މީގެ ދެ އަހަރު ކުރިން މާލެ ކައިރީގައި އޮންނަ ފުށި ދިއްގަރު ފަޅަށް ދެ ޓަގު ބޯޓެއް އަރައި ފަރަށް ލިބުނު ގެއްލުމަށް 100 މިލިއަން ރުފިޔާގެ ޖޫރިމަނާއެއް އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އިން ކޮށްފި އެވެ.
ތިމާވެއްޓަށް ލިބޭ ގެއްލުމަށް ކުރާ އެންމެ މަތީ ޖޫރިމަނާއިން އެމައްސަލާގައި ޖޫރިމަނާ ކޮށްފައިވަނީ އޭރު އެ ދެ އުޅަނދުގެ އެޖެންޓުގެ ގޮތު އޮތް މެއިންލޭންޑް ޝިޕިން ޕްރައިވެޓް ލިމިޓެޑެވެ. މުތާ ރޯޔަލް ނަމަކަށް ކިޔާ ޓަގު ބޯޓަކާއި، މުތާ ގްރޭސް ބާޖު ކިޔާ ދެ ބޯޓު ފުށި ދިއްގަރު ފަރަށް އެރީ 2015 ވަނަ އަހަރުގެ ޑިސެމްބަރު މަހު އެވެ. ނަމަވެސް އެ ދެ ބޯޓު ފުން ނުކުރެވި ދުވަސްތަކެއް ދިޔަ އެވެ. ބާޖު ފުން ކުރީ ފަރަށް އެރިތާ ތިން މަސް ފަހުންނެވެ. ޓަގު ބޯޓު ފުންކޮށްފައިވަނީ މިދިޔަ އަހަރުގެ މާޗް މަހު އެވެ.
އެ ދެ ބޯޓުގެ މައްސަލާގައި މިމަހުގެ 14 ވަނަ ދުވަހު އީޕީއީން ވަނީ ކުންފުނި 100 މިލިއަން ރުފިޔާއިން ޖޫރިމަނާކުރިކަން އެކުންފުންޏަށް އަންގާފަ އެވެ. އަދި އެއް މަސްދުވަހުގެ ތެރޭގައި އެ ފައިސާ ދައުލަތަށް ދެއްކުމަށްވެސް އަންގާފައިވެ އެވެ.
އީޕީއޭ އިން ބުނީ، މެއިންލޭންޑް ދެ ބޯޓު ފުންކޮށް ނިމުމުން އެ ސަރަހައްދުގެ ތިމާވެށްޓަށް ލިބުނު ގެއްލުންތައް ބެލުމަށް އެ ސަރަހައްދު ބަލައި ސާވޭކުރި ކަމަށެވެ. އެގޮތުން ބެލިބެލުމުން އެ ފަރުގެ 4,370 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާކަން ފާހަގަކުރެވިފައިވާ ކަމަށެވެ.