އިދިކޮޅު ޕާޓީތަކުން އެއް ގަލަކަށް އެރީ ވަރަށް ހާލުންނެވެ. ތަފާތު ހިޔާލުތައް އުފެދި މައްސަލަތައް ހޫނުވެ ކޯލިޝަން ވެސް ރޫޅެން ގާތްވެފައިވަނިކޮށެވެ. އެކަމަކު އެންމެ ފަހު ވަގުތު އެއް ކެންޑިޑޭޓެއް ދައްކައި ޕާޓީތަކުން ސަޕޯޓަރުން ހެއްވާލި އެވެ. އެމްޑީޕީގެ ރިޔާސީ ކެންޑިޑޭޓަކީ އިދިކޮޅު ކެންޑިޑޭޓަށް ހަދަން އެއްބަސްވި އެވެ.
އޭގެ 24 ގަޑިއިރު ވެގެން ނުދަނީސް އެމްޑީޕީއިން ވަނީ ރިޔާސީ ކެންޑިޑޭޓް ދައްކާފަ އެވެ. ކޮންގްރެސް ބާއްވައި ކޮންގްރެސްގައި ފުރިހަމަ އިއްތިފާގުން އިބްރާހިމް މުހައްމަދު ސޯލިހު، އިބޫ ކެންޑިޑޭޓްގެ ގޮތުގައި ނެރެ ދެއްކި އެވެ. އިދިކޮޅުގައި ދެން އޮތް އެންމެ ބޮޑު ޕާޓީ ޖުމްހޫރީ ޕާޓީއަށް ދިނީ އަނެއް ބޮޑު ޒިންމާއެވެ. ރަނިންމޭޓެއް ނެރުމުގެ ޒިންމާ އެވެ.
އެ ޒިންމާ ޖުމްހޫރީ ޕާޓީއަށް އަދި އަދައެއް ނުކުރެވެ އެވެ. ރަނިންމޭޓެއް ނުދެއްކި ލަސްވަމުންދާއިރު ބަހުސް ދަނީ ހޫނުވަމުންނެވެ. ތަފާތު ނަންތައް ސޯޝަލް މީޑިއާގައި ދަނީ ދައުރުވަމުންނެވެ. ހިޔާލު ތަފާތުވުންތައް އެންމެންނަށް ފާޅުގައި ދަނީ ފެންނަމުންނެވެ.
ޖުމްހޫރީ ޕާޓީގެ ނައިބު ރައީސް ޑރ. އަބްދުﷲ މައުސޫމް ކުރައްވާފައިވާ ޓްވީޓަކުން ރަނިންމޭޓާމެދު ހިޔާލު ވަރަށް ބޮޑަށް ތަފާތުވެފައިވާކަން އެނގެ އެވެ. އޭނާ ވިދާޅުވީ، ނައިބު ރައީސްގެ މަގާމު ބޭނުން ވަނީ ރައީސް ކަމަށް ހިތްކިޔާތީ ކަމަށްވާނަމަ ބަގާވާތައް މަގުފަހިވުމުގެ ފުރުސަތު ބޮޑު ކަމަށެވެ.
މައުސޫމަކީ ވެސް ރަނިންމޭޓް ކަމަށް ވާދަ ކުރައްވާ ކެންޑިޑޭޓެއް ކަމަށް ބެލެވެ އެވެ. އޭނާގެ ނަން ވެސް ދަނީ ދައުރުވަމުންނެވެ. އޭނާގެ އެ ޓްވީޓަކީ ވާދަވެރި ކެންޑިޑޭޓަކަށް އެއްލި ހަމަލާއެކެވެ. ނޭނގެނީ ހަމަލާ އަމާޒުވީ ކާކަށް ކަމެވެ.
މައުސޫމްގެ އިތުރުން ރަނިންމޭޓްގެ ރޭހުގައި ދެން ވާދަ ކުރައްވަނީ އެ ޕާޓީގެ ނައިބު ލީޑަރުން ކަމަށްވާ އަބްދުﷲ އަމީނާއި ހުސެއިން ރަޝީދު ހަސަނާއި ކައުންސިލް މެންބަރު އަދި ގާސިމް އިބްރާހިމްގެ ހަގު އަނބިކަނބަލުން އައިޝަތު ނަހުލާ އަދި މަޖިލިސް މެންބަރުން ކަމަށްވާ އަލީ ހުސެއިނާއި ފައިސަލް ނަސީމެވެ.
ޕާޓީގެ ތެރޭގައި ރަނިންމޭޓްގެ ބަހުސް ހޫނެވެފައިވާއިރު އޭގެ އަސަރު ބޭރަށް ވެސް ވަނީ ކޮށްފަ އެވެ. އިދިކޮޅު އެހެން ބޭފުޅުން ވެސް ދަނީ ފާޅުގައި އެ ބަހުސްގައި ބައިވެރިވެ ކަންބޮޑުވުންތައް ހާމަކުރައްވަމުންނެވެ. އެފަދަ އެއް ބޭފުޅަކީ މިނިވަން މެންބަރެއްގެ ގޮތުގައި ހުންނެވި ގަލޮޅު ދެކުނު ދާއިރާގެ މެންބަރު އަހުމަދު މަހުލޫފެވެ.
މަހުލޫފް ކުރައްވާފައިވަނީ ސުވާލެކެވެ، "ރިޔާސީ ރޭހުގެ ވަކި ހިސާބަކުން ރަނިންމޭޓްގެ ނަން އަނބުރާ ގެންގޮސްފިނަމަ ދެން ވާނީ ކިހިނެއް؟"
މަހުލޫފް ވިދާޅޫވީ އެއީ ވިސްނަންކެހޭ ސީރިއަސް ކަންކަން ކަމަށާއި ކެންޑިޑޭޓާއި ރަނިންމޭޓަކީ ޕާޓީތަކުން އެއްބަސްވާ ނަންތަކަކަށް ވާންޖެހޭ ކަމަށެވެ.
ސޯޝަލް މީޑިއާގައި ރަނިންމޭޓްގެ ރޭހުގެ އެންމެ ކުރީގައި އުޅުއްވަނީ އަލީ ހުސެއިނެވެ. އޭނާއަށް ގިނަ ބަޔަކު ތާއިދު ކުރައްވަމުންދާއިރު މިނިވަން ބޭފުޅުން ވެސް އެ ބޭފުޅުންގެ ތާއިދު އަލީ ހުސެއިނަށް ދަނީ ދައްކަވަމުންނެވެ. ދެން އެންމެ ކުރީގައި އުޅުއްވަނީ ގާސިމްގެ އަނބިކަނބަލުން އައިޝާ އެވެ.
ރަނިންމޭޓަކަށް ވާނެ ކަމަށް އެންމެ ބޮޑަށް ބެލެވެނީ އައިޝާ އެވެ. އެއީ އައިޝާއަށް ތާއީދު ކުރައްވާ މީހުން ކޮށްފައިވާ ޓްވީޓްތައް ގާސިމް ރީޓްވީޓް ކުރައްވާތީ އެވެ. ހަގީގަތަކީ ޖުމްހޫރީ ޕާޓީގެ ލީޑަރުކަން ގާސިމް ދޫކޮށްލައްވާފައިވީ ނަމަވެސް އެ ޕާޓީގައި ކަންކަން ހިނގާނީ ގާސިމްގެ ތާއީދު އޮންނަ ގޮތަށްކަން ކަމެވެ.
ރަނިންމޭޓް ހޮވަން ނިންމާފައިވަނީ ޕާޓީގެ ކައުންސިލް ބައްދަލުވުމަކުންނެވެ. އަދި އެ ބައްދަލުވުން ބޭއްވިފައިނުވާއިރު ވަރަށް އަވަހަށް ބައްދަލުވުން ބާއްވާނެކަން ޕާޓީން ވަނީ އިއުލާންކޮށްފަ އެވެ.