ރާއްޖޭގެ 20 ރަށެއްގައި ނަރުދަމާ އެޅުމަށް އެކުލަވައިލި ބޮޑު މަޝްރޫއެއްގެ މަސައްކަތް ފެނަކަ ކޯޕަރޭޝަނުން މިއަދު ސްރީލަންކާގެ ކުންފުންޏަކާ ރަސްމީކޮށް ހަވާލުކޮށްފި އެވެ.
ސްރީލަންކާގެ ހޭކާބް ޕަބްލިކް ލިމިޓެޑްއާ އެކު އެއްބަސްވުމުގައި ސޮއިކުރަން މިއަދު އިސްލާމީ މަރުކަޒުގައި ބޭއްވި ރަސްމިއްޔާތެއްގައި ފެނަކައިގެ ފަރާތުން ސޮއި ކުރެއްވީ އެ ކުންފުނީގެ އެކްޓިން މެނޭޖިން ޑިރެކްޓަރު މުހައްމަދު ލައްމާން އެވެ. ހޭކާބްގެ ފަރާތުން އެ ކުންފުނީގެ މެނޭޖިން ޑިރެކްޓަރު ރަޖިތާ ކަރިޔަވަސަން އެވެ.
މި އެއްބަސްވުމުގެ ދަށުން ވިހި ރަށުގައި ނަރުދަމާ ގާއިމްކުރަން 53 މިލިއަން ޑޮލަރު ހަރަދު ކުރަން ނިންމާފައި ވެއެވެ. އެއީ ގާތްގަނޑަކަށް 866 މިލިއަން ދިވެހި ރުފިޔާ އެވެ. އެ 20 ރަށުގެ ނަރުދަމާގެ މަސައްކަތް ކުރިއަށް އޮތް ދޮޅު އަހަރުގެ ތެރޭގައި ނިންމަން ޖެހޭނެ ކަމަށް ފެނަކައިން ބުންޏެވެ.
އަލަށް ނަރުދަމާ ގާއިމްކުރާ ރަށްތައް
- ހއ މާރަންދޫ
- ހއ ވަށަފަރު
- ހދ ފިނޭ
- ހދ ވައިކަރަދޫ
- ށ ފޯކައިދޫ
- ނމާފަރު
- ނ ޅޮހި
- ރ ކިނޮޅަސް
- ބ ކަމަދޫ
- ބ މާޅޮސް
- ބ ގޮއިދޫ
- ޅ އޮޅުވެލިފުށި
- ކ ގުޅި
- އއ މަތިވެރި
- އއ ފެލިދޫ
- ވ ކެޔޮދޫ
- އދ ދިގުރަށް
- ތ ހިތިލަންދޫ
- ގއ ދެއްވަދޫ
- ގދ ހޯނޑެއްދޫ
އަލަށް ނަރުދަމާ ގާއިމްކުރާ 20 ރަށާއެކު ރައީސް އަބްދުﷲ ޔާމީންގެ ވެރިކަމުގައި ނަރުދަމާގެ މަޝްރޫއު ކުރިއަށްގެންދާ ރަށްތަކުގެ އަދަދު 83 އަށް އަރާނެ އެވެ. ނަރުދަމާގެ މަސައްކަތް ފެށި ރަށްރަށުގެ ތެރެއިން މިހާތަނަށް ނިމިފައިވަނީ 22 ރަށުގެ މަސައްކަތެވެ. ބާކީ ރަށްތަކުގެ މަސައްކަތްތައް ކުރިޔަށް އެބަ ދެއެވެ.
