ޔުނައިޓެޑް އަރަބި އެމިރެޓްސް، ޔޫއޭއީގެ ބޮޑެތި ސިޓީތަކުގެ ކެފޭތަކާއި އާންމުތަންތަނުގައި ރޯދަ ވީއްލާ ވަގުތު ޝީޝާ ބޭނުން ކުރުން މަނާ ކުރަން އެ ސަރަހައްދުތަކުގެ ސަރުކާރުތަކުން ނިންމަން ފަށައިފި އެވެ.
އެގޮތުން ޔޫއޭއީގެ ވިޔަފާރީގެ މަރުކަޒު ދުބާއީގެ މުނިސިޕަލް ކައުންސިލުން ނިންމާފައި ވަނީ، ރޯދަ ވީއްލާ ވަގުތުން ފެށިގެން ރޭގަނޑު 9:00 އާ ހަމަޔަށް ކެފޭތަކާއި ކޮފީ ޝޮޕްތަކުގައި ޝީޝާ ބުޔުން މަނާކުރުމަށެވެ. އަދި މި ގަވާއިދާ ހިލާފުވާ ކެފޭތަކާއި އާންމު ފަރާތްތައް ޖޫރިމަނާ ކުރަން ވެސް އެ ސިޓީގެ ކައުންސިލް ވަނީ ނިންމައިފަ އެވެ. މީގެ އިތުރަށް، އަޖުމާން ސިޓީގެ މުނިސިޕަލް ކައުންސިލުން ވެސް މިހާރު ނިންމާފައި ވަނީ، ރޯދަ ވީއްލާ ވަގުތުން ފެށިގެން ރޭގަނޑު 9:00އާ ހަމަޔަށް އާންމު ތަންތަނާއި ކެފޭ އަދި ރެސްޓޯރަންޓްތަކުގައި ޝީޝާ ބުޔުން މަނާކުރުމަށެވެ.
އެހެން ބޮޑެތި ސިޓީތަކުން ވެސް މި އުސޫލަށް އަމަލުކުރަން ފަށާނެ ކަން އަންނަނީ އިއުލާން ކުރަމުން އެވެ.
ޝީޝާ މަނާކުރި ސިޓީތަކުގެ ފެޑަރަލް ކައުންސިލް ބުނީ، އެގޮތަށް ނިންމަން ޖެހުނީ، ރޯދަ ވީއްލާ ވަގުތު ޝީޝާ ބޭނުންކުރުން އާންމުވެ އެކަމުގެ ސަބަބުން އާންމުންގެ ސިއްހަތަށް ވަރަށް ބޮޑަށް ނުރައްކާވުމުގެ ފުރުސަތު އޮތުމުން ކަމަށެވެ.