ޑިޖިޓަލައިޒް ކޮށްފައިވާ ތައުލީމީ ނިޒާމެއް ރާއްޖޭގައި ގާއިމްކުރަން އެޑިއުކޭޝަން މިނިސްޓްރީން ފެށި މަސައްކަތް ފެށުމަކާ މިވަނީ ގާތްވެފަ އެވެ. މި އަހަރުގެ ދެވަނަ ޓާމާ އެކު ރާއްޖޭގެ ހުރިހާ ސްކޫލެއްގައި ޓެބްލެޓް ބޭނުންކޮށްގެން ކިޔަވައިދޭން ފަށާނެ ކަމަށް އެޑިއުކޭޝަން މިނިސްޓްރީން ވަނީ ބުނެފަ އެވެ. ޓައިމްލައިނާ އެއްގޮތަށް ޓެބްލެޓް ބޭނުންކުރަން ފެށުމަށް ވާންޖެހޭ ތައްޔާރީތައް ވެ ނިމި، މި މަހުގެ ތެރޭގައި ސްކޫލްތަކާ ޓެބްލެޓް ހަވާލުކުރަން ފަށާނެ ކަމަށް މިއަދު އެ މިނިސްޓްރީން ބުންޏެވެ.
ސަރުކާރު ސްކޫލްތަކުގެ ގޮތު ހިންގާ 212 ސްކޫލް ރާއްޖޭގައި ހުރި އިރު އެ ހުރިހާ ސްކޫލެއްގެ ދަރިވަރުންނާއި މުދައްރިސުން ބޭނުންކުރުމަށް 70،000 އަށްވުރެ ގިނަ ޓެބްލެޓް އެޑިއުކޭޝަން މިނިސްޓްރީން ވަނީ ގަނެފަ އެވެ. ގަތީ ވޭވޭ ބްރޭންޑްގެ މީޑިއާ ޕެޑް ޓީ 3 ޓެބްލެޓެވެ. 8 އިންޗީގެ އެޗްޑީ ސްކްރީނެއް ހިމެނޭ އެ ޓެބްލެޓުގެ ސްޓޯރޭޖް ކެޕޭސިޓީގައި 16 ޖީބީ ހުންނާނެއެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު މިއަދު "އަވަސް" އަށް ވިދާޅުވީ، ދެވަނަ ޓާމްގެ ކިޔެވުން ފަށާއިރު ހުރިހާ ސްކޫލެއްގައި ޓެބްލެޓް ބޭނުންކުރާނެ ކަމަށެވެ. ކުރިއާލައި ސްކޫލްތަކަށް ޓެބްލެޓް ދޫކުރަން ފަށަން ނިންމާފައިވަނީ ކަނޑައެޅިފައިވާ ވަގުތާ އެއްގޮތަށް އެކަން ކުރިއަށް ގެންދިއުމަށް ކަމަށެވެ. ޓެބްލެޓް ބޭނުންކުރުމަށް، ދިރާގާއެކު ވެވުނު އެއްބަސްވުމުގެ ދަށުން ރާއްޖޭގެ ހުރިހާ ސްކޫލެއްގައި ވައިފައި ސްޓްރަކްޗާ ވެސް މިހާރު ގާއިމްކޮށް ނިމި، އެކަން އެޑިއުކޭޝަން މިނިސްޓްރީއަށް ދިރާގުން އަންގާފައިވާ ކަމަށްވެސް ވިދާޅުވި އެވެ.
"ޓެބްލެޓް ބޭނުންކޮށްގެން ކިޔަވައިދޭން ދަތިނުވާނެ ގޮތަށް ދިރާގުން މިވަނީ ރާއްޖޭގެ ހުރިހާ ސްކޫލަކަށް ވައިފައި ވެސް ގުޅާފަ، އެކަން މިނިސްޓްރީއަށް ވެސް އަންގާފަ. އެހެން ނަމަވެސް އިތުރަށް ބޭނުންވާ ކަނެކްޝަންތަކެއް ހުރެއްޖެ ނަމަ އެކަންކަން ކުރިއަށް އޮތްތާނގަ ވެސް ދިރާގުން ކޮށްދޭނެ،" ޝަފީއު ވިދާޅުވި އެވެ.
މޭ މަހު ރާއްޖޭގެ ހުރިހާ ސްކޫލެއްގައި ޓެބްލެޓް ބޭނުންކުރަން ފަށާއިރު، ޓެބްލެޓް މަޝްރޫއުގެ ހަރަދުތައް ކުރަން ހަމަޖެހިފައިވަނީ ބައި ބަޔަށް ބަހާލައިގެންނެވެ. އެގޮތުން ޓެބްލެޓް މަޝްރޫއަށް މިއަހަރު އެކަނި ވެސް 150 މިލިއަން ރުފިޔާ ހަރަދުވާނެ ކަމަށް މިނިސްޓްރީން ވަނީ ބުނެފަ އެވެ. ޓެބްލެޓް މަޝްރޫއަށް މިއަހަރުގެ ބަޖެޓްގައި ހިމަނާފައިވަނީ 154 މިލިއަން ރުފިޔާ އެވެ.