އެންޓި ޑިފެކްޝަން ބިލް: ނިޒާމާ ރައްޓެއްސެއް ނޫން!

ރައްޔިތުންގެ މަޖިލީހުގެ 12 މެންބަރެއްގެ މައްސަލައިގެ ބަހުސްއަކީ މިދިޔަ އަހަރުގެ ޖުލައި މަހުން ފެށިގެން އެކި ކޮޅުކޮޅަށް ފުޅާވަމުން ރަބަރެއްހެން ދެމެމުންދާ ބަހުސެކެވެ. ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް މަޖިލީހުގައި ތިއްބަވާ ޕީޕީއެމްގެ 12 މެންބަރަކު ސޮއި ކުރައްވައި ސަރުކާރަށް މަޖިލީހުގެ މެޖޯރިޓީ ގެއްލުވައިލުމުން ބަންޑާރަ ނައިބު މުހައްމަދު އަނިލް އެއަށް ހައްލެއް ހޯއްދެވުމަށް ވަޑައިގެންނެވީ ސުޕްރީމް ކޯޓަށެވެ. އޭގެ ފަރުވާއެއްގެ ގޮތުން ސުޕްރީމް ކޯޓުން އިއްވީ "ފްލޯ ކްރޮސް" ނުވަތަ އިންތިހާބުވާ ޕާޓީން ވަކިވެއްޖެނަމަ ނުވަތަ ވަކިކޮށްފިނަމަ ނުވަތަ އެހެން ޕާޓީއަކާ ގުޅިއްޖެނަމަ މެންބަރުގެ ގޮނޑި ގެއްލޭނެ ވަރުގަދަ ހުކުމެވެ.

ޖުލައި މަހު އިއްވި އެ ހުކުމުން އެދެވޭ ފަރުވާއެއް ނުލިބޭ ކަމަށް ބަލައި މަޝްހޫރު "އެކެއް ފެބުރުއަރީ" ގެ އަމުރުގައި ސުޕްރީމް ކޯޓުން ވަނީ އެ ހުކުމް ބާތިލުކޮށްފައެވެ. އަދި ފްލޯ ކްރޮސް ކުރުމަކީ ގޮނޑި ގެއްލޭނެ ކަމެއް ނޫން ކަމަށް އެ އަމުރުގައި ކަނޑައަޅައި ދިނެވެ.

ނަމަވެސް އެ އަމުރަށް އަމަލު ކުރުން ފަސް ކުރުމަށް މިހާރު ސުޕްރީމް ކޯޓުން އޮތީ ވަގުތީ އަމުރެއް ނެރެފައެވެ. އެއީ އަނެއްކާވެސް އެ މައްސަލާގައި ބަންޑާރަ ނައިބު އެ ކޯޓަށް ވަޑައިގެންފައިވާތީއެވެ. މިހާރު މިއޮތީ މުޅިން ތަފާތު ހާލަތަކަށް ފުރޮޅިފައެވެ. އެއީ ބަންޑާރަ ނައިބު ތައްޔާރުކޮށްފައިވާ "އެންޓި ޑިފެކްޝަން ބިލް" ޕީޕީއެމްގެ ޕީޖީ ލީޑަރު އަހުމަދު ނިހާން ހުސެއިން މަނިކު ވަނީ މަޖިލީހަށް ހުށަހަޅުއްވުމުން އަންނަ ފުރޮޅުމެކެވެ.

އެ ބިލްގައިވާ ގޮތުން މަޖިލީހަށް އިންތިހާބުވި ޕާޓީން މެންބަރު ވަކިކޮށްފިނަމަ ނޫނީ އަމިއްލައަށް ވަކިވެއްޖެ ނަމަ ނޫނީ ޕާޓީ ބަދަލު ކޮށްފިނަމަ މެންބަރުގެ ގޮނޑި ގެއްލޭނެއެވެ. މެންބަރެއްގެ ގޮނޑި ގެއްލޭނެ އާ ގޮތެއް ގާނޫނަކުން ކަނޑައަޅަނީއެވެ.

މިކަން ގާނޫނަކުން ކުރާއިރު ގާނޫނު އަސާސީގައި ރައްޔިތުންގެ މަޖިލީހުގެ މެންބަރެއްގެ ގޮނޑި ގެއްލޭނެ ގޮތްތައް ބަޔާންކޮށްފައިވެއެވެ. ގާނޫނު އަސާސީގެ 73 ވަނަ މާއްދާގައި މެންބަރުންގެ ހުންނަންޖެހޭ ޝަރުތުތަކާއި މެންބަރުކަން ގެއްލޭނެ ހަތަރު ހާލަތެއް ސާފުކޮށް ބަޔާންކޮށްފައިވެއެވެ. އެ މާއްދާގެ އިތުރުން ގާނޫނުއަސާސީގެ ރައްޔިތުންގެ މަޖިލީހުގެ ބާބުގައި ވެސް ސިޔާސީ ޕާޓީއެއްގެ ވާހަކަ ބުނެފައެއް ނުވެއެވެ. އެހެންވެ ޕާޓީ ބަދަލު ކުރުމަކީ މަޖިލީހުގެ މެންބަރުންނަށް މަނާ ކަމެއް ނޫންކަން ވަރަށް ސާފެވެ. ސުވާލަކީ ގާނޫނު އަސާސީއިން މަނާ ނުކުރާ ކަމެއް ގާނޫނަކުން މަނާ ކުރެވިދާނެ ހެއްޔެވެ؟

"ގާނޫނު އަސާސީގަ އޮންނަ ކަމެއް ގާނޫނަކުން ބަދަލެއް ނުކުރެވޭނެ، ގާނޫނު އަސާސީގަ އޮންނަ ކަމެއް ބަދަލު ކުރާ ނަމަ ފުރަތަމަ ޖެހޭނީ ގާނޫނު އަސާސީއަށް އިސްލާހެއް ގެންނަން، މި ބިލުން ކުރަން މިއުޅޭ ކަމަކީ ގާނޫނު އަސާސީ އިސްލާހު ކުރުން، އެކަމެއް ނުކުރެވޭނެ، އެކަމަކު މިއަދު ސަރުކާރަށް ނެތް އެ މެޖޯރިޓީއެއް މަޖިލީހުގަ، އެހެންވެ މިކަހަލަ ބިލްތައް ހުށަހަޅައިގެން މި މަސައްކަތް ކުރަނީ،" ކުރީގެ ސޮލިސިޓާ ޖެނަރަލް އިބްރާހީމް ރިފްއަތު ވިދާޅުވިއެވެ.

ރިފްއަތު ވިދާޅުވި ގޮތުގައި އެންޓި ޑިފެންކްޝަން ބިލްގައި ކަންކަން ބަޔާންކޮށްފައި ވަނީ ގާނޫނު އަސާސީގައި ބަޔާންކޮށްފައިވާ އުސޫލުތަކާ ދިމާ އިދިކޮޅަށެވެ. އެއީ ކޮށްގެން ވާނެ ކަމެއް ނޫނެވެ. އެކަން އެގޮތަށް ކުރުމުން ނުކުންނަ ނަތީޖާތަކުގައި އެއް ކަމަކަށް ގާނޫނު އަސާސީގެ، އަސާސީ ސިފައެއް ގެއްލިގެންދެއެވެ. ދެވަނަ ކަމަކަށް ރައްޔިތުން ވަކި ބާރުތަކެއް ވަކި ބަޔަކާ ހަވާލުކޮށްފައި އޮންނައިރު އެ އުސޫލާ ހިލާފަށް ރައްޔިތުންގެ މައްޗަށް ވެރިކަން ހިންގުމެވެ.

މަޖިލީހުގައި އިންނެވި ގާނޫނީ ގޮތުން އެންމެ ފުންނާބު އުސް ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު ދެކެވަޑައިގަންނަވާ ގޮތުގައި ވެސް ގާނޫނު އަސާސީއަށް ބަދަލު ނުގެނެސް މެންބަރުންގެ ގޮނޑި ގެއްލޭ ގޮތެއް ނުހެދޭނެއެވެ. ފްލޯ ކްރޮސް ކުރުމުން ގޮނޑި ގެއްލޭނެކަން ކަނޑައަޅަން ޖެހޭނީ ގާނޫނު އަސާސީގައި ފަސްވަނަ ހާލަތެއްގެ ގޮތުގައެވެ. ގާނޫނަކުން ކަނޑައަޅަން ޖެހޭނީ އޭގެ ތަފްސީލްތައް ނުވަތަ އިޖުރާއުތަކެވެ.

"އެންޓި-ޑިފެކްޝަނަށް އަމަލުކުރާ ގައުމުތައް މަދު ނަމަވެސް، އޭގެ ތެރެއިން ވެސް ގިނަ ގައުމުތަކުގައި މިކަން ބަޔާން ކޮށްފައި އޮންނަނީ، ގާނޫނު އަސާސީގައި މަޖިލިހުގެ ގޮނޑި ގެއްލޭ ހާލާތްތައް ބަޔާން ކުރުމުގެ ތެރޭގައި، އެކަމުގެ އެއް ހާލަތުގެ ގޮތުގަ، އަދި، ތަފްސީލުތައް އައިސްފައި ހުންނަނީ، އެންޓި-ޑިފެކްޝަން ގާނޫނުތަކުގަ،" ނަޝީދު ވިދާޅުވިއެވެ.

ލީޑަރުންގެ ބާރު ގަދަވެ ރައްޔިތުންގެ ބާރު ނެތުން

މިއީ ސިޔާސީ ބޭފުޅުން އަދި ގާނޫނީ ބޭފުޅުން ވެސް ކަންބޮޑުވާ ކަމެކެވެ. މިހާރު މަޖިލީހަށް ހުށަހަޅާފައިވާ ބިލުން ރައްޔިތުންގެ ބާރު ކެނޑިގެންދާނެ ކަމަށް އެ ބޭފުޅުން ދެކެވަޑައިގަންނަވައެވެ.

އެ ބިލްގައިވާ ގޮތުން ޕާޓީގެ ވިޕްލައިނާ ހިލާފުވެއްޖެނަމަ ނުވަތަ ސުލޫކީ ފިޔަވަޅެއް މެންބަރަކަށް އަޅައިފިނަމަ އެ މެންބަރެއްގެ ގޮނޑި ނުގެއްލޭނެއެވެ. އެކަމަކު ވިޕްލައިނާ ހިލާފުވެގެން ވިޔަސް އަޅާ ސުލޫކީ ފިޔަވަޅަކީ ޕާޓީން ވަކިކުރުން ކަމަށްވާނަމަ އެ މެންބަރެއްގެ ގޮނޑި ގެއްލުނީއެވެ.

މިހެންވެ މެންބަރު ނަޝީދު އުފައްދަވަނީ މި ސުވާލެވެ؛ އިންތިހާބުވަނީ ޕާޓީ ތަމްސީލު ކުރުމަށްތޯއެވެ؟ ނުވަތަ ރައްޔިތުން ތަމްސީލުކުރުމަށްތޯއެވެ؟

"ކޮންމެ ޕާޓީއެއްގެ ޓިކެޓުގައި ރާއްޖޭގެ ރައްޔިތުންގެ މަޖިލިހަށް ހޮވުނު ނަމަވެސް، މިހާތަނަށް ރައްޔިތުންނަށް ވިސްނިފައި އޮންނަނީ، މެންބަރުން އިންތިހާބުކޮށް މަޖިލިހަށް ފޮނުވަނީ، ވަކި ސިޔާސީ ޕާޓީއެއް ތަމްސީލުކުރަން ނޫން ކަމަށް، އެ އިންތިހާބީ ދާއިރާއެއްގެ ރައްޔިތުން ތަމްސީލު ކުރުމަށް ކަމަށް،" ނަޝީދު ވިދާޅުވިއެވެ.

އޭގެ ސަބަބުތައް ވެސް އޭނާ ދައްކަވައެވެ. ގާނޫނުއަސާސީގެ 75 ވަނަ މާއްދާގައި ވަރަށް ސާފު ބަހުން ބުނަނީ، ރައްޔިތުންގެ މަޖިލިހުގެ މެންބަރުން އަމަލު ކުރަން ވާނީ، ގައުމީ މަސްލަހަތާއި ރައްޔިތުންގެ ލާބައާއި މަންފާއަށް އިސްކަންދީގެނެވެ. އަދި، މެންބަރުންގެ އިންތިހާބީ ދާއިރާތައް ތަމްސީލުކުރުމުގައި، މުޅި ގައުމާއި ހުރިހާ ރައްޔިތުންގެ ލާބައާއި މަންފާއަށް ރިއާޔަތް ކުރުންވާނެއެވެ. މިއީ ޕާޓީގެ ފިކުރާއި ޕާޓީލައިން ހިފަހައްޓަން ލާޒިމުވާނަމަ، ކުރެވޭނެ ކަމެއް ނޫންކަން ނަޝީދު ފާހަގަކުރައްވައެވެ.

"ވިޕްލައިނަކާ ހިލާފަށް ވޯޓެއް ދީގެން ޕާޓީން ކަނޑާލުމަކީ، ނުވަތަ އިންތިހާބުވި ޕާޓީ ދޫކޮށްލުމަކީ، އިންތިހާބުކޮށްފައިވާ މެންބަރެއްގެ ރަސްމީ ވަޒީފާއަށް އަސަރެއް ކުރާގޮތަށް އޭނާގެ އިންތިހާބީ ގޮނޑި ގެއްލުވާލެވިދާނެ ސަބަބަކަށް ވާނެ ގޮތެއް ނޭނގޭ، ގާނޫނު އަސާސީގެ ހަތަރުވަނަ މާއްދާ ބުނާ ގޮތުން، ދައުލަތުގެ ބާރުތައް ފެށިގެން އަންނަނީ ވެސް ދެމި އޮންނަނީ ވެސް ރައްޔިތުންގެ ކިބައިގައި ކަމުގައިވާއިރު، ރައްޔިތުންގެ މަސްލަހަތަށް ވުރެ ޕާޓީ ލައިން އިސްވަނީ ކިހިނެއް ކަމެއް ވެސް ނޭނގެ،" ނަޝީދު ވިދާޅުވިއެވެ.

ގައުމު ދާއިރާގެ މެންބަރު އަދި ގާނޫނީ ވަކީލް ފައްޔާޒު އިސްމާއިލްގެ ހިޔާލު އަންނަނީ މިހެނެވެ: "މިހާރު މި ބިލް އޮތް ގޮތުން ޕާޓީތަކުގެ ލީޑަރުންނަށް އެބަ އޮތް މެންބަރުންނަށް ނުފޫޒު ފޯރުވެން، ޕާޓީން ކަނޑާލީމަ އެ ނިމުނީ، އެހެންވެ މެންބަރެއްގެ އަމިއްލަ ވިސްނުން އެއްކައިރި ކޮށްފައި ލީޑަރުން އަންގާ ގޮތަށް ޖެހޭނީ ވޯޓު ދޭން، ޕާޓީއާ ހިލާފަށް ވެސް ވޯޓު ދޭން ޖެހޭ ހާލަތު އަންނާނެ، ގާނޫނު އަސާސީ ބައްޓަންވެފައި އޮންނަނީ ސިޔާސީ ޕާޓީތަކަށް ބާރު ދޭ ގޮތަކަށް ނޫން، ރައްޔިތު މީހާއަށް ބާރުތައް ލިބޭ ގޮތަށް، މި ބިލުން މި ލިބެނީ ސިޔާސީ ޕާޓީތަކުގެ ލީޑަރުންނަށް މެންބަރުންނަށް ބޭނުން ގޮތެއް ހަދާލުމުގެ ބާރު، ރައްޔިތުންގެ ބާރު ގެއްލެނީ،"

ރައްޔިތުންގެ ބާރުގެ އިތުރަށް މި ބިލުން ސުޕްރީމް ކޯޓަށް ލިބިދީފައިވާ ބާރެއް ވެސް ވަނީ ކަނޑުވާލާފައެވެ. އެއީ ރައްޔިތުންގެ މެންބަރުންގެ ގޮނޑި ގެއްލިއްޖެ ކަމަށް ކަނޑައަޅާނީ ސުޕްރީމް ކޯޓުން އެކަނި ކަމަށް ގާނޫނު އަސާސީގަ އޮންނަ އޮތުމެވެ.

ރިފްއަތު ވިދާޅުވި ގޮތުގައި ސުޕްރީމް ކޯޓަށް އޮތް ބާރެއް އެހެން ވެސް ބަޔަކަށް ގާނޫނަކުން ނުދެވޭނެއެވެ. އެއީ ޕާޓީއެއްގެ ސުލޫކީ ކޮމެޓީއަކަށް ވެސް އަދި އިލެކްޝަން ކޮމިޝަނަށް ވެސް ގާނޫނަކުން ދެވޭނެ ބާރެއް ނޫނެވެ. ބިލްގައިވާ ގޮތުން ޕާޓީއަކުން މެންބަރުން ވަކިކޮށްފިނަމަ އެ މެންބަރެއްގެ ގޮނޑި ސުޕްރީމް ކޯޓުގެ ބަހެއް ނެތި ގެއްލޭނެއެވެ.

ރިޔާސީ ސިފައެއް ނޫން، ފަރުވާއެއް ވެސް ނޫން

ފްލޯ ކްރޮސްކުރުމުން ގޮނޑި ގެއްލޭ ގޮތަށް އޮތުމަކީ ބަރުލަމާނީ ސިފައެކެވެ. އެހެން އޮންނަ ގިނަ ގައުމުތަކަކީ ބަރުލަމާނީ ނިޒާމް އޮންނަ ގައުމުތަކެވެ. އެންމެ ކައިރިންނަމަ އިންޑިއާއެވެ.

އެހެން އެގޮތަށް ވަނީ ބަރުލަމާނީ ނިޒާމެއްގައި ސަރުކާރު އުފެދެނީ މަޖިލީހުގެ ތެރެއިން ކަމަށްވާތީ އިންތިހާބު ނިމި އަދި ސަރުކާރު އެކުލަވާލާއިރު މަޖިލީހުގެ ގޮނޑިތައް އެތުރިފައި ހުރި ގޮތަށް ހުރުމަކީ ސަރުކާރު ދެމިއޮތުމާ ސީދާ ގުޅިފައިވާ ކަމަކަށްވާތީއެވެ. އެ ނިޒާމްގެ ގައުމުތަކަށް ފްލޯ ކްރޮސިންއާ ދެކޮޅީ އެހެންވެއެވެ. އެއީ ޕާޓީތަކުގެ ކޮންޓްރޯލްގެ ދަށަށް ޕާޓީގެ މެންބަރުން ގެންދަން ކޮންމެހެން މުހިންމު ވާތީއެވެ.

އެހެން ނޫނީ ސަރުކާރު ވެއްޓުމުގެ ބިރު ބޮޑެވެއެވެ. ނަމަވެސް ބަރުލަމާނީ ނިޒާމްގެ ގައުމުތަކުން ވެސް މި އުސޫލު މިހާރު ދަނީ ދޫކޮށްލަމުންނެވެ. ސައުތު އެފްރިކާ އާއި ނިއުޒިލެންޑަކީ އެފަދަ ދެ ގައުމެވެ. ބަރުލަމާނީ ނިޒާމް އޮންނައިރު އެ އުސޫލު ނުގެންގުޅޭ ގައުމުތައް ވެސް އެބަ އޮތެވެ. އިނގިރޭސިވިލާތް ފާހަގަކޮށްލެވެއެވެ.

ރިޔާސީ ނިޒާމްތަކުގަ އެންޓި ޑިފެކްޝަން މުހިންމު ނުވާ ސަބަބު ނަޝީދު ވިދާޅުވެ ދެއްވިއެވެ. އެއީ ވެރިކަން ކުރާ ފަރާތުން ބޭނުންހާ އެއްޗެއް ފާސް ކުރުމުގެ ބަދަލުގައި މަޖިލީހުގެ ތެރެއިން ޒިންމާދާރު މަސައްކަތްތަކެއް ކުރުމުގެ ފުރުސަތު އޮތުމެވެ.

"ރިޔާސީ ނިޒާމުތަކުގައި ޕާޓީގެ ލައިނާ ދެކޮޅަށް ވޯޓު ދިން ނަމަވެސް ސަރުކާރަކީ، މަޖިލިހާ ވަކިން އޮންނަ ތަނެއް ވީމާ، ސަރުކާރުގެ ދެމި އޮތުމަށް، އެކަމުން އަސަރު ނުކުރާތީ ޕާޓީއާ އެއްކޮޅަށް ވޯޓު ނުދިނުމަކީ މާބޮޑު މައްސަލައަކަށް ނުވޭ، ހަމައެކަނި ތަފާތަކަށް ވަނީ ސަރުކާރުން ބޭނުންވާހާ ގޮތަކަށް އެ ސަރުކާރާ އެއް ޕާޓީއަކަށް ނިސްބަތްވާ މެންބަރުންގެ ވޯޓު ނުލިބުން، އަދި، މަޖިލިސް ތެރެއިން ކުރަންޖެހޭ ކަންކަން ކުރުމުގައި، ގިނަ މަޝްވަރާތަކެއް ކޮށްގެން، މެންބަރުންގެ ފަރާތުން ވެސް ބައެއް ކަހަލަ ބަދަލުތައް ގާނޫނުތަކަށް ގެނެސްގެން ކޮމްޕްރޮމައިޒްކުރުމާއި ގިވް އެންޑް ޓޭކްގެ އުސޫލުން ކަންކަން ކުރަންޖެހުން،" ނަޝީދު ވިދާޅުވިއެވެ.

އެންޓި ޑިފެކްޝަން ބިލް ހުށަހެޅި ބޭނުމަކަށް ބުނެފައި އޮންނަނީ ސިޔާސީ އަދި މާލީ ނުފޫޒުތަކުން މަޖިލީސް އެއްކިބާ ކުރުމާއި އާންމުންގެ އިތުބާރު ލިބިފައި އޮތް ތަނަކަށް ހެދުމެވެ. އެކަމަކު މި ބިލުން އެކަން ހާސިލު ނުވާނެ ކަމަށް މަޖިލީހުގެ މެންބަރު އަދި ގާނޫނީ ވަކީލް އިމްތިޔާޒު ފަހުމީ ގަބޫލު ކުރައްވައެވެ. ސަބަބަކީ ނަޒާހަތްތެރި ކަމަކީ އެމީހަކު އަމިއްލައަށް ހޯދާ އެއްޗެއް ކަމަށްވާތީއެވެ. ނޫނީ އެކަމަށް ހާއްސަ ގާނޫނުތައް ކަމުގައިވާ އެންޓި ކޮރަޕްޝަން ގާނޫނު ފަދަ ގާނޫނުތަކުން ގެނެސްދޭނެ ކަމެކެވެ.

"ނަޒާހަތްތެރިކަމަކީ އަމިއްލަ ނަފުސު، އަޅުގަނޑުގެ ނަޒާހަތްރިކަން ހިފަހައްޓާނީ އަޅުގަނޑު، ދެން އަޅުގަނޑާމެދު ތުހުމަތެއް ކުރެވޭނަމަ އެކަމާމެދު ސުވާލު އުފައްދައި އަޅުގަނޑަށް ފިލާވަޅު ދޭނީ ދާއިރާގެ ރައްޔިތުން، އަލުން އިންތިހާބުވާން ހޯދަން ދިޔައީމަ ރައްޔިތުން ގޮތެއް ނިންމާނެ،" އިންތި ވިދާޅުވިއެވެ.

މެންބަރު ނަޝީދު ވަނީ މިފަދަ ގާނޫނެއް ގެނައުމުގެ ބަދަލުގައި މިކަމަށް އޮތް އެހެން ހައްލެއްގެ ހިޔާލު ދެއްވާފައެވެ. ދައުރުގެ ތެރޭގައި ގޮނޑި ބަދަލު ކޮށްފިނަމަ، އޭނާގެ އިންތިހާބީ ހައިސިއްޔަތު ދައުރުގެ ބާކީއޮތް މުއްދަތަށް ދަމަހައްޓަން ފެނޭތޯ އޭނާގެ ދާއިރާގެ ރައްޔިތުންގެ ފެންނަ ނުފެންނަ ވޯޓެއް ނެގުމެވެ. ރިކޯލް ވޯޓެއްގެ ފުރުސަތު ރައްޔިތުންނަށް ދިނުމެވެ.

ގާނޫނީ ބޭފުޅުން ދެކެވަޑައިގަންނަވާ އަދި އެއްބަސްވެވަޑައިގަންނަވާ އެއް ކަމަކީ މި ބިލް ދުސްތޫރީ ނިޒާމާ ފުށު އެރުމެވެ. އެކަންކަން ހައްލު ކޮށްގެން ނޫން ގޮތަށް މި ބިލް ފާސް ކޮށްފި ނަމަ ނުކުންނަ ނަތީޖާ ރަނގަޅެއް ނުވާނެއެވެ. ދުސްތޫރީ ނިޒާމަށް އިތުރު ލޮޅުންތައް އަރާނެއެވެ. މަޖިލީހުގެ ތެރެއިން ބިލަށް ބަދަލުތަކެއް އައުމަކީ އެންމެންގެ ވެސް އުއްމީދެވެ.