ޝަރުއީ ދާއިރާގެ ރަސްމީ ގަޑި ބަދަލުކޮށްފި

ޝަރުއީ ދާއިރާގެ ރަސްމީ ގަޑި ބަދަލުކުރަން ނިންމައިފި އެވެ. ނިންމާފައިވަނީ މިހާރު މަސައްކަތް ކުރާ ވަގުތަށްވުރެ އެއް ގަޑިއިރު މަދުކުރާށެވެ.

ޝަރުއީ ދާއިރާގެ މުވައްޒަފުން މިހާރު މަސައްކަތް ކުރަމުންދަނީ ހެނދުނު 8:00 ން މެންދުރުފަހު 3:00 އަށެވެ. އެއީ ސިވިލް ސާވެންޓުންނަށްވުރެ އެއް ގަޑިއިރު އިތުރަށެވެ.

ނަމަވެސް މިއަދު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން، ޑީޖޭއޭއިން ނެރުނު އެންގުމެއްގައި ބުނީ ޝަރުއީ ދާއިރާގެ ރަސްމީ ގަޑިއަކީ ހެނދުނު 8:00 ން މެންދުރުފަހު 2:00 އަށް ކަމަށް ސުޕްރީމް ކޯޓުން ނިންމާފައިވާ ކަމަށެވެ. އެގޮތަށް އަމަލު ކުރަން ފަށާނީ މާދަމާއިން ފެށިގެންނެވެ.

ޑީޖޭއިން ބުނީ މަސައްކަތުގެ ގަޑިއަށް ބަދަލު ގެނެސްފައިވާއިރު ވަޒީފާއާ ބެހޭ ގާނޫނުގައިވާ ގޮތުން ކޮންމެ މުވައްޒަފަކަށް ވެސް މެންދުރު ފަހު 12:00 އިން 1:00 އާ ދެމެދު 30 މިނެޓްގެ ހުސް ވަގުތެއް ދޭން ޖެހޭނެ ކަމަށެވެ. އަދި އެގޮތަށް މުވައްޒަފުންނަށް ހުސް ވަގުތު ދޭން ޖެހޭނީ އިދާރީ މަސައްކަތްތައް މެދުކެނޑިގެން ނުދާ ގޮތުގެ މަތިން ވެސް ކަމަށެވެ.