މީހެއްގެ އަޅަކަށް ނުވެ މީހުންގެ މީހެއްގެ ގޮތުގައި ރައްޔިތުންގެ އަޑު އައްސަވާނެ ކަމުގެ ޔަގީންކަން ދެއްވާ ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު، އިބޫ މިރޭ ވިދާޅުވެއްޖެ އެވެ.
ރިޔާސީ ކެންޑިޑޭޓްގެ ގޮތުގައި ދެއްވި ފުރަތަމަ ތަގުރީރުގައި އިބޫ ހާއްސަ ތިން ވައުދެއްވެވަޑައިގަތެވެ. އެގޮތުން ފުރަތަމަ ވިދާޅުވީ، މީހުންގެ މީހަކަށް ވާނެ ކަމުގެ ޔަގީންކަން އަރުވާ ކަމަށެވެ. ދެން ވިދާޅުވީ، މާތްﷲ ފިޔަވައި އެހެން މީހެއްގެ އަޅަކަށް ވެވަޑައިނުގަންނަވާނެ ކަމަށެވެ. ތިންވަނަ ކަމެއްގެ ގޮތުގައި އިބޫ ވައުދުވެވަޑައިގެންނެވީ ރައްޔިތުންގެ ވާހަކަތައް އަޑު އައްސަވާނެ ކަމުގެ އެވެ.
އޭގެއިތުރުން އެމްޑީޕީއިން މިއަދު ލޯންޗުކުރި މެނިފެސްޓޯއާ ގުޅޭ ބައެއް ވައުދުތައް ވެސް ވެވަޑައިގެންނެވެ. އެންމެ މުހިންމު ކަމެއްގެ ގޮތުގައި އިބޫ ފާހަގަކުރެއްވީ އިންސާފެވެ. އިބޫ ވިދާޅުވީ މިއަދު ރާއްޖެއަށް ބޭނުން ވަނީ އިންސާފު ހޯދައިދިނުން ކަމަށެވެ. ރާއްޖޭގެ ތަރައްގީއަށާއި ހަމަޖެހުމާއި އަމާންކަމަށް ވެސް އެންމެ މުހިންމީ އެކަން ކަމަށެވެ.
ރާއްޖޭގެ އިގްތިސޯދު މިހާރަށްވުރެ އުހަށް ގެންދިޔުމުގެ ގާބިލްކަން ދިވެހިންގެ އެބަހުރި ކަމަށާއި އިގްތިސޯދު ކޮޅަށް ޖަހާނެ ވިޔަފާރިވެރިންނަށް ފުރުސަތުތައް ހުޅުވާލާނެ ކަމަށެވެ. އިދިކޮޅުގެ ސަރުކާރަކުން އެންމެ އިސްކަން ދޭނީ އެންމެންނަށް ހަމަހަމަ ފުރުސަތުތައް ދިނުން ކަމަށް ވެސް ވިދާޅުވި އެވެ.
އިބޫ ވިދާޅުވީ، އިންޑިއާ ކަނޑުގެ ހަމަޖެހުން ނެގެހެއްޓުމަށް އިސްކަންދީ، ގައުމުތަކާ ދެމެދު ހީނަރުވެފައިވާ ގުޅުންތައް ހަރުދަނާ ކުރައްވާ ކަމަށެވެ. ސަލާމަތީ ހިދުމަތްތައް ސިޔާސީ ނުފޫޒުން އެއްކިބާކޮށް ރައްޔިތުންނަށް ހިދުމަތް ކުރާ ބަޔަކަށް ހަދާނެ ކަމަށް ވެސް އިބޫ ވިދާޅުވި އެވެ.
އިބޫ ވިދާޅުވީ، ރައްޔިތުން ބޭނުން ވަނީ ހެޔޮ ބަދަލެއް ކަމަށާއި އެ ބަދަލު ގެނެވޭނީ އިދިކޮޅު ޕާޓީތައް އެކުގައި މަސައްކަތް ކޮށްގެންކަން އެއީ ހަގީގަތް ކަމަށެވެ. ސިޔާސީ ހަޔާތުގެ 25 އަހަރު ރައްޔިތުންގެ މަޖިލީހުގެ ހޭދަ ކުރެއްވިއިރު ތަފާތު ހިޔާލުތަކުގެ މީހުންނާއެކު މަސައްކަތް ކުރެއްވުމުގެ ފުރުސަތު ލިބިފައިވާ ކަމަށެވެ.
"ރާއްޖެއަށް މިހާރު ބޭނުން ވަނީ ހަމަހިމޭން ވަގުތު ކޮޅެއް، އެ ވަގުތު ކޮޅު އިރާދަކުރެއްވިއްޔާ އަޅުގަނޑުމެން އެކުގައި މަސައްކަތް ކޮށްގެން ގެނެވިދާނެ،"އިބްރާހިމް މުހައްމަދު ސޯލިހު، އިބޫ
"އަޅުގަނޑު ކުރިމަތިލާން ޖެހުނީ އަޅުގަނޑާ ހިޔާލު ތަފާތު މީހުންނާ، އަޅުގަނޑަށް މިއަދު ވެސް ޔަގީންކަން އެބަ އޮތް ހިޔާލު ތަފާތު މީހުންނާއި ތަފާތު ހިޔާލުގެ މީހުންނާއެކު މަސައްކަތް ކުރެވޭނެ ކަމުގެ،" އިބޫ ވިދާޅުވި އެވެ.
އިބޫ ވިދާޅުވީ، ކަންކަމުގެ ހައްލު ހޯދޭނީ މަޝްވަރާކޮށްގެން ކަމަށެވެ. ދޫދޭންޖެހޭ ހާލަތްތަކުގަ ދޫދީގެން ކަމަށެވެ. މިއަދު ރާއްޖެއަށް ކުރިމަތިވެފައިވާ އަނިޔާވެރިކަމުން ސަލާމަތް ކުރެވޭނީ އެކުގައި މަސައްކަތް ކޮށްގެން ކަމަށެވެ.
"ރާއްޖެއަށް މިހާރު ބޭނުން ވަނީ ހަމަހިމޭން ވަގުތު ކޮޅެއް، އެ ވަގުތު ކޮޅު އިރާދަކުރެއްވިއްޔާ އަޅުގަނޑުމެން އެކުގައި މަސައްކަތް ކޮށްގެން ގެނެވިދާނެ،" އިބޫ ވިދާޅުވި އެވެ.
އެމްޑީޕީގެ ރައީސް މުހައްމަދު ނަޝީދު ކެންޑިޑޭޓަކަށްވުމަކީ އަބަދުވެސް އެދިވަޑައިގަތް، އަދި މިހާރު ވެސް އެދިވަޑައިގަންނަވާ ގޮތް ކަމަށެވެ. މިހާރަށް ރައީސް ނަޝީދަށް ފުރުސަތު ނެތް ނަމަވެސް އެމްޑީޕީގެ މެންބަރުން ރައީސް ނަޝީދާމެދު ދެކޭ ހުވަފެން ހަގީގަތަކަށް ހަދަން ކުރެވެން ހުރި ހުރިހާ ކަމެއް ކުރައްވާނެ ކަމަށް ވެސް އިބޫ ވިދާޅުވި އެވެ.
އިބޫއަށް އެމްޑީޕީގެ ރިޔާސީ ޓިކެޓް ދިނުމަށް މިރޭ ކޮންގްރެސްއިން ފާސްކުރީ ކޮންގްރެސްގައި ބައިވެރި 791 މަންދޫބުންގެ ފުރިހަމަ އަގުލަބިއްޔަތާއެކު އެވެ. އިބޫއަށް ތާއިދުކޮށް ގިނަ މަންދޫބުން ވާހަކަ ވެސް ދައްކަވާފައިވެ އެވެ. އިބޫއަށް ޓިކެޓް ދީފައިވީ ނަމަވެސް އަދިވެސް ރައީސް ނަޝީދަށް ފުރުސަތެއް ލިބިއްޖެނަމަ ކެންޑިޑޭޓަކީ އެމަނިކުފާނެވެ.