އެޝޫރެންސްގެ ހިދުމަތް ދިނުމުގެ ޕްރެކްޓިސިން ސެޓްފިކެޓް އޮޑިޓަ ޖެނެރަލްގެ އޮފީހުން ދޫކޮށްފައިވާ އޮޑިޓް ފާމްތަކަށް ފުރުސަތު ހުޅުވާލާ ކަމަށެވެ. އަދި އެއްލައްކަ ރުފިޔާއަށްވުރެ ބޮޑުނޫން ފީއެއްގައި އޮޑިޓާ ޖެނެރަލްގެ އޮފީސް އޮޑިޓްކުރެއްވުމަށް ޝައުގުވެރިވާ ފަރާތްތަކަށް އެފުރުސަތު ލިބިގެންދާނެ ކަމަށެވެ.