ޕާޓީ ބަދަލުކުރި 12 މެންބަރުން ޕީޕީއެމުން ވަކި ވެފައިވަނީ މަޖިލީހުން ފާސްކޮށް ރައީސް ތަސްދީގުކުރައްވާފައިވާ އެންޓި ޑިފެކްޝަން ބިލަށް އަމަލުކުރަން ފަށާނެ ކަމަށް ގާނޫނުގައި ބުނެފައިވާ 13 ޖުލައި 2017 ގެ ކުރިން ކަމަށް ވުމުން އެއްވެސް މެންބަރެއްގެ ގޮނޑި ނުގެއްލޭނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ޖަރުމަނު ވިލާތުގައި ހުންނަވައި ގާސިމް މިއަދު ކުރެއްވި ޓުވީޓެއްގައި ވިދާޅުވީ، އެންޓި-ޑިފެކްޝަން ގާނޫނާ ގުޅޭ ގޮތުން ސުޕްރީމް ކޯޓުން ނިންމި ނިންމުމުން އެނގެނީ 12 މެންބަރުންގެ ތެރެއިން އެއްވެސް މެންބަރެއްގެ ގޮނޑި ނުގެއްލޭކަން ކަމަށެވެ. ޕީޕީއެމުން ވަކިވި މެންބަރުން އެ ޕާޓީން ވަކިވުމުގެ އިޖުރާތުތައް ހިންގާފައިވަނީ 13 ޖުލައި ގެ ކުރިން ކަން އެނގޭތީ މެންބަރުންގެ ގޮނޑިއާ ގުޅޭގޮތުން ސުވާލު ނު އުފެދޭ ކަމަށް ގާސިމް ވިދާޅުވި އެވެ.
އެންޓި ޑިފެކްޝަންގެ ގާނޫނު ބާތިލު ނޫންކަމަށް ސުޕްރީމްކޯޓުން ކަނޑައެޅުމާ ގުޅިގެން އިއްޔެ އިލެކްޝަން ކޮމިޝަނުން ވަނީ 12 މެންބަރުންގެ ގޮނޑި މިހާޜު ގެއްލިފައިވާކަމަށް ބުނެފަ އެވެ. އަދި ހުސްވެފައިވާ ގޮނޑިތަކަށް މެންބަރުން އިންތިހާބުކުރަން ބާއްވާ ބައި އިލެކްޝަނަށް ތައްޔާރުވާން ފަށައި އިންތިހާބު ބާއްވަން ބަޖެޓް ހޯދުމަށް ވެސް އެ ކޮމިޝަނުން ވަނީ ފިނޭންސް މިނިސްޓްރީއަށް ފޮނުވާފަ އެވެ.
ގޮނޑި ގެއްލިފައިވާ ކަމަށް އީސީން ނިންމާފައިވާ 12 މެންބަރުންނަކީ، މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނާއި ދަނގެތީ ދާއިރާގެ މެންބަރު އިލްހާމް އަހްމަދާއި ތިނަދޫ އުތުރު ދާއިރާގެ މެންބަރު އަބްދުﷲ އަހްމަދާއި، ވިލިނގިލި ދާއިރާގެ މެންބަރު ސައުދު ހުސައިން އާއި ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހީމާއި މަޑުއްވަރީ ދާއިރާގެ މެންބަރު މުހައްމަދު އަމީތާއި ދިއްދޫ ދާއިރާގެ މެންބަރު އަބްދުއްލަތީފް މުހައްމަދާއި ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީ އާއި ހަނިމާދޫ ދާއިރާގެ މެންބަރު ހުސެއިން ޝަހުދީ އަދި އިހަވަންދޫ ދާއިރާގެ މެންބަރު މުހައްމަދު އަބްދުﷲ (މުހަންމާ) އާއި ތިމަރަފުށީ ދާއިރާގެ މުހައްމަދު މުސްތަފާ އަދި ފުވައްމުލަކު އުތުރު ދާއިރާގެ މެމްބަރު އަލީ ޝާހެވެ.
އެންޓި ޑިފެކްޝަން ބިލް މަޖިލީހުން ފާސްކޮށްފައިވަނީ މިދިޔަ މަހުގެ 13 ވަނަ ދުވަހު އެވެ. އެ ބިލުގައިވާ ގޮތުން ރައްޔިތުން މަޖިލީހުގެ މެންބަރަކު އިންތިހާބުވި ޕާޓީން ވަކިކޮށްފި ނަމަ ނޫނީ އަމިއްލައަށް ވަކިވެއްޖެ ނަމަ ނުވަތަ ޕާޓީ ބަދަލުކޮށްފި ނަމަ ގޮނޑި ގެއްލޭނެ އެވެ. އަދި މިދިޔަ އަހަރުގެ ޖުލައި 13 ވަނަ ދުވަހުން ފެށިގެން އެފަދަ ހާލަތެއް މެންބަރަކަށް މެދުވެރިވެއްޖެ ނަމަ އެ މީހުންގެ މައްޗައް ވެސް ގާނޫނު ހިނގާނެ ކަމަށެވެ. ޖުލައި މަހުގެ 13 ވަނަ ދުވަހަކީ ފްލޯ ކްރޮސް ކޮށްފިނަމަ ގޮނޑި ގެއްލޭނެ ކަމަށް ސުޕްރީމް ކޯޓުން ހުކުމްކުރި ދުވަހެވެ.