މޯލްޑިވިއަން އައިޑޮލް ސީޒަން ތިނެއްގެ ގާލާ ރައުންޑުގެ ގަދަ ހަތް ބައިވެރިންގެ ހުށަހެޅުންތައް ވަނީ ރޭގައި ގެނެސްދީފަ އެވެ. ގަދަ ހަތް ބައިވެރިން ލަވަ ހުށަހަޅާދިނީ "ރެގޭ ތީމް" ނުވަތަ 70 އަހަރުތަކުގައި މަޝްހޫރުވި ސްޓައިލްތަކުގެ ލަވަތަކެވެ.
ރޭގެ ޝޯ ކުރިއަށްދިޔައިރު ބެލުންތެރިން އެންމެ ގިނައިން ސުވާލު އުފެއްދީ ބައިވެރިން ހަމަ ހުށަހަޅާދިނީ ރެގޭ ލަވަތައް ހެއްޔެވެ. ބައެއް ބައިވެރިން ހުށަހެޅި ލަވަތަކުގެ އޮރިޖިނަލް ލަވައަކީ ރެގޭ ލަވައެއް ނޫނެވެ. އެ ލަވަތައް ގެނެސްދީފައިހުރީ ރެގޭ މިއުޒިކެއް ލައިގެންނެވެ. ނަމަވެސް ލަވައިގެ އޮރިޖިނަލް ރެގޭއަށް ނުވުމުން ބައިވެރިން ލަވަ ހުށަހެޅިއިރު އޮޑުކަމެއް ދެއްކި އެވެ.
"ރެގޭ" ލަވަތައް އެންމެ ފުރަތަމަ ތައާރަފުވީ 50ގެ އަހަރުތަކުގެ ތެރޭގައި ޖެމެއިކާން އިންނެވެ. މި ސްޓައިލްގެ ލަވަތައް އެންމެ މަޝްހޫރުވީ 70ގެ އަހަރުތަކުގެ ތެރޭގައި ޖެމެއިކާގެ ލަވަކިޔުންތެރިޔާ ބޮބް މާލޭ މިކަހަލަ ލަވަތައް ކިޔަން ފެށި ހިސާބުންނެވެ.
ޖަޖުންގެ ކޮމެންޓްސްއަށް ބަލާނަމަ ރޭގެ ޝޯގައި އެންމެ ފުރިހަމަ ހުށަހެޅުމެއް ފެނިގެންދިޔައީ މައީޝާ އަދި އަޒަލްގެ ފަރާތުންނެެވެ. މައީޝާ ހުށަހަޅާދިނީ ހައިޝަމް މުހައްމަދު ރާޝިދު ކިޔާފައިވާ ލަވަ "އާދޭ ނަޝާލަން" އެވެ. މި ލަވައަކީ ރާއްޖޭގެ ކުރީގެ މަޝްހޫރު ބައެއް ލަވަކިޔުންތެރިންނާއި ބެހޭގޮތުން ވާހަކަތަކެއް ގެނެސްދޭ ލަވައެކެވެ.
އައިޑޮލްގެ ޖަޖު ޒާރާ މުޖުތަބާ ކިޔާފައިވާ ލަވަ "ދޮހޮއްކޮބޭގެ ބަނބުކެޔޮ ޓްރީ" އަޒަލް ހުށަހަޅައިދިންއިރު، ރޭ އެންމެ ގިނަ ބަޔަކަށް ކަމުދިޔާއީ މި ލަވަ އެވެ. އަޒަލް މި ލަވަކީ އޮރިޖިނަލް ލަވައަށްވުރެވެސް މޮޅަށް ކަމަށް ބުނެ ބެލުންތެރިޔަކު ކުރި ޓުވީޓަކަށް ދިން ޖަވާބުގައި ޖަޖު ޒާރާ ބުނީ "މާ ބޮޑަށްވެސް" އެވެ.
ގަދަ ހަތް ބައިވެރިންގެ ތެރޭގައި ހިމެނެނީ އައިމިނަތު ސައިނާ މުހައްމަދު ރަޝީދު، ތަސްލީމް އަބްދުލް ކަރީމް، ނައުޝާދު އަބްދުލް ލަތީފް، ހަސަން ޝަހުދާން، މަރިޔަމް މައީޝާ، އައިޝަތު އަޒަލް ޒާހިރު އަދި ރައިހާން އާދަމް އެވެ.
މިރޭ އޮންނަ އެލިމިނޭޝަން ޝޯގައި އެއް ބައިވެރިޔަކަށް ޝޯއިން ވަކިވާންޖެހޭނެ އެވެ. ޝޯއިން ވަކިވާންޖެހޭނެ ބައިވެރިއެއް ކަނޑައަޅާނީ ބެލުންތެރިންގެ 50 އިންސައްތަ ވޯޓުންނާއި ޖަޖުންގެ 50 އިންސައްތަ މާކްސްއަށް ބެލުމަށްފަހު އެވެ. އާންމުންނަށް ވޯޓު ލުމުގެ ފުރުސަތު މިއަދު ހަވީރު 4:00 ޖަހަންދެން ވަނީ ހުޅުވާލާފަ އެވެ.