ޕޮޕް ލަވަކިޔުންތެރިޔާ ޒޭން މާލިކް "ވަން ޑައިރެކްޝަން" އިން ވަކިވި ފަހުން ބޮލީވުޑާ ގުޅެން ޝައުގުވެރިކަން ގެންގުޅޭ ކަމުގެ އަޑުތައް މިފަހަކަށް އައިސް މިވަނީ ވަރަށް ބޮޑަށް ފެތުރިފަ އެވެ.
މިހަފުތާ ފެށިގެން އައީ މަޝްހޫރު ޑައިރެކްޓަރު ފަރާ ޚާންގެ ފިލްމު "މޭހޫނާ 2" ގައި ޒޭން ހިމަނަން ފަރާ ޝައުގުވެރިކަން ފާޅުކުރި ވާހަކަޔާ އެކު އެވެ.
ޒޭން މިހާރު ވަނީ ބޮލީވުޑްގެ ފިލްމަކަށް ލަވަކިޔައިދޭން އެއްބަސްވެފައިވާ ކަމަށް އިންޑިއާގެ ނޫސްތަކުން ބުނެ އެވެ. ބޮލީވުޑްގެ ހަބަރުތައް ގެނެސްދޭ ވެބްސައިޓްތަކުގައިވާ ގޮތުން، ޒޭން ލަވަކިޔާނީ 2014ވަނަ އަހަރު ނިކުތް ފިލްމު "ރާގިނީ އެމްއެމްއެސް 2"ގެ "ބޭބީ ޑޯލް" ލަވަކިޔައިދީފައިވާ ކަނިކާ ކަޕޫރާ އެކު އެވެ. މިހާތަނަށް ހުސް އިނގިރޭސި ލަވަކިޔާފައިވާ ޒޭންގެ މި ލަވަޔާ އެކު މިއީ އެހެން ބަހަކުން އޭނާ ލަވައެއް ހުށަހަޅައިދޭ ފުރަތަމަ ފަހަރު ކަމަށް ވާނެ އެވެ.
ޒޭން ލަވަކިޔާކަން އަދި ރަސްމީ ފަރާތަކުން ޔަގީންކޮށްދީފައި ނުވާއިރު، އޭނާ ލަވަކިޔުމަށް ހަމަޖެހިފައިވަނީ ހިންދީ ފިލްމަކަށް ކަމަށްވެ އެވެ. އަދި ކަނިކާ ވަނީ މިވަގުތު އޭނާއާ އެކު ޒޭން ލަވައެއް ކިޔުމަށް ހަމަޖެހިފައިވާ ކަމަށް ބުނާ ވާހަކައާ ބެހޭގޮތުން އެއްވެސް ވާހަކައެއް ދައްކަން ބޭނުންނުވާ ކަމަށް ބުނެފަ އެވެ. އެހެންނަމަވެސް ރަނގަޅު ވަގުތު ޖެހުމުން ހުރިހާ ކަމެއް ވެސް ހިއްސާކުރާނެ ކަމަށް ބުންޏެވެ.
މީޑިއާ ރިޕޯޓްތައް ބުނާގޮތުން މިދެތަރިން މިހާރު ވަނީ ބައްދަލުކޮށް، ލަވައިގެ މިއުޒިކްއާއި ބެހޭގޮތުން މަޝްވަރާ ވެސް ކޮށްފަ އެވެ.
"ވަން ޑައިރެކްޝަން" އިން ވަކިވި ފަހުން ޒޭން އޭޝިއާއަށް ދޭ ޝައުގުވެރިކަން ވަކިން ބޮޑުވެފައިވާ ކަމުގެ ވާހަކަތައް އަންނަނީ ދެކެވެމުންނެވެ.
އެގޮތުން ވޭތިވެދިޔަ ހަފުތާގައި ޒޭންގެ ސަޕޯޓަރަކު ވަނީ ބޮލީވުޑް ފިލްމުތަކުގެ ލިސްޓެއް ހިމެނުމަށްފަހު، އޭނާ ބަލަން އެންމެ ރަނގަޅު ފިލްމެއް ހޮވައިދިނުމަށް އެދިފަ އެވެ. ޖަވާބުގައި ޒޭން ވަނީ "މޭހޫނާ! ފިލްމުގެ ނަން ވަރަށް ގުޅޭ ވެސްމެ" ކަމަށް ބުނެ ޖަވާބުދީފަ އެވެ.
ޒޭންގެ ޓްވީޓްގެ ހަބަރު ލިބުމާ އެކު ޑައިރެކްޓަރު ފަރާ ވަނީ ޒޭން އަށް ޝުކުރުއަދާކޮށް، މިފިލްމުގެ ދެވަނަ ބައިގައި ޒޭން ބައިވެރިވާންވާނެ ކަމަށް ބުނެ ޓްވީޓެއްކޮށްފަ އެވެ.
ޒޭން، ފަރާގެ "މޭހޫނާ 2" އިން ބޮލީވުޑަށް ތައާރަފްވާން އުޅޭކަމަށް ދެކެވޭ ވާހަކަތަކާ ގުޅޭގޮތުން ފަރާ ބުނީ، އޭނާ އާއި ޒޭން ވަނީ "އޭޝިއަން ފިލްމު ފެސްޓިވަލް" އިން ދިމާވެފައިކަމަށާއި ޒޭން އަކީ ވަރަށް ރީތި މީހެއްކަމުން އޭނާގެ ފިލްމެއްގައި ޒޭން ނުހިމަނަންވީ އެއްވެސް ސަބަބެއް ނެތްކަމަށެވެ.
މަޝްހޫރުވާން ބޭނުންނުވާކަމަށް ބުނެ "ވަން ޑައިރެކްޝަނުން" ޒޭން ވަކިވުމާ އެކު އޭނާއަށް ސަޕޯޓްކުރާ އެތަކެއް ފޭނުންނެއްގެ ހިތްހަލާކުވެފައިވާއިރު، ޒޭން ބޮލީވުޑް އިން ފެނިގެންދިއުންވާނީ، ހިތްހަލާކުވެފައި ތިބި އެތަކެއް މިލިއަން ފޭނުންނަށް އުފާވެރި ހަބަރަކަށެވެ.
މިދިޔަ މަހުގައި ލަންޑަންގައި ބޭއްވި "ދަ އޭޝިއަން ފިލްމު ފެސްޓިވަލް"ގައި ސުޕަސްޓާ ޝާހްރުކް ޚާން އާއި ޒޭން ވަނީ ދިމާވެފަ އެވެ. އަދި މިފެސްޓިވަލްގައި ޝާހްރުކް ޒޭން އާއި އެކު ނެގި ސެލްފީ ވަނީ އިންޑިއާގައި އެންމެ ގިނައިން ރީޓްވީޓްކުރި ފޮޓޯގެ ރެކޯޑް ހަދާފަ އެވެ.
ބޮލީވުޑްގައި މިހާރުވެސް އަލީ ޒަފަރް، ފަވަދް ޚާން އާއި އާތިފް އަސްލަމް ފަދަ ޕާކިސްތާނަށް ނިސްބަތްވާ އެކްޓަރުންނާއި، ލަވަކިޔުންތެރިން ހަރަކާތްތެރި ވަމުން އަންނައިރު، މިތަރިންގެ ފަހަތުން ޒޭން ފެނިދާނެތޯ މިއީ މިހާރު ކުރެވޭ ސުވާލެކެވެ.