އައްޑޫ ސިޓީ ހިތަދޫ ފުއްޓަރު ފަރާތަށް މޫދަށް އެރިގެން އުޅެނިކޮށް ގެއްލުނު ދެކުދިންގެ ތެރެއިން ކުއްޖަކު ލައިގެންހުރި ކަމަށް ބެލެވޭ ޓީޝާޓެއް ފެނިފައިވާ ކަމަށް، އެމްއެންޑީއެފުން ބުނެފި އެވެ.
މޫދަށް އެރި އުޅެނިކޮށް ގެއްލިފައިވަނީ ހިތަދޫއަށް ނިސްނަތްވާ އުމުރުން 17 އަހަރުގެ އަލީ ފަހުމީ އާއި އުމުރުން 14 އަހަރުގެ މަޔާމިން އަލީ އެވެ.
އެ ދެ ކުދިން ހޯދުމުގެ މަސައްކަތް ކަނޑު މަގުންނާއި ވައިގެ މަގުން އެމްއެންޑީއެފުން އަދިވެސް ދަނީ ކުރަމުން އެވެ. މިހާތަނަށް ކުދިން ގެއްލުނު ސަރަހައްދު ހިމެނޭ ގޮތަށް ތިން ނޯޓިކަލް މޭލުގެ ސަރަހައްދެއް ބަލާފައިވާ އިރު އަދިވެސް ދެ ކުދިން ކުރެ ކުއްޖެއްގެ ހިލަމެއް ނުވެ އެވެ. ނަމަވެސް އޭގެ ތެރެއިން އެއް ކުއްޖަކު ލައިގެން ހުރި ކަމަށް ބެލެވޭ ޓީޝާޓެއް ރޭ ދަންވަރު ފެނިފައިވާ ކަމަށް ސިފައިން ވަނީ ބުނެފަ އެވެ.
އިއްޔެ މެންދުރު ހިތަދޫ ރީޖަނަލް ހޮސްޕިޓަލާ ދިމާލުން ފުއްޓަރަށް މޫދަށް އެރި އުޅުނީ ތިން ކުއްޖެކެވެ. އެތަނުން އެއްކުއްޖަކު ވަނީ ސަލާމަތްކުރެވިފަ އެވެ. އެކުއްޖާއަށް ހޮސްޕިޓަލްގައި ވަނީ ފަރުވާދީފަ އެވެ.