ކުރިއަށް އޮތް ރިޔާސީ އިންތިހާބާ ގުޅޭ މައުލޫމާތު ސިޔާސީ ޕާޓީތަކާ ހިއްސާކުރުމަށް ޕާޓީތަކާ އެކު ބައްދަލުވުމެއް ބާއްވަން އިލެކްޝަން ކޮމިޝަނުން ތާވަލުކޮށްފި އެވެ. އީސީން ބުނީ މާދަމާ އީސީގައި ބާއްވަން ހަމަޖެހިފައިވާ ބައްދަލުވުމަށް ހުރިހާ ސިޔާސީ ޕާޓީތަކަށް މިހާރު ދައުވަތު ދީފައިވާ ކަމަށެވެ.
އިލެކްޝަން ކޮމިޝަންގެ މެންބަރު އަހުމަދު އަކްރަމް މިއަދު "އަވަސް" އަށް ވިދާޅުވީ، މާދަމާގެ ބައްދަލުވުމަށް ދައުވަތު ދީފައިވަނީ ކޮންމެ ޕާޓީއަކުން ވެސް ހަތަރު ބޭފުޅުންނަށް ކަމަށެވެ. އެއީ ކޮންމެ ޕާޓީއަކުން ވެސް އެ ޕާޓީއެއްގެ ޕާލިމެންޓްރީ ގްރޫޕްގައި ހިމެނިވަޑައިގަންނަވާ ދެ ބޭފުޅަކާއި ޕޮލިސީ ލެވެލްގައި މަސައްކަތްކުރާ ދެ ބޭފުޅަކަށެވެ.
ބައްދަލުވުން އޮންނާނީ މާދަމާ ހެނދުނު 10:00 ގައި އިލެކްޝަން ކޮމިޝަންގެ އޮފީހުގަ އެވެ.
އަކްރަމް ވިދާޅުވީ، ބައްދަލުވުމުގެ މައިގަނޑު ބޭނުމަކީ އަންނަން އޮތް އިންތިހާބާ ގުޅިގެން ޕާޓީތައް މޮނިޓާކޮށް ރެގިއުލޭޓްކުރާނެ ގޮތްތަކާ ގުޅޭގޮތުން މަޝްވަރާކުރުން ކަމަށެވެ. އަދި އިންތިހާބު ކުރިއަށްދާނެ ގޮތާއި އިންތިހާބަށް އީސީން ވަމުންދާ ތައްޔާރީތައް ވަގުތު އޮއްވައި ޕާޓީތަކާ ހިއްސާކޮށް ވީހާވެސް ފަސޭހަ ނިޒާމެއްގެ ތެރެއިން އިންތިހާބަށް ތައްޔާރުވުމުގެ ކަންކަމަށް މަގުފަހިކުރުން ކަމަށެވެ.
"ކުރިންވެސް އަޅުގަނޑުމެން ބުނި ފަދައިން މި މަސައްކަތްކުރަނީ މި އަހަރުގެ ރިޔާސީ އިންތިހާބް ވަރަށް ފަސޭހަ އަމާން އަދި ދެފުށް ފެންނަ އިންތިހާބަކަށް ހެދުމަށް. މިކަމުގައި އެންމެ ބޮޑު ރޯލެއް ކުޅެދެވޭނެ އެއް ފަރާތަކީ ސިޔާސީ ޕާޓީތަކަށް ވާއިރު އަޅުގަނޑުމެން ބޭނުންވޭ އެ ފަރާތްތަކާ ވަރަށް ބޮދަށް ގުޅިގެން އިންތިހާބުގެ ކަންކަން ކުރިއަށް ގެންދަން،" އަކްރަމް ވިދާޅުވި އެވެ.
ސިޔާސީ ޕާޓިތަކާއެކު ކުރިއަށްގެންދަން ނިންމާފައިވާ ބައްދަލުވުމުގައި ޕާޓީތަކުން އެހެން ފަހަރުތަކެކޭވެސް އެއްގޮތަށް އެއްބާރުލުން ލިބޭނެ ކަމަށް އުންމީދުކުރައްވާ ކަމަށް އަކްރަމް ވިދާޅުވި އެވެ.
ސެޕްޓެމްބަރު މަހު ފަހުކޮޅު ބާއްވާ ރިޔާސީ އިންތިހާބަށް ތައްޔާރުވާން ސިޔާސީ ޕާޓީތަކުގެ މަޝްވަރާ ހޯދަން އިލެކްޝަނުން މަސައްކަތް ފަށާފައިވާއިރު، އިދިކޮޅު ފަރާތްތަކުން މިހާރުވެސް ދަނީ މިއަހަރު ބާއްވާ އިންތިހާބު އިންސާފުވެރިވެދާނެ ކަމާމެދު ސުވާލު އުފައްދަމުންނެވެ.