މަޝްހޫރު އެކްޓަރު ސަންޖޭ ދަތު ޖަލު ހުކުމުން މިނިވަންވީ ފަހުން އަލުން އެނބުރި ފިލްމީ ދާއިރާއަށް ނިކުންނަން އަންނަނީ ބުރަ މަސައްކަތްކުރަމުންނެވެ. ޖަލުން މިނިވަންވީ ފަހުން އޭނާ ކުޅުނު ފުރަތަމަ ފިލްމު، "ބޫމީ" ވަނީ މިދިޔަ އަހަރު ނިކުމެފަ އެވެ. އަދި މިފަހުން ވަނީ "ތޯރްބާޒް" ވެސް ޝޫޓްކޮށްފަ އެވެ. އަދި މިހާރު "ކަލަންކް" ޝޫޓްކުރަމުން އަންނައިރު، ކުރިއަށް ކުޅެން "ޝަމްޝޭރާ" އާއި "ޕާނިޕަތް" ވެސް އޭނާގެ އަތުގައި އެބަ އޮތެވެ.
އިއްޔެ ސަންޖޭ ވަނީ އިތުރު ފިލްމެއްގެ ޝޫޓިން ފަށާފަ އެވެ. މަނީޝާ ކޮއިރަލާ އެކު ދިހަ އަހަރު ފަހުން ކުޅޭ ފިލްމު "ޕްރަސްތާނަމް" އިއްޔެ ފެށިއިރު، އިއްޔެ އަކީ ސަންޖޭގެ މަންމަ އަދި ކުރީގެ މަޝްހޫރު ބަތަލާ ނަރްގިސްގެ އުފަންދުވަސް ވެސްމެ އެވެ.
ސަންޖޭ ލީޑްރޯލުން ފެނިގެންދާ އެ ފިލްމަކީ 2010 ވަނަ އަހަރު ހަމަ އެ ނަމުގައި ނެރުނު ތެލުގު ފިލްމުގެ ހިންދީ ރިމޭކެވެ. ސަންޖޭ އާއި މަނީޝާ ވަނީ އެކުގައި އަށް ފިލްމު ކުޅެފަ އެވެ. އެންމެފަހުން އެ ދެތަރިން ކުޅުނު ފިލްމަކީ 2008 ވަނަ އަހަރު ނިކުތް "މެހްބޫބާ" އެވެ.
އަލީ ފަޒަލް އާއި ސަތްޔަޖީތް ޑޫބޭ އަދި ސްވަރާ ބާސްކަރް މުހިންމު ރޯލުތަކުން ފެނިގެންދާ "ޕްރަސްތާނަމް" ގެ ހިންދީ ފިލްމު ވެސް ޑައިރެކްޓްކުރާނީ އެ ފިލްމުގެ ތެލުގު ފިލްމު ޑައިރެކްޓްކުރި ދޭވް ކައްޓާ އެވެ.
މި ފިލްމުގައި އެކްޓްކުރުމުގެ އިތުރުން ސަންޖޭ އަކީ މި ފިލްމު އެއް ޕްރޮޑިއުސަރު ވެސްމެ އެވެ.
މި ފިލްމުގެ ތެލުގު ފިލްމަށް ވަނީ ބޮޑު ކާމިޔާބީއެއް ލިބިފަ އެވެ. މި ފިލްމަކީ ޕޮލިޓީޝަނަކު ހުވަފަށްވެފައިވާ އަންހެނަކާ އިނދެ، ދޮންދަރިންގެ ބުރަ މަސައްކަތުން އޭނާ ނުފޫޒުގަދަ ސިޔާސީ ލީޑަރަަކަށް ވުމުން އަމިއްލަ ދަރިންގެ މެދުގައި ޖެހޭ މައްސަލަތައް ފެނިގެންދާ ފިލްމެކެވެ.