ހިޔާ މަޝްރޫއުގެ ދަށުން ހުޅުމާލޭގައި އަޅާ ފްލެޓްތަކުން ސިފައިންނަށް 300 ފްލެޓް ދޭން ސަރުކާރުން ނިންމައިފި އެވެ.
މިއަދު އެމްއެންޑީއެފުން ޔޫޓިއުބްގައި އާންމު ކުރި ވީޑިއޯއެއްގައި ޑިފެންސް މިނިސްޓަރު އާދަމް އާދަމް ޝަރީފް އުމަރު ވިދާޅުވީ، ދިވެހި ސިފައިންނަށް ހިޔާ މަޝްރޫއުން 300 ފްލެޓް ހާއްސަކޮށް، އެ ފްލެޓްތައް އަންނަ ހަފުތާ ހިސާބުގައި އިއުލާންކުރާނެ ކަމަށެވެ. އަދި ހައުސިން މިނިސްޓްރީ މެދުވެރިކޮށް ވަރަށް އަވަސް ޕްރޮސެސްއެއްގެ ތެރެއިން ފްލެޓްތައް ދިނުމުގެ ކަންކަން ކުރިއަށްގެންދާނެ ކަމަށެވެ.
"މި 300 ފްލެޓަކީ ސިފައިންނަށް ހާއްސަ ފްލެޓަށް ވާތީ ފްލެޓް ދޭނީ ސިފައިންގެ ލީޑާޝިޕުން ކަނޑައަޅާ ސިފައިންނަށް،" ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، 300 ފްލެޓް ދިނުމުގެ އިތުރަށް، ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް މިނިސްޓަރު ކަމުގައި ހުންނެވި އިރު ފެއްޓެވި ސިފްކޯ މަޝްރޫއު މަޑުޖެހިފައި ވަނިކޮށް އެ މަޝްރޫއުގައި ހުރި މައްސަލަތައް ހައްލުކުރެވި އެ ފްލެޓްތައް ވެސް މި އަހަރުގެ ނިޔަލަށް ނިންމައިލެވޭނެ ކަމަށް ޑިވެލޮޕަރުން މައުލޫމާތުދީފައިވާ ކަމަށެވެ.
މިނިސްޓަރު މިރޭ ވެސް ވަނީ ސިފައިންގެ މުއައްސަސާގެ ތެރޭގައި އެއްވެސް ހަމަނުޖެހުމެއް ނުހިނގާ ކަމަށް ވިދާޅުވެފަ އެވެ. އަދި ކުރިއަށް އޮތްތަނުގައި ވެސް އެ މުއައްސަސާ ހިނގަމުންދާނީ ބަދަހިކަމާއެކު ކަމަށް މިނިސްޓަރު އާދަމް ޝަރީފް ވަނީ މިރޭ އާންމުކުރި ވީޑިއޯގައި ތަކުރާރުކޮށް ވިދާޅުވެފަ އެވެ.