ހުޅުމާލޭގެ ދެވަނަ ފިޔަވަހީގައި ހަތަރު ބުރީގެ ފަޔާ ސްޓޭޝަން އިމާރާތެއް އެޅުމަށް ނިންމައިފި އެވެ.
މި ފަޔާ ސްޓޭޝަން އިމާރާތް އަޅަން ނިންމާފައިވަނީ ހުޅުމާލެ ދެވަނަ ފިޔަވަހީގެ ލޮޓް 22230 ގަ އެވެ. މިއީ 1،738.18 އަކަ މީޓަރުގެ ބިމެކެވެ.
މަޝްރޫއުގެ ތިމާވެއްޓަށް އަސަރުފޯރާ މިންވަރު ބަޔާންކުރާ -- އެންވަޔަރަންމަންޓް އިމްޕެކްޓް އެސެސްމަންޓް (އީއައިއޭ) ރިޕޯޓްގައިވާ ގޮތުން ފަޔާ ސްޓޭޝަން އިމާރާތުގެ ތިރީބައިގައި އަލިފާން ނިއްވަން ބޭނުންކުރާ އުޅަނދުތަކާއި އަލާތްތައް ރައްކާކުރުމަށާއި ރިސެޕްޝަންގެ އިތުރުން ފެނާއި ކަރަންޓް ފަދަ ކަންކަމަށް ބޭނުންވާ ގޮޅިތައް ހިމެނެ އެވެ.
މިތަން އިމާރާތްކުރަނީ އިދާރީ ކަންކަމަށް ބޭނުންވާ ބައިތަކާއި ސްޓޭޝަންގައި ޑިއުޓީކުރާ މުވައްޒަފުން ނިދުމާއި ކެއުމަށް ބޭނުންވާ ކޮޓަރިތަކާއެކުގަ އެވެ.
އީއައިއޭ ރިޕޯޓްގައިވާ ގޮތުން މި މަޝްރޫއުގެ ސަބަބުން ކޮށްފާނެ އެންމެހާ ނޭދެވޭ އަސަރުތަކެއްވެސް ކުރުން އެކަށީގެންވަނީ ކޮންސްޓްރަކްޝަން މަރުހަލާގަ އެވެ.
އެގޮތުން ގިނަ އަސަރުތަކަކީ އެންމެ ފުރަތަމަ ކުރާ ސަބްސްޓްރަކްޗާގެ މަސައްކަތްތަކުން ކުރާ އަސަރުތައް ކަމަށް އީއައިއޭ ރިޕޯޓްގައިވެ އެވެ.