ހަބަރު

މަތިވެރީގެ ނަރުދަމާއާ ނިލަންދޫގެ ފެން ވިއުގަ ގާއިމުކުރަން ލަންކާ ކުންފުންޏަކަށް

Jul 5, 2018
1

އއ. މަތިވެރީގެ ނަރުދަމާ ނިޒާމާއި ފ. ނިލަންދޫގެ ފެނުގެ ނިޒާމު ގާއިމު ކުރުމުގެ މަޝްރޫއުގެ އަމަލީ މަސައްކަތް ލޭބާ ކޮންޓްރެކްޓް މޮޑެލްގެ ދަށުން ސްރީ ލަންކާގެ އެޑްވާޑް އެންޑް ކްރިސްޓީ ކުންފުންޏާ ހަވާލުކޮށްފި އެވެ.

މި މަސައްކަތް އެ ކުންފުންޏާ ހަވާލުކުރީ މިއަދު އެންވަޔަރަންމަންޓް މިނިސްޓްރީގައި ބޭއްވި ރަސްމިއްޔާތެއްގަ އެވެ.

އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ އެނާޖީ މިނިސްޓަރު އިބްރާހީމެވެ. އެޑްވާޑް އެންޑް ކްރިސްޓީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަރަވަލޭޖް ޑޮން ރާޖް ކްރިސްޓީ ލިއޮނާޑެވެ.

މަތިވެރީގެ ނަރުދަމާ ލޭބަ މަޝްރޫއު ކޮންޓްރެކްޓްގެ ޖުމްލަ އަގަކީ 13,558,970.00 ރުފިޔާ އެވެ. ނިލަންދޫގެ ފެނުގެ ލޭބާ މަޝްރޫއުގެ ކޮންޓްރެކްޓް އަގަކީ 16,724,160.60 ރުފިޔާއެވެ.

މި ދެ މަސައްކަތް ވެސް 12 މަސް ދުވަހުގެ ތެރޭ ނިންމަން ޖެހެ އެވެ.