ޑެންމާކާ ދެކޮޅަށް ޕެރޫގެ ކުޅުންތެރިން މޮޅު ކުޅުމެއް ދެއްކި ނަމަވެސް ޑެންމާކު އަތުން 1-0 ޕެރޫ ބަލި ވެއްޖެ އެވެ.
މެޗުގެ 28 ވަނަ މިނެޓްގައި ޖެފާސަން ފާފަން އެންޑްރޭ ކެރިއޯ ތަނަވަސް ކޮށްދިން ބޯޅަ، ކެރިއޯ ފޮނުވާލުމުން ބޯޅަ ދިޔައީ ޑެންމާކުގެ ގޯލް ދަނޑި ކައިރިން ބޭރަށެވެ.
މުޅި މެޗުގައި ވެސް ޑެންމާކަށް ވުރެ ރަނގަޅަށް ކުޅެމުން ދިޔައީ ޕެރޫ އެވެ. އެ ޓީމުން ވަނީ ޑެންމާކުގެ ގޯލަށް އަމާޒުކޮށް ގިނަ ހަމަލާތަކެއް ފޮނުވާލާފަ އެވެ.
ފުރަތަމަ ހާފު ފަހު ކޮޅުގައި ޕެރޫއަށް ވަނީ ޕެނަލްޓީއެއް ލިބިގެން ގޮސްފަ އެވެ. ޑެންމާކުގެ ޕެނަލްޓީ އޭރިއާ ތެރެއިން ޔޫސުފް ޔުރާރީ ޕޯލްސަން، ޕެރޫގެ ފްލޮރޭސްއަށް ޗާޖު ކުރުމުން، ގެމްބިއާގެ ރެފްރީ ބަކަރީ ގައްސަމާ ފުރަތަމަ ދެއްކީ ޕެނަލްޓީއެއް ނޫން ކަމަށެވެ. ފަހުން ވީއޭއާރް ޓެކްނޮލަޖީ ބެލުމަށް ފަހު އޭނާ ނިންމީ ޕެނަލްޓީ އެއްކަމަށެވެ.
ކްރިސްޓިއަން ކްއޭވާއަށް ލިބުނު ޕެނަލްޓީ އޭނާ ފޮނުވާލީ ގޯލްގެ ހުރަސް ދަނޑިމަތިން ބޭރަށެވެ. އޭނާ މަސައްކަތް ކުރީ ޑެންމާކުގެ ކީޕަރު ކެޝްޕާ ޝްމައިކަލް ޑައިވް ކުރާ ފަރާތަށް ނޫން އަނެއް ފަރާތަށް ފޮނުވާލާށެވެ.
ޕެރޫ އިން ފުލުފުލުގައި ހަމަލާތައް އުފައްދަމުން ދިޔައިރު، ޑެންމާކަށް ލަނޑު ޖަހަން ފުރުސަތު ލިބުނީ ކައުންޓަ އެޓޭކުގައި ތަނަވަސް ކުރި ފުރުސަތަކުންނެވެ. ޑެންމާކުގެ ލަނޑު މެޗުގެ 59 ވަނަ މިނެޓްގައި ކްރިސްޓިއަން އެރިކްސަން ތަނަވަސް ކޮށްދިން ފުރުސަތަކުން ކާމިޔާބު ކުރީ ޕޯލްސަން އެވެ.
އޭގެ ފަހުން ޕެރޫގެ ކްއޭވާއަށް ވަނީ ލަނޑު ޖަހުމަށް ފުރުސަތު ލިބިގެން ގޮސްފަ އެވެ. އޭނާ އަށް ރަނގަޅަށް ފޮނުވާ ނުލުވުމުން، އެ ބޯޅަ ދިޔައީ ގޯލް ދަނޑި ކައިރިން ބޭރަށެވެ.
ޕެރޫގެ ގިނަ ހަމަލާތަކެއް ޑެންމާކުގެ ގޯލަށް އަމާޒުކޮށް ފޮނުވާލީ ކެރިއޯ އެވެ. ޕެނަލްޓީ އޭރިއާގެ ބޭރުން އޭނާ ފޮނުވާލި ބާރު ބޯޅަތައް ޑެންމާކުގެ ގޯލްގެ އެތެރެ ކޮށްލެވޭ ގޮތެއް ނުވި އެވެ.
ޕެރޫގެ ލުއިސް އެޑްވިން ކޫލާ ވަނީ އެ ޓީމުގެ ހަމަލާތަކުގައި މުހިންމު ދައުރެއް އަދާ ކޮށްފަ އެވެ.
މެޗު ނިމެން ފަސް ވަރަކަށް މިނެޓަށް ވެފައި ވަނިކޮށް އެރިކްސެން ވަނީ ކައުންޓަ އެޓޭކްގައި ލިބުނު ފުރުސަތެއްގައި، ނުރައްކާތެރި ބޯޅައެއް، ޕެރޫގެ ގޯލަށް ފޮނުވާލާފަ އެވެ. ނަމަވެސް އެ ބޯޅައަށް ހުރަސް އެޅީ ޕެރޫގެ ކީޕަރު ޕެޑްރޯ ގަލޭސޭ އެވެ.