ދީނާ ގުޅޭކަންކަން ފިޔަވައި އީޔޫއިން ފާހަގަކުރި ކަންކަން އިސްލާހުކުރަން: ސަރުކާރު

ދެހާސް ސާދަ ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބް އޮބްޒާވް ކުރުމަށްފަހު އިންތިހާބީ ކަންކަން ހަރުދަނާ ކުރުމަށް އީޔޫގެ ވަފްދުން ހުށަހެޅި ކަންކަން ތަންފީޒުކުރަން މިހާތަނަށް ދިވެހި ސަރުކާރުން މަސައްކަތްތަކެއް ކޮށް އެކަން އީޔޫ އިލެކްޓޯރަލް ފޮލޯއަޕް މިޝަން (އީއެފްއެމް) އަށް އަންގާފައިވާއިރު ވެސް އެކަން އިއްޔެގެ ރިޕޯޓުގައި ފާހަގަކޮށްފައި ނުވުމުން ކަންބޮޑުވާ ކަމަށް ސަރުކާރުން ބުނެފި އެވެ.

ރާއްޖޭގައި އިންތިހާބުތައް ބޭއްވުމުގެ ކަންތައްތައް އިސްލާހު ކުރުމަށް އީޔޫއިން 2014 ވަނަ އަަހަރު 22 ހުށަހެޅުމެއް ހުށަހެޅިއެވެ. އަދި އެ ކަންތައްތަކަށް ރާއްޖޭން އަމަލުކޮށްފައި ވަނީ ކިހިނެތްތޯ ބަލަންް މިދިޔަ ޖެނުއަރީ މަހު ރާއްޖެއަށް ވަފުދެއް ފޮނުވި އެވެ. އޭގެ ކުރިން ތައްޔާރުވުމުގެ ދަތުރެއްގެ ގޮތުގައި 2017 ވަނަ އަހަރުގެ ސެޕްޓެމްބަރުމަހު ވެސް އީޔޫގެ ވަފުދެއް ރާއްޖެއަށް އައެވެ. ޖެނުއަރީމަހު އައި ވަފުދުން ރާއްޖެއާ ބެހޭ ގޮތުން ތައްޔާރުކުރި ރިޕޯޓު އިއްޔެ އާންމުކުރި އިރު ރަނގަޅުކުރަން ހުށަހެޅި ކަންކަން ފުރިހަމަ ކުރަން މިހާތަނަށް އައި އިރު ސަރުކާރުން އެކަށޭނަ މަސައްކަތްތަކެއް ކޮށްފައި ނެތް ކަމަށް އެ ރިޕޯޓުގައި ވަނީ ބުނެފަ އެވެ. އަދި ހަމަހަމަ މިނިވަން އިންތިހާބެއް ރާއްޖޭގައި ބޭއްވިދާނެ ކަމާމެދު ސުވާލު އުފެދޭ ގިނަ ކަންތައްތަކެއް ވެސް އެ ރިޕޯޓުގައި ފާހަގަކޮށްފައިވެ އެވެ.

އީޔޫ ފޮލޯއަޕް މިޝަންގެ އެ ރިޕޯޓަށް ރައްދުދީ ސަރުކާރުން ނެރުނު ބަޔާނުގައި ބުނީ، އިންތިހާބާ ބެހޭ ނިޒާމުގައި ހުރި އުނި ކަންކަން ރަނގަޅުކުރަން ކަމާބެހޭ މުއައްސަސާތަކާއި އެނޫންވެސް ފަރާތްތަކާ ގުޅިގެން މަސައްކަތް ކުރަމުންދާ ކަމަށެވެ. އަދި ރާއްޖޭގެ ގާނޫނު އަސާސީއާއި އިސްލާމްދީން ތަންދޭ މިންތަކުގެ ތެރެއިން އީޔޫން ހުށަހެޅި ކަންކަން ވެސް ރަނގަޅުކުރަން މަސައްކަތްތަކެއް ކޮށްފައިވާ ކަމަށެވެ.

އެގޮތުން 2014 ވަނަ އަހަރު އީޔޫއިން ހުށަހެޅި ކަންތައްތަކަށް އިޖާބަ ދިނުމުގެ ގޮތުން އިންތިހާބީ ނިޒާމަށް ބަދަލުތަކެއް ގެންނަން ބިލެއް ޑްރާފްޓުކޮށްފައިވާކަން އެ ބަޔާނުގައި ސަރުކާރުން ވަނީ ފާހަގަކޮށްފަ އެވެ. އެ ބިލް ޑްރާފްޓް ކޮށްފައިވަނީ އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަނާއި ޕީޖީ އޮފީހުގެ އިތުރަށް ފުލުހުންގެ އިދާރާގެ ދައުރު ތަފްސީލުކޮށް ކަނޑައަޅައި ވޯޓުލާ މީހުން ރަޖިސްޓްރީކުރުމާ ބެހޭގޮތުން 2013 ވަނަ އަހަރު ސުޕްރީމް ކޯޓުން ހުށަހެޅި 16 ނުކުތާގެ ގައިޑްލައިންގައި ހިމެނޭ ކަންކަމަށް ރިއާޔަތް ކޮށް އެކަންކަން ތަންފީޒުކުރެވޭނެ ގޮތުގެ މަތީން ކަމަށް ވެސް އެ ބަޔާނުގައި ބުނެފައިވެ އެވެ.

2014ގައި އީޔޫގެ ހުށަހެޅުންތައް:

"ބިލުގައި ވޯޓު ލާމީހުން ރަޖިސްޓްރީކުރުމާއި ރީ ރަޖިސްޓްރޭޝަނަށް ހުޅުވާލާނެ ގޮތުގެ ޓައިމްލައިން ކަނޑައަޅަންވީ ގޮތާއި މިނިވަން އިންސާފުވެރި އިންތިހާބަކަށް މަގު ފަހިވާނެ ފަދަ ގޮތަށް ކެމްޕޭންކުރަން ޖާގަދިނުން ފަދަ ކަންކަން ހިމަނާފައިވާނެ،" ބަޔާނުގައި ބުނެފައިވެ އެވެ.

ފޮރިން މިނިސްޓްރީން ބުނީ، ރާއްޖޭގެ ގަވާއިދުތަކާއި ގާނޫނުތައް ބިނާވެގެން އަންނާނީ އިސްލާމްދީނާއި އިސްލާމްދީނުގެ ހުދޫދުތަކުން ބޭރު ނުވާ ގޮތަށް ކަމަށެވެ. އެނޫން އެހެން ގޮތަކަށް ކަންކަން ބަދަލުކުރާނެ ޖާގައެއް ނެތް ކަމަށް ވެސް ބުންޏެވެ.

ފޮރިން މިނިސްޓްރީން މިހެން ބުނެފައިވާއިރު ރިޔާސީ އިންތިހާބުގެ ވަގުތު ބޯމަތިވެފައިވީ ނަމަވެސް މިނިވަން އިންސާފުވެރި އިންތިހާބުތައް ބޭއްވުމަށް ޓަކައި ރާއްޖޭގައި ގެންނަން ޖެހޭ އިސްލާހީ ބަދަލުތައް ކައިރި މުސްތަގުބަލެއްގައި ގެނެވިދާނެ ކަމަށް ނުދެކޭ ކަމަށް ޔޫރަޕިއަން ޔޫނިއަން(އީޔޫ) އިން ވަނީ ބުނެފަ އެވެ. އަދި 2014 ވަނަ އަހަރު ރާއްޖެއަށް ހުށަހެޅި 22 ހުށަހެޅުމުގެ ތެރެއިން ފުރިހަމައަށް ތަންފީޒުކޮށްފައި ވަނީ އެންމެ ކަމެއް ކަމަށާއި ތިން ކަމެއް ވަކި މިންވަރަކަށް ތަންފީޒުކޮށްފައިވާ ކަމަށް ވެސް އީޔޫގެ ރިޕޯޓުގައި ބުންޏެވެ.

ކުރިއަށް އޮތް އިންތިހާބުގެ ތައްޔާރީތައް އީސީން މިހާރު ފަށާފައިވާކަން ފާހަގަކޮށް އީސީން ވަނީ ރިޔާސީ އިންތިހާބު އޮބްޒާވްކޮށް ކަވާ ކުރަން ބޭރުގެ ފަރާތްތަކަށް ދައުވަތު ހުޅުވާލާފައިވާ ކަމަށް ވެސް ބުނެފަ އެވެ.