ދަތިތައް ހައްލު ކުރެވި ޝަރުއީ ދާއިރާގެ ތަރައްގީގެ ދުވެލި ހަލުވި ވެގެން ދިއުމާއި ކޯޓުތަކުގެ މަސައްކަތްތަކަށް ދިމާ ވެފައިވާ ދަތިތައް އަވަސް ގޮތެއްގައި ހައްލުވެގެން ދިއުމަށް ވަރަށް ބޮޑަށް އުންމީދު ކުރައްވާ ކަމަށް އާ އުއްތަމް ފަނޑިޔާރު ޑރ. އަހުމަދު އަބްދުﷲ ދީދީ ވިދާވެއްޖެ އެވެ.
އެ މަނިކުފާނު މިހެން ވިދާޅުވީ ޝަރުއީ ދާއިރާގެ ގަޟާއީ އަހަރު 2018 އިފްތިތާހުކޮށްދެއްވައި ރޭ ބަނޑޮސް އައިލެންޑް ރިސޯޓްގައި ދެއްކެވި ވާހަކަފުޅުގަ އެވެ.
އެމަނިކުފާނު ވިދާޅުވީ ޖުޑީޝަލް އެޑްމިނިސްޓްރޭޝަނާއި ޖުޑީޝަލް އެކަޑަމީގެ އިންސްޓިޓިޔުޝަނަލްގެ ބިލިއްޔަތުކަން އިތުރު ކުރެވި، އެ ތަންތަނުން ޝަރުޢީ ދާއިރާގެ ކުރިއެރުމަށް ކުރާ މަސައްކަތްތަކަކީ އެންމެ މަތީ ފެންވަރުގައި ކުރެވޭ، ނަތީޖާ ނުކުންނަ މަސައްކަތްތަކަކަށް ވާންޖެހޭ ކަމަށެވެ.
އުއްތަމަ ފަނޑިޔާރު ވިދާޅުވީ މިދިއަ އަހަރަށް ބަލާ އިރު، ގިނަ ގޮންޖެހުންތަކަކާ ކުރިމަތި ވެފައިވާ ކަމަށެވެ. \
"އޭގެ ނަތީޖާއެއްގެ ގޮތުން، ކޯޓުތަކަށް ބޭނުން ވާ ހަރުމުދާ ހޯދުމަށާއި، ޝަރުޢީ ދާއިރާއިން ކަނޑައަޅައިފައި ވާ ދިގު ރާސްތާގެ ލަނޑުދަނޑިތައް ޙާޞިލު ކުރުމަށް ޓަކައި ކޮންމެހެން ކުރާން ޖެހޭ އިންވެސްޓްމަންޓުތަކަށާއި، އަލަށް ފާސް ކުރެވުނު ޤާނޫނުތަކުން ލާޒިމު ކުރާ ބައެއް އިންތިޒާމުތައް ހަމަޖެއްސުމުގައި ދަތިތައް ދިމާ ވެފައި ވޭ." އެމަނިކުފާނު ވިދާޅުވިއެވެ. "އަޅުގަނޑުގެ އުއްމީދަކީ މި އަހަރާއި، އަދި ކުރިޔަށް އޮތް އަހަރުތަކުގައި ޝަރުޢީ ދާއިރާގެ ތަރައްޤީގެ ދުވެލި ހަލުވި ވެގެން ދިޔުން. ކޯޓުތަކުގެ މަސައްކަތްތަކަށް ދިމާ ވެފައި ވާ އެކިއެކި ދަތިތައް އަވަސް ގޮތެއްގައި ޙައްލު ކުރެވިގެން ދިޔުން. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، ދިވެހިރާއްޖޭގެ ޖުޑީޝަލް އެކަޑަމީގެ އިންސްޓިޓިޔުޝަނަލް ޤާބިލިއްޔަތުކަން އިތުރު ކުރެވި، އެ ތަންތަނުން ޝަރުޢީ ދާއިރާގެ ކުރިއެރުމަށް ކުރާ މަސައްކަތްތަކަކީ އެންމެ މަތީ ފެންވަރުގައި ކުރެވޭ، ނަތީޖާ ނުކުންނަ މަސައްކަތްތަކަކަށް ވެގެން ދިޔުން."