މާަލެ ހިޔަަ ފުރަގަހުގައި އޮންނަ ޕީޕީއެމްގެ "ރުމާލު 2" ޖަގަހާގައި ހުޅުޖަހައި ގެއްލުން ދީފި އެވެ. އެފަދަ މައްސަލައެއް ބަލަމުންދާ ކަމަށް ފުލުހުން ވެސް ވަނީ ކަށަަވަރުކޮށްދީފަ އެވެ.
ޕީޕީއެމްގެ ޔޫތު ވިންގެ ރައީސް އިބްރާހިމް ޔޫސުފް ވިދާޅުވީ ރޭ ފަތިހު 4:30 ހާއިރު ޕެޓްރޯލު ފުޅިއެއް ހިފައިގެން މީހަކު ޖަގަހަ ތެރެއަށް ވަނުމަށް މަސައްކަތް ކުރި ކަމަށާއި އެތަނުގައި ހުރި ސެކިއުރިޓީ ހުރަސް އެޅުމުން އޭނާއަށް ބިރު ދެއްކުމަށް ފަހު އޭނާ ދުރަށް ޖެއްސުމަށް ފަހު އެތެރެއަށް ވަދެގަތް ކަމަށެވެ. އަދި އެކަން ކުރަން ދެ މީހަކު އެތަނަށް އައިއިރު އެކަކު ބޭރުގައި ހުރެފައި ޖަގަހަ ތެރެއަށް ވަނީ އެންމެ މީހަކު ކަމަށް ސެކިއުރިޓީ ގާޑާ ހަވާލާދީ އިބްރާހިމް ވިދާޅުވި އެވެ.
ޖަގަހަ ތެރެއަށް ވަނުމަށް ފަހު ސްޓޭޖު މައްޗަށާއި ކާޕެޓަށް އަދި ޕެޓްރީލު އަޅައި ރޯކޮށްލާފައިވާ ކަމަށާއި އޭގެ ސަބަބުން ބޮޑެތި ގެއްލުންތައް ލިބި އަނދާ ހުލިވެފައިވާ ކަމަށް އޭނާ ވިދާޅުވި އެވެ.
"އަޅުގަނޑުމެންގެ ސްޓޭޖާއި ޕޮޑިއަމް އާއި ބެކްޑްރޮޕް ވެސް މި ހުންނަނީ ފިލައިގެން ހަދާފައި، ރޯކޮށްލުމުން ކިރިޔާ ޑެކުގައި ވެސް ރޯނުވެ މިހުރީ، މުޅި ޕޯޑިއަމްއާ ސްޓޭޖު މޭޒާ މިހުރީ ރޯވެފައި،" އިބްރާހިމް ވިދާޅުވި އެވެ.
އިބްރާހިމް ވިދާޅުވީ ރޯކުރި މީހުން ޕީޕީއެމްގެ ސޯޝަލް މީޑިއާ ޓީމުން މަސައްކަތް ކުރާ ފުރަތަމަ ފްލޯއަށް ވެސް އެރުމަށް މަސައްކަތްކޮށްފައިވާ ކަމަށެވެ. ނަމަވެސް އެތަނުގައި ދަނގަޑު ގޭޓެއް ހުރުމުން ކާމިޔާބު ނުވާ ކަމަށް ބެލެވޭ ކަމަށް އޭނާ ވިދާޅުވި އެވެ. އަދި ޖަގަހާގައި ސީސީޓީވީ ކެމެރާތައް ހުންނާނެ ކަމަށާއި ފުލުހަށް އެ ހުށަހަޅާފައިވާ ކަމަށް ވެސް އިބްރާހިމް ވިދާޅުވި އެވެ.