ނަސަންދުރަ އެއްބަސްވުމުގެ މައްސަލަ އެންޓި ކޮރަޕްޝަން ކޮމިޝަނުން މުރާޖައާ ކުރަމުންދާތީ އެ މައްސަލާގައި ކުރީގެ ނައިބު ރައީސް އަހުމަދު އަދީބު ދައުލަތަށް އެއްވެސް ފައިސާއެއް ދައްކަން ނުޖެހޭނެ ކަމަށް ނިންމައި ފިނޭންސް މިނިސްޓްރީން އަދީބަށް ސިޓީއެއް ފޮނުވައިފި އެވެ.
ނަސަންދުރަ މައްސަލާގައި ހަތް ދުވަހުގެ ތެރޭގައި ސަރުކާރަށް 74 މިލިއަނަށް ވުރެ ގިނަ ރުފިޔާ ދައްކަން އަހުމަދު އަދީބަށް ފިނޭންސް މިނިސްޓްރީ އިން ވަނީ މިދިޔަ މަހުގެ 28 ވަނަ ދުވަހު ސިޓީއަކުން އަންގާފަ އެވެ.
ފިނޭންސް މިނިސްޓަރު އަހުމަދު މުނައްވަރު ސޮއި ކުރައްވާ ފޮނުއްވި އެ ސިޓީގައި ބުނެފައި ވަނީ ނަސަންދުރާ ޕެލެސް ހޮޓަލް ހިންގުމަށް 2010 ވަނަ އަހަރު ގެލަކާސީ އެންޓަޕްރައިޒަސް މޯލްޑިވްސް ޕްރައިވެޓް ލިމިޓަޑާއެކުވެފައިވާ އެއްބައްވުމުގެ މުއްދަތު އިތުރު ކުރުމުގެ ބަދަލުގައި އެ އެއްބަސްވުން އުވާލާފައިވާ ކަމަށެވެ. އަދި މުއްދަތު އިތުރު ކުރުމަށް ފީއެއް ގޮތުގައި ދައުލަތަށް ދައްކަން ޖެހޭ ފައިސާ ނުހޯދާ އެ އެއްބަސްވުމުގައި ލީސް ހޯލްޑް ރައިޓްސް ގަނެފައިވާ އެންޕީއެޗް އިންވެސްޓްމަންޓް އާއި އެމްއެމްޕީއާރްސީ މެދުވެރިކޮށް އަލުން 50 އަހަރުގެ އެއްބަސްވުމަކަށް ގޮސްފައިވާތީ 74،016000 ރުފިޔާ ދައުލަތަށް ގެއްލުންވެފައިވާ ކަމަށާއި އެކަމަކީ އަދީބު ޓޫރިޒަމް މިނިސްޓަރުގެ މަގާމުގައި ހުންނަވައިގެން ދައުލަތަށް ފައިދާވާން އޮތް ކަމެއްގައި އެހެން ގޮތަކަށް އަމަލު ކުރުމުގެ ސަބަބުން ލިބުނު ގެއްލުމެއް ކަމަށް އެންޓި ކޮރޮޕްޝަން ކޮމިޝަނުގެ ތަހުގީގު ރިޕޯޓުގައިވާ ކަމަށެވެ.
އެހެންކަމުން އެކަމަށް އަދީބު ޒިންމާވާން ޖެހޭނެ ކަމަށް ބަލައި އެ ސިޓީ ލިބޭތާ ހަތް ދުވަސް ތެރޭގައި 74 މިލިއަން ރުފިޔާ ދައުލަތަށް ދައްކަން ޖެހޭނެ ކަމަށް އެ ސިޓީގައި ބުނެފައިވެ އެވެ. އަދި ފައިސާ ނުދައްކައިފި ނަމަ އެ މައްސަލަ އޭޖީ އޮފީހަށް ފޮނުވާނެ ކަމަށް ވެސް އެ ސިޓީގައި ބުނެފައިވެ އެވެ.
ނަމަވެސް އެ އިޓީ ބާތިލުކޮށް މިނިސްޓަރު އަހުމަދު މުނައްވަރު ސޮއިކުރައްވައި ފިނޭންސުން މިރޭ ނެރުނު ސިޓީގައި ބުނެފައިވަނީ، ނަސަންދުރަ މައްސަލަ އަލުން މުރާޖައާ ކުރާ ކަމަށް އޭސީސީ އިން އެ މިނިސްޓްރީއަށް އަންގާފައިވާ ކަމަށެވެ. އެހެންކަމުން މައްސަލައާ ގުޅިގެން ދައުލަތަށް 7416000 ރުފިޔާ ހޯދަން އަދީބަށް ދިން ހަތް ދުވަހުގެ ނޯޓިސް ބާތިލުކޮށްފައިވާ ކަމަށާއި އެ ނޯޓިސްއަށް އަދީބު އަމަލުކުރަން ނުޖެހޭނެ ކަމަށެވެ.
ނަސަންދުރާ ޕެލަސް ހޮޓަލް ހުރި ބިން އެއްވެސް އަގެއް ނެގުމަކާ ނުލައި ކުއްޔަށް ދީފައި ވަނީ، ރައީސް އަބްދުﷲ ޔާމީންގެ އާއިލީ ބޭފުޅެއްގެ މަސްލަހަތު އޮންނަ ކުންފުންޏަކަށެވެ. އެ ކުންފުނިން ޗައިނާގެ ކުންފުންޏަކާ ހަވާލުކޮށްގެން މިހާރު ގެންދަނީ އެ ބިމުގައި ސިޓީ ހޮޓަލަކާއި ސާވިސް އެޕާޓްމަންޓްތައް ހިމެނޭ ބޮޑު އިމާރާތެއް ހަދަމުން އެވެ.