ޕީޕީއެމްގެ ކެމްޕޭން ހަރަކާތްތައް ހިންގާ ރުމާލު ދޭއް ޖަގަހައިގެ ސްޓޭޖުގައި ރޭ ދަންވަރު އަލިފާން ރޯކޮށް އެތަނުގެ ތަކެއްޗަށް ގެއްލުންދީފައިވާތީވެ އެކަން ކުށްވެރިކޮށް، އެކަން ކުރި މީހުން ހޯދައި އެމީހުންނާ މެދު އަވަސް ފިޔަވަޅު އަޅަން އިދިކޮޅު ބޮޑު ޕާޓީ، އެމްޑީޕީން ގޮވާލައިފި އެވެ.
އެމްޑީޕީން މިހެން ގޮވާލާފައިވަނީ ޕީޕީއެމްގެ ރުމާލު ދޭއް ޖަގަހައިގެ ސްޓޭޖުގައި ރޭ ބަޔަކު ރޯކޮށްލި މައްސަލާގައި ނެރުނު ބަޔާނެއްގަ އެވެ.
ސިޔާސީ ހަރަކާތްތައް ހިންގާ ޖަގަހަތަކާއި އޮފީސްތަކާއި ސިޔާސީ ޕާޓީތަކުގެ މުދަލަށް ހަމަލާ ދިނުން މި ފަހަކަށް އައިސް އިތުރުވަމުން އަންނަކަން ފާހަގަކޮށް ނެރުނު އެ ބަޔާނުގައި ބުނީ، ޕާޓީތަކަށް ނިސްބތްވާ އެފަދަ ތަންތަނަށް ގެއްލުންދިނުމަކީ މުޅި ސިޔާސީ ނިޒާމަށް ދެވޭ ގެއްލުމެއް ކަމަށާއި އެކަން އެމްޑީޕީން ބަލައި ނުގަންނާނެ ކަމަށެވެ. ސިޔާސީ ިޒާމަށް ގެއްލުންދިނުމަށް ކުރާ އެފަދަ ކަންކަން ފުލުހުން ކުރާ ކަމަށްވެސް އެ ބަޔާނުގައި ތުހުމަތުކޮށްފައިވެ އެވެ.
"މި ޕާޓީން އިސްނަގައިގެން ހިންގާ ހަރަކާތްތަކަށް ފުލުހުން ހުރަސްއަޅައި ހުއްޓުވާއިރު ޕަޓީގެ މުދަލާއި ސިޔާސީ ހަރަކާތްތައް ހިންގުމަށް ކުއްޔަށް ހިފާ މުދަލަށްވެސް ބޭނުން ނުކުރެވޭ މިންވަރަށް ގެއްލުންދިނުމާއި، ހަރުގެތައް ރޫޅާލުމާއި، އެމްޑީޕީގެ ދިދަތައް ނެގުން ފަދަ ކަންކަން ފުލުހުންގެ ކިބައިން ތަކުރާރުކޮށް ފެންނަމުން އަންނަކަން ހިތާމައާއެކު ފާހަަގަ ކުރަަމެވެ،" އެމްޑީޕީގެ ބަޔާނުގައި ބުންޏެވެ.
ޕާޓީތަކާއި ޕާޓީތަކުގެ ހަރަކާތްތަކަށް ގެއްލުންވާ ގޮތަށް ކުރާ ކަންކަމަކީ އަނިޔާއަކަށް ވާއިރު، ސިޔާސީ ހަރަކާތް ހިންގާ ތަންތަނަށް ވަކި ފިކުރަކަށް ބެލުމެއްނެތި ހަމަހަމަ އުސޫލުން ރައްކާތެރިކަން ފޯރުކޮށްދިނުމަށް ސަލާމަތީ ހިދުމަތްތަކަށް ވެސް އެ ބަޔާނުގައި ގޮވާލާފައިވެ އެވެ.