ޒުވާން އެކްޓަރު ރަންބީރު ކަޕޫރު ފިލްމުތަކަށް ހުއްޓޭ ސަމާލުކަމަށް ވުރެން އޭނާއާ ބަތަލާއިންނާ އޮންނަ ލޯބީގެ ގުޅުންތަކަށް ލިބޭ ސަމާލުކަން ބޮޑުވެ، ނޫސްތަކުގެ ފަލަ ސުރުހީތަކުން ޖާގަ ހޯދާލެއް ވެސް ގިނަ އެވެ.
މަޝްހޫރު ދެ ބަތަލާއިން ކަމަށްވާ ދިޕިކާ ޕަދުކޯން އާއި ކެޓްރީނާ ކައިފާ އެކު އޮތް ރަންބީރުގެ ލޯބީގެ ގުޅުމަށް ވެސް ބޮޑު ސަމާލުކަމަށް ލިބުނުއިރު، އެ ދެ ބަތަލާއިންނާ އެކު އޮތް ގުޅުން ނިންމާލިފަހުން ވެސް އަދިވެސް އެ ވާހަކަތައް ދެކެވެ އެވެ.
އެންމެފަހުން ރަންބީރު ލޯބީގެ ގޮތުން ގުޅިގެން އުޅުނީ ކެޓްރީނާއާ އެވެ. ހަ އަހަރު ވަންދެން ލޯބީގެ ގޮތުން ގުޅިގެން އުޅުމަށްފަހު އެ ދެތަރިން ރުޅިވިތާ މިހާރު ދެ އަހަރު ވެއްޖެ އެވެ.
މިދިޔަ އަހަރުގެ ތެރޭގައި ކަަރަން ޖޯހަރު އުފައްދާ އެންމެ އަގުބޮޑު ފިލްމު "ބްރަހަމަޝްތްރަ" ގެ ލީޑްތަރިންނަކީ ރަންބީރާއި ބަތަލާ އާލިއާ ބަޓް ކަމަށް އިއުލާންކުރުމާ އެކު މިދެތަރިން އަޅުވާކިޔަން ފެށުނެވެ. އޭގެފަހުން ފިލްމުގެ ޝޫޓިން މިދިޔަ އަހަރުގެ ފަހުކޮޅު ފެށުމުން އެ ވާހަކަ ދެކެވުން އިތުރަށް ގަދަވި އެވެ. ނަމަވެސް އެކަމާ ގުޅިގެން ދެ ތަރިން ކުރެ އެކަކު ވެސް އެއްވެސް ވާހަކައެއް ދައްކާފައެއް ނުވެ އެވެ. އަދި އެ ދެތަރިން ބޭރު ތެރެއިންނާ އެކި ހަފްލާތަކުން ފެންނަ ކޮންމެ ފަހަރަކު އެ ދެތަރިން އުޅެނީ ރައްޓެހިވެގެން ތޯ ނޫސްވެރިން އަހާ ސުވާލުތަކަށް ދެމުން އައީ ބީރު ކަންފަތެކެވެ.
މިދެތަރިން ލޯބީގެ ގުޅުމާ ބެހޭގޮތުން ތަފާތު ވާހަކަތައް ދެކެވެމުން ދަނިކޮށް އެންމެފަހުން ރަންބީރު ވަނީ ސީކިއު މަޖައްލާ އަށް ދިން އިންޓަވިއުއެއްގައި އާލިއާ އާ ލޯބީގެ ގޮތުން ގުޅިގެން އުޅޭކަން ޔަގީންކޮށްދީފަ އެވެ. ރަންބީރު ވަނީ އަދި އެ ދަރިންގެ ލޯބީގެ ގުޅުން އޮތީ ވަރަށް އާ ހަރުފަތެއްގައި ކަމުން އެކަމާ ގުޅޭގޮތުން ވާހަކަދައްކަން މާ އަވަސް ކަމަށް ބުނެފަ އެވެ.
މުޅިން އާ ލޯބިވެރިޔަކާ އެކު ކުރެވޭ އިހްސާސްތައް ހިއްސާކުރަމުން ރަންބީރު ވަނީ ކޮންމެ ފަހަރަކު ވެސް އާ ގުޅުމެއް ފެށިގެންދަނީ ވަރަށް ފޮނި އުންމީދުތަކަކާ އެކު ކަމަށެވެ. އަދި މިހާރު އޭނާގެ ދިރިއުޅުން ވަރަށް ބެލެންސް ކަމަށާއި މިހާރު އެކި ގުޅުންތަކަށް އޭނާގެ ހިތުގައި އޮންނަ ގަދަރު ބޮޑު ކަމަށެވެ. އަދި މާޒީގައި ލިބިފައިވާ ތަޖުރިބާއިން ވޭނުން ލިބޭ އަނިޔާ ވަރަށް ބޮޑުކަން ވަރަށް ބޮޑަށް މިހާރު އިހުސާސް ވާ ކަމަށް ވެސް ބުނެފަ އެވެ.
އާލިއާ އަށް ތައުރީފުކުރަމުން ރަންބީރު ވަނީ އެކްޓަރެއްގެ ގޮތުގައި އާލިއާގެ ފަރާތުން ފެންނަ ހުނަރުގެ ސަބަބުން އޭނާ އަށް ވެސް ކުރިއަށްދާން ބޮޑު ހިތްވަރެއް ލިބޭ ކަމަށް ބުނެފަ އެވެ.
އާލިއާ އަކީ މިހާރު ބޮލީވުޑްގެ އެންމެ ގަދަޔަށް ފިޔަޖަހަމުން އަންނަ ބަތަލާ އެވެ. މިފަހުން ރިލީޒްވި އޭނާގެ ހުރިހާ ފިލްމެއް ވެސް ވަނީ ހިޓްވެފަ އެވެ. އަދި އެންމެފަހުން ނިކުތް ފިލްމު "ރާޒީ" ވަނީ ބްލޮކްބާސްޓާ އަކަށް ވެފަ އެވެ.
ރަންބީރާއި އާލިއާ އެކުގައި ކުޅޭ ފުރަތަމަ ފިލްމު، "ބްރަހަމަޝްތްރް" ރިލީޒްކުރާނީ އަންނަ އަހަރުގެ އޮގަސްޓުގަ އެވެ. މި ދެތަރިން ލޯބީގެ ގޮތުން ގުޅިގެން އުޅޭކަން ޔަގީންކޮށްދިނުމާ އެކުގައި ފިލްމު ކުޅެން އިތުރު ފުރުސަތުތައް ލިބޭނެކަން ޔަގީނެވެ.
ރަންބީރު، ދިޕިކާ އާ ރުޅިވެ ކެޓްރިނާއާ ރައްޓެހިވި ހިސާބުން، ކެޓްރީނާ އާއި ދިޕިކާގެ މެދުގައި އޮތީ ފިނި ހަނގުރާމައެއް ފެށިފަ އެވެ. ދިޕިކާ އާއި ކެޓްރީނާގެ އެ ހިސާބުން ފެށިގެން އެއްވެސް ވާހަކައެއް ނުދައްކަ އެވެ. އަދި އެކުގައި ފިލްމު ކުޅެން ލިބޭ ފުރުސަތުތައް ވެސް ވަނީ ދޫކޮށްފަ އެވެ.
އާލިއާ އާއި ކެޓްރީނާ އަކީ ވަރަށް ގާތްދެތަރިންނެވެ. ރަންބީރު އާލިއާއާ ރައްޓެހިވެގެން އުޅޭކަން ޔަގީންކޮށްދިނުމުން އާލިއާ އާއި ކެޓްރީނާގެ އެކުވެރިކަމަށް ވާނެ ގޮތެއް ބަލަން ބެލުންތެރިން ތިބީ އިންތިޒާރުގަ އެވެ.