ކުރިއަށް އޮތް ރިޔާސީ އިންތިހާބުގައި ވޯޓުލެވޭ މީހުންގެ ރަޖިސްޓްރީ އަންނަ މަހު އިއުލާންކުރާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ. އީސީން ބުނީ ވޯޓާސް ލިސްޓު އަންނަ މަހު އިއުލާންކުރި ނަމަވެސް ރީ ރަޖިސްޓްރޭޝަނަށް ހުޅުވާލާނީ ޖޫން މަހު ކަމަށެވެ.
އީސީގެ މެންބަރު އަހުމަދު އަކްރަމް މިއަދު "އަވަސް" އަށް ވިދާޅުވީ، މިއަހަރުގެ ރިޔާސީ އިންތިހާބުގެ ކަންކަން ވަގުތު އޮއްވައި އެއްވެސް ކަމަކަށް ދަތި ނުވާގޮތަށް ކުރުމަށް މިފަހަރު އިލެކްޝަން ކޮމިޝަނުން ވަރަށް ބޮޑަށް އިސްކަންދީފައިވާ ކަމަށެވެ. އެގޮތުން މިހާރު އެންމެ ބާރު ސްޕީޑެއްގައި އެ ކޮމިޝަނުން ކުރިއަށްގެންދަނީ ވޯޓާސް ލިސްޓު އެކުލަވައިލުމުގެ މަސައްކަތް ކަމަށާއި އެ މަސައްކަތް މިމަހުގެ ތެރޭގައި ނިމި އަންނަ މަހު ލިސްޓު އާންމުކޮށް އިއުލާންކުރާނެ ކަމަށެވެ.
އަކްރަމް ވިދާޅުވި ގޮތުގައި ރިޔާސީ އިންތިހާބަށް ތައްޔާރުވުމުގެ ގޮތުން އީސީން ކުރަމުންދާ އިދާރީ މަސައްކަތްތަކުގެ ބޮޑު ބައެއް މިހާރު ވަނީ ނިމިފަ އެވެ.
އަންނަ މަހު ވޯޓާސް ލިސްޓު އާންމުކުރާނެ ކަމަށް އީސީން ނިންމާފައިވާއިރު، ރީ ރަޖިސްޓްރޭޝަނާއި ލިސްޓަށް ޝަކުވާ ހުށަހަޅަން އިލެކްޝަން ކޮމިޝަނުން އެކަށޭނަ ވަގުތު ނުދޭ މައްސަލައަކީ ކޮންމެ އިންތިހާބަކާ ގުޅިގެން ފެންމަތިވާ މައްސަލައެކެވެ.
އަކްރަމް ވިދާޅުވީ، އިންތިހާބަށް ގިނަ ދުވަސްތަކެއް އޮއްވައި ވޯޓާސް ލިސްޓު މިފަހަރު އިއުލާންކުރަން ނިންމީ އެ ލިސްޓަށް ޝަކުވާ ހުށަހެޅުމަށް އާންމުން ބޭނުންވާ ވަގުތު ދިނުމުގެ ގޮތުން ކަމަށެވެ. އަދި ރީ ރަޖިސްޓްރޭޝަންގެ ކަންކަން ވެސް ވަގުތު އޮއްވައި ފަސޭހަކަމާއެކު ކުރެވޭނެ ފުރުސަތު ފަހިކޮށްދިނުމުގެ ގޮތުން ކަމަށެވެ.
އަންނަ މަހު ވޯޓާސް ލިސްޓު އިއުލާންކުރަން ނިންމާފައިވާ އިރު، އިންތިހާބުގެ އޮބްޒާވަރުންނާއި މޮނިޓަރުންނަށް ވުމަށް ވެސް އަންނަ މަހު އިއުލާޏްކުރާނެ ކަމަށް އީސީން މީގެ ކުރިން ވަނީ ބުނެފަ އެވެ.
އެ ކޮމިޝަނުން ބުނީ މި ފަހަރުގެ ރިޔާސީ އިންތިހާބަކީ ވަރަށް ދެފުށް ފެންނަ ޝައުގުވެރި އިންތިހާބަކަށް ހަދާނެ ކަމަށެވެ.