ހުޅުމާލެ ގޭޓްވޭ އިންޓަނޭޝަނަލް ސްކޫލުން ވައްކަން ކުރަން ވަދެ އުޅުނު ދެ މީހަކު ފިލަން މަސައްކަތް ކުރަނިކޮށް ފުލުހުންގެ މަސައްކަތުން ހުއްޓުވައި ހައްޔަރުކޮށްފި އެވެ.
މި މައްސަލައާ ގުޅިގެން ހައްޔަރު ކޮށްފައިވަނީ 20 އަހަރާއި 37 އަހަރުގެ ދިވެހި ފިރިހެނުންނެވެ. މި ދެ މީހުން ހައްޔަރު ކޮށްފައިވަނީ މެއި އަށް ވަނަ ދުވަހުގެ 3:40 އެހާކަންހާއިރު ގޭޓްވޭ އިންޓަނޭޝަނަލް ސްކޫލު ފާރުމަތިން ފުއްމާލައިގެން ފިލަން މަސައްކަތް ކުރަނިކޮށެވެ. ދެ މީހުންގެ ތެރެއިން އެކަކު ހައްޔަރު ކޮށްފައިވަނީ ހުޅުމާލޭ ހިތިގަސްމަގުގެ ގޯޅިއަކުންނެވެ. އަނެއް މީހާ ހުޅުމާލޭގެ 48 ނަންބަރު ފްލެޓް ކައިރިންނެވެ.
އެ ދެމީހުން ހައްޔަރުކޮށް، ގޭޓްވޭ އިންޓަނޭޝަނަލް ސްކޫލާއި ސްކޫލް ކައިރި ބަލައި ފާސްކުރިއިރު، ފޯނަކާއި ދެ ދަތްގަނޑާއި ކަށިގަނޑުތަކެއްގެ އިތުރުން ދަބަހަކާއި އަންގިއާއި މާސްކެއް ފެނިފައިވެއެވެ.