އައްޑޫ ސިޓީ ހިތަދޫގައި ރުކަކުން ވެއްޓި ސީރިއަސް އަނިޔާތަކެއް ލިބުނު ޒުވާނާ ހޮސްޕިޓަލުގައި ފަރުވާދެމުން ދަނިކޮށް މަރުވެއްޖެ އެވެ. މިއަދު ހަވީރުގެ ވަގުތެއްގައި ހިނގި އެ ހާދިސާގައި އަނިޔާވި ޒުވާނާއަށް ހިތަދޫ ރީޖަނަލް ހޮސްޕިޓަލްގެ އައިސީޔޫގައި ފަރުވާދެމުން ދަނިކޮށް މަރުވެފައި ވަނީ މީގެ ކުޑައިރުކޮޅެއް ކުރިން އެވެ.
މަރުވެފައި ވަނީ، ސ.ހިތަދޫ، ފަލާހް، ހާތިމް ފައުޒީ، 31އ. އެވެ. އޭނާ މަރުވިކަން ހިތަދޫ ރީޖަނަލް ހޮސްޕިޓަލުން ވެސް ވަނީ ޔަގީންކޮށްދީފަ އެވެ. އެ ހޮސްޕިޓަލުން މީގެ ކުރިން ބުނެފައިވާ ގޮތުގައި، ހާތިމް އެ ހޮސްޕިޓަލަށް ގެނައި އިރުވެސް އޭނާގެ ބޮލަށް ވަނީ ސީރިއަސް އަނިޔާތަކެއް ވެފަ އެވެ. އަދި އަތާއި ފައިގެ އެކި ތަންތަނުގައި ރެނދުލައި އަނިޔާތައް ވެފައިވާ ކަމަށް ހޮސްޕިޓަލުން ބުނެފައިވެ އެވެ.
އެ ރަށުގެ ބައެއް މީހުން ބުނި ގޮތުގައި ހާތިމް ވެއްޓުނީ ރުއްދަށުގައި ހުރި ގާ ފުންޏެއްގެ މައްޗަށެވެ. އަދި އޭނާ ރުކަށް އެރީ ގޭ ކައިރީ މީހަކު ބުނެގެން ކުރުބާ އަޅައިދިނުމަށް ކަމަށްވެ އެވެ.