ޖެންޑާ މިނިސްޓްރީން މިދިޔަ އަހަރު ގަވާއިދާ ހިލާފަށް ފައިސާގެ ގިނަ މުއާމަލާތްތަކެއް ހިންގާފައިވާކަން އެ މިނިސްޓްރީގެ އޮޑިޓް ރިޕޯޓުން ހާމަވެއްޖެ އެވެ.
ޖެންޑަ މިނިސްޓްރީން މިދިޔަ އަހަރު ކުރި ހަރަދުތަކުގެ ތަފްސީލު ހިމެނޭ އޮޑިޓް ރިޕޯޓު މިއަދު އޮޑިޓާ ޖެނަރަލްގެ އޮފީހުން ވަނީ އާންމުކޮށްފަ އެވެ. އެ ރިޕޯޓުގައި މާލިއްޔަތުގެ ގާނޫނާ ހިލާފަށް ކޮށްފައިވާ ޖުމްލަ އަށް ކަމެއް ހިމަނާފައިވެ އެވެ. އޭގެ ތެރޭގައި އެއްބަސްވުމެއް ނެތި މިނިސްޓްރީގެ މަސައްކަތްތައް މީހުން ލައްވައި އަގު ދީގެން ކޮށްފައިވުމާއި، ސަސްޕެންޝަނުގައި ބަހައްޓާފައި ހުރި މުވައްޒަފަކަށް އަހަރު ނިމެންދެން ގަވާއިދުން މުސާރަދީފައިވާ މައްސަލައެއް ހިމެނެ އެވެ.
ރިޕޯޓުގައިވާ ގޮތުން އެއްބަސްވުމެއް ނެތި، ހަތްލައްކަ އަށްވުރެ ގިނަ ރުފިޔާ ޖެންޑާ މިނިސްޓްރީން މިދިޔަ އަހަރު ހަރަދުކުރި އެވެ. އަދި މިދިޔަ އަހަރުގެ މާޗް މަހުން ފެށިގެން މިއަހަރުގެ ފެބްރުއަރީއާ ހަމައަށް އެއްވެސް މަސައްކަތެއް ހަވާލުނުކޮށް ސަސްޕެންޑްކޮށްފައިވާ މުވައްޒަފަކަށް ސަސްޕެންޝަން މުއްދަތުގައި މުސާރައިގެ ގޮތުގައި 85000 އަށްވުރެ ގިނަ ރުފިޔާ ދީފައިވާކަން ވެސް ރިޕޯޓުގައި ފާހަގަކޮށްފައިވެ އެވެ.
"މިނިސްޓްރީގެ ދަށުން ހިންގާ ޏ އަތޮޅުގެ ޗިލްޑްރަން ސާވިސް ސެންޓަރުގެ އެސިސްޓެންޓް ސޯޝަލް ސާވިސް ވޯކާގެ މަގާމުގަ ހުރި މުވައްޒަފު ނުވައެއް މާޗް 2017 އިން ފެށިގެން އެކެއް ފެބްރުއަރީ 2018 އަށް އެއްވެސް މަސައްކަތެއް ހަވާލުނުކޮށް ބެހެއްޓުމަށްފަހު މުސާރައާ އެލަވަންސްގެ ގޮތުގައި 85110 ރުފިޔާ ދީފައިވުން،" އޮޑީޓް ރިޕޯޓުގައި ފާހަގަކޮށްފައިވެ އެވެ.
މީގެ އިތުރުން މިނިސްޓްރީން ކޮށްފައިވާ ބައެއް މަސައްކަތްތަކުގެ ފީއިން ރިޓެންޝަން ފީގެ ގޮތުގައި އުނިކުރަންޖެހޭ ބައި އުނިކޮށްފައިނުވުމާއި، މަސައްކަތުގެ އަގު ބޮޑުވާގޮތަށް އިއުލާން ނުކޮށް ބައިބަޔަށް ބަހާލައިގެން މިނިސްޓްރީގެ ހަރަކާތްތަކަށް ތަކެތި ގަނެފައިވާ މައްސަލައެއް ވެސް އޮޑިޓުގައި ފާހަގަކޮށްފައިވެ އެވެ. އަދި އެގްރިމެންޓްކޮށްގެން ހަވާލުކުރާ މަސައްކަތްތައް ކަނޑައެޅިފައިވާ މުއްދަތަށް ނުނިމުމުން ދައުލަތަށް ލިބޭ ގެއްލުމުގެ ބަދަލު ހޯދުމަށް މާލިއްޔަތުގެ ގާނޫނުން ލާޒިމްކުރާއިރުވެސް ގެއްލުމުގެ ބަދަލަށް މިނިސްޓްރީއަށް ލިބެންޖެހޭ 21 ހާހަށްވުރެ ގިނަ ރުފިޔާ އެ މިނިސްޓްރީން ހޯދާފައިނުވާކަން ވެސް ރިޕޯޓުގައި ވަނީ ފާހަގަކޮށްފަ އެވެ. ރިޕޯޓުގައި ވާގޮތުން އެގްރީމެންޓްގެ މުއްދަތަށްވުރެ ފަހުން ނިންމި މަސްކަތްތަކަށްވެސް އެ މިނިސްޓްރީން ފައިސާ ދައްކާފައިވަނީ އަގުން އެއްވެސް މިންވަރެއް އުނި ނުކޮށެވެ.
މި މައްސަލަތަކާ ގުޅިގެން ދައުލަތަށް ގެއްލުންވާގޮތަށް ހިނގާފައިވާ ހަރަދުތައް ހޯދުމަށާއި މާލިއްޔަތުގެ ގާނޫނާ އެއްގޮތަށް ފައިސާގެ މުއާމަލާތްތަކާއި ހަރަދުތައް ބަލަހައްޓަން ޖެންޑާ މިނިސްޓްރީއަށް އޮޑިޓާ ޖެނަރަލް ވަނީ ލަފާދެއްވާފަ އެވެ.