އދ. ހަންޏާމީދޫގެ ދެ ކައުންސިލަރުންނާއި އިތުރު ޒުވާނުންތަކެއް މިއަދު ޕީޕީއެމްއާ ގުޅިވަޑައިގެންފި އެވެ.
ޕީޕީއެމްއަށް އަލަށް މިއަދު ސޮއި ކުރެއްވީ އަމިއްލަ ގޮތުން އިންތިހާބުވެފައިވާ ހަންޏާމީދޫ ކައުންސިލްގެ ރައީސް މޫސާ ނާޒިމް އާއި ކައުންސިލްގެ ނައިބު ރައީސް ހަސަން އަޝްރަފް އެވެ. އެ ދެ ކައުންސިލަރުން ޕީޕީއެމްއާ ގުޅުމުން އެ ރަށުގެ މުޅި ކައުންސިލް ޕީޕީއެމްއަށް ލިބޭނެ އެވެ. އެ ދެ ކައުންސިލަަރުންގެ އިތުރުން 12 ޒުވާނުން ވެސް ވަނީ މިއަދު ޕީޕީއެމްއަށް ސޮއި ކުރައްވާ އެ ޕާޓީއާ ގުޅިވަޑައިގެންފަ އެވެ.
އެކަމާ ބެހޭ ގޮތުން ޕީޕީއެމް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ނައިބު ރައީސް އަބްދުއްރަހީމް އަބްދުﷲ ވިދާޅުވީ ޕީޕީއެމްއަށް އަލަށް މެންބަރުން ގުޅިވަޑައިގަތުމަކީ "ތަރައްގީއަށް ރައްޔިތުން އާބަސް ބުނުން" ކަމަށެވެ. އަދި އދ. ހަންޏާމީދޫގެ ދެ ކައުންސިލަރުން ގުޅުމުން ޕާޓީއަށް ވަރަށް ބޮޑު ކުރިއެރުމެއް ލިބިގެންދާ ކަމަށާއި އެއީ ރައީސް ޔާމީން ގައުމަށް ގެންނަ ތަރައްގީ ރާއްޖޭގެ ހުރިހާ ދިމާލަކުން ބަލައިގަންނަ ކަމުގެ ހެއްކެއް ކަމަށެވެ.
އދ. އަތޮޅަށް ނިސްބަތްވާ މަހިބަދޫ ދާއިރާގެ މެންބަރު ތޯރިގު އިބްރާހިމް ވިދާޅުވީ ހަންޏާމީދޫގެ ހުރިހާ ކައުންސިލަރުން ޕީޕީއެމްގެ މެންބަރުންނަށްވުމާއެކު ކުރަަމުން މިހާރު ފަށާފައި ވަނީ ކުރިޔަށް އޮތް ރިޔާސީ އިންތިހާބުގައި އެ ރަށުގެ 50 ޕަސަންޓަށް ވުރެ ގިނަ ވޯޓު ރައީސް އަބްދުﷲ ޔާމީންއަށް ހޯދައި ދިނުމުގެ މަސައްކަތް ކަމަށެވެ. އެ ރަށުން ރައީސް ޔާމީންއަށް ވޯޓު ދޭން ޖެހޭ ސަބަބު ވިދާޅުވަމުން ތޯރިގު ވިދާޅުވީ މިދިޔަ 20 އަކަށް އަހަރު ރަށަށް އެއްވެސް ތަރައްގީގެ މަސައްކަތެއްކޮށްދީފައި ނުވި ނަމަވެސް މި ސަރުކާރުން ނަރުދަމާ ނިޒާމް ގާއިމް ކުރުމުގެ މަސައްކަތް ފަށާފައިވާ ކަމަށެވެ. އޭގެ އިތުރުން ފުޓްސަލް ދަނޑެއް އެޅުމުގެ މަސައްކަތް ވެސް ކުރަމުން އަންނަ ކަމަށް ތޯރިގު ވިދާޅުވި އެވެ.