ނުކުޅެދުންތެރިކަން ހުންނަ ފަރާތްތަކަށް "އެކްސެސިބިލިޓީ" އާއި "އިންކްލޫސިވިޓީ" ކަށަވަރުކޮށް ދިނުމަށް އެންމެ ބޭނުން އެއް ވަސީލަތަކީ ސްމާޓް ސިޓީތަކެއް ކަމަށް ޖެންޑާ މިނިސްޓަރު ޒެނީޝާ ޝަހީދު ޒަކީ ވިދާޅުވެއްޖެ އެވެ.
އެކަމަނާ މިހެން ވިދާޅުވީ ހޮޓެލް ޖެންގައި މިއަދު ފެށި "ޕްރޮމޯޓިން ޑިސްއެބިލިޓީ އިންކްލޫސިވް ޑިވެލޮޕްމަންޓް ފޯރަމް" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޒެނީޝާ ވިދާޅުވީ ސައިންސާއި ޓެކްނޮލޮޖީގެ ސަބަބުން ދިވެހިންގެ ޢާންމު ދިރިއުޅުމަށް މިއަދު ވަރަށް ބޮޑެތި ބަދަލުތަކެއް އައިސްފައިވާ ކަމަށާއި، ދިވެހިންނަކީ ޒަމާނީ ވަސީލަތްތަކުގެ ބޭނުން ފުޅާ ދާއިރާއެއްގައި ހިފާ ބައެއް ކަމަށެވެ. އެފަދަ ޚިދުމަތްތައް ފުރިހަމަވެފައިވާ ސިޓީތަކެއް ނުވަތަ ރަށްތަކެއް އުފެއްދުމަށް ސަރުކާރުން ފުޅާ ދާއިރާއެއްގައި އެކި ފަރާތްތަކާ މަޝްވަރާ ކޮށްފައިވާކަމަށެވެ.
އެކަމަނާ ވިދާޅުވީ ސްމާޓް ސިޓީގެ ސިޔާސަތަކީ ހަމައެކަނި އިންފޮމޭޝަން ޓެކްނޮލޮޖީގެ ވަސީލަތްތައް ފަސޭހައިން ލިބޭނެ މަގު ފަހިކުރުން ކަމުގައި ނުވާތީ، ހުޅުމާލެއަކީ ހުރިހާ ފަރާތްތަކަށް އިޖުތިމާއީ އަދި އިގްތިސޯދީ ގޮތުން އެކްސެސްވެވޭނެ ތަނަކަށް ހެދުމަށް ސަރުކާރުން އިސްކަން ދޭ ކަމަށެވެ.
ޔޫއެންޑީޕީ މޯލްޑިވްސްގެ ފަރާތުން ކުރިއަށްގެންދާ އެއް ދުވަހުގެ މި ފޯރަމްގައި ނުކުޅެދުންތެރިކަން ހުރި ފަރާތްތަކުގެ ހައްގުތައް ކަށަވަރުކުރުމަށް އެކުލަވައިލައިފައިވާ ގާނޫނުތަކާއި ސިޔާސަތުތަކާބެހޭ ޕްރެޒެންޓޭޝަނެއް ހުށަހެޅި އެވެ.