މަޝްހޫރު ގިނަ ތަރިންތަކެއް ހިމަނައިގެން އުފައްދާފައިވާ ފިލްމު "ދިލް ދަޅަކްނޭ ދޯ" ސިނަމާތަކާއި ހަމައަށް އަންނަން އަދި ހަތަރު ދުވަސް ބާކީއޮތް ނަމަވެސް، މިފިލްމަށް ވަނީ ގިނަ ބައެއްގެ ސަމާލުކަން ހުއްޓިފަ އެވެ.
ގިނަބަޔަކު މިހާރުވެސް މިފިލްމަށް އިންތިޒާރުކުރަމުން އަންނައިރު، ފިލްމާއި މެދު ބެލުންތެރިން ކުރާ އުންމީދު ވެސް ބޮޑެވެ.އެގޮތުން ފިލްމު ރިލީޒްކުރުމުގެ ކުރިން، މިފިލްމުގެ ރީމޭކް އެއް ހަދަން މިހާރު ބަޔަކު ވަނީ ޝައުގުވެރިކަން ފާޅުކޮށްފަ އެވެ.
ހޮލީވުޑްގެ ސްޓޫޑިއޯ އަކުން ވަނީ މިފިލްމުގެ އިނގިރޭސި ވާޝަންއެއް އުފެއްދުމަށް ޑައިރެކްޓަރު ޒޯޔާ އަޚްތަރު އާއި ފިލްމުގެ ރައިޓްސް ހޯދުމާއި ބެހޭގޮތުން ވާހަކަ ދައްކާފައިކަމަށް ބޮލީވުޑްގެ ހަބަރުތައް ގެނެސްދޭ ވެބްސައިޓް ތަކުގައިވެ އެވެ. މީގެއިތުރުންވެސް ވަނީ ފިލްމުގެ ރީމޭކްގެ ހުއްދަ ގަތުމަށް 8 މިލިއަން ޑޮލަރުވެސް ހުށަހަޅާފައި ކަމަށް ރިޕޯޓްތައް ބުނެ އެވެ.
މި ސްޓޫޑިއޯގެ ފަރާތުން މިހާރުވެސް އަންނަނީ ޒޯޔާގެ ފަރާތުން އަވަސް ޖާވާބެއް ލިބޭތޯ މަސައްކަތްކުރަމުންނެވެ، އެހެންނަމަވެސް މިކަމާއި ގުޅޭގޮތުން އެއްވެސް ޖަވާބެއް ދޭނީ "ދިލް ދަޅަކްނޭ ދޯ" މިމަހުގެ ފަސްވަނަ ދުވަހު ރިލީޒްކުރުމަށް ފަހުގައި ކަމަށް ޒޯޔާ ވަނީ ބުނެފަ އެވެ.
ދެހާސް އެގާރަވަނަ އަހރު ނިކުތް "ޒިންދަގީ ނާ މިލޭގީ ދޮބާރާ" އަށް ފަހު ޒޯޔާ ޑައިރެކްޓްކޮށްފައިވާ މިިފިލްމުގެ މުހިންމު ރޯލްތަކުން ފެނިގެންދަނީ އަނިލް ކަޕޫރު، ޝެފާލީ ޝާހް، ޕްރިޔަންކާ ޗޯޕްޅާ، އަނުޝްކާ ޝަރްމާ، ފަރްހާން އަޚްތާރު އަދި ރަންވީރު ސިންގް އެވެ.
މިއަހަރުގެ ތެރޭގައި ނިކުންނަ އެންމެ ޑްރެމެޓިކް ފިލްމަށްވާނެ ކަމަށް ބެލެވޭ މިިފިލްމުގެ މަންޒަރުތައް ނަގާފައިވަނީ ތުރުކީ އާއި ގްރީސްއާއި ދެމެދު ދަތުރުކުރާ ކްރޫޒްލައިނާއެއްގެ އިތުރުން ޔޫރަޕްގެ ގައުމުތަކުގެ ތެރެއިން ފްރާންސް، އިޓަލީ، ސްޕެއިން، ޓޫނީޝިއާ އާއި އިޓަލީގެ އިތުރުން އިންޑިޔާގެ މުމްބާއީގަ އެވެ.
މިމަހުގެ ތިންވަނަ ދުވަހު ބޮލީވުޑްގެ ފަރާތްތަކަށް ހާއްސަ ސްރީނިންއެއް ބޭއްވުމަށް ހަމަޖެހިފައިވާއިރު، މިފިލްމަކީ އާއިލާއެއްގެ ތެރޭގައި ހުންނަ ހަމަނުޖެހޭ ދިރިއުޅުން ދައްކުވައިދޭ ފިލްމެކެވެ.
އެކްޓަރު ފަރްހާން އަޚްތަރު އާއި ރިތޭޝް ސިދްވާނީ ޕްރޮޑިއުސްކޮށްފައިވާ މިފިލްމުގެ ހާއްސަ ފެނިލުމަކުން ސުޕަސްޓާ އާމިރް ޚާން ފެނިގެންދާނެ ކަމަށްވެ އެވެ.